Jipoxolo 19 - O Mikanda Ikola

O njila ia Phaulu ia katatu kulonga mu jixi. U bhixila ku Efezo

¹ Kiosuiki ki ala Apolo mu Korindo, Phaulu kia zubha kunhunga ku madiembu ku thunda, u bhixila ku Efezo, anga u sanga-ku jixibulu.

² Anga ua ambela, uixi: Enu mua tambula kiá Nzumbi Ikôla tunde ki mua xikana? Ene exi: Kana! Etu kiluua ngó tu kʼ ivua kuila sai-ku Nzumbi Ikôla.

³ Uixi: A mi batizala-phe mu dijina diahi? Exi: Mu batizu ia Nzuá.

⁴ Kuala Phaulu: Nzuá ua mi batizala ni batizu ia ió a mu diela-ke o ituxi iâ. Iú ua longesele o mundu kuma a xikane ió ua mu kaiela ku dima diê, muene Jezú.

⁵ Ene kia zubha kuivua kiki, a a batizala mu dijina dia Ngana Jezú.

⁶ O Phaulu kia a tula o maku mê ku thandu, Nzumbi Ikôla ua a tulukila ene oso. Anga a kuata kutanga madimi mengi, hé a kala ue ni uanji ua kulombolola o Maka ma Nzambi.

⁷ Enʼiá ala kuinhi dia muthu ni kiiadi.

⁸ Phaulu anga u kala mu bokona mu dilombe dia Jijudé, u bhua uôma ni kutanga o maka mu thembu ia mbeji jitatu, u jingununa ima ia tokala ku Utuminu ua Nzambi, u sota ku a xikanesa.

⁹ Maji amoxi-mu-phe a kola muẋima ni kuxibhaka, o Njila ia Ngana a kala mu ku i tobhesa bhu pholo ia mundu. Phaulu-phe ua di batuka-nâ, anga u di kalela, hé uambata kumoxi-nê o jixibulu jala jikidistá. Anga izuua ioso u kala mu jingununa o Maka mu xikola ia Tilanu.

¹⁰ Kienʼiki anga u ki jijila mu mivu iiadi, katé ene oso a tungu mu Azia ki evu o Maka ma Ngana, ni Jijudé, ni ió ka tokala mu muiji ua Jijudé.

O Anʼ a Seva Nzambi u bhanga isumua ku maku a Phaulu

¹¹ Nzambi anga u bhangesa isuma iosanuke ku maku ma Phaulu.

¹² Katé se jihaxi a ji bhekela malesu, mba jiponda, ja tundu ku mukutu uê, o haxi nʼa ji babata, o kukata kubhua, o nzumbi jaiibha ji tunda.

¹³ Kukala-phe ilalu ia Jijudé, a kexi mu kuila a tunda kididi eza kididi, kuma ene imbanda ia kukambêla, a teza kutumbula dijina dia Ngana Jezú, ku thandu dia ió ala ni jinzumbi jaiibha, exi: Nga mi kambelêla mu dijina dia Jezú, ió a mu tange kuala Phaulu, kuila mu tunda.

¹⁴ Anga bhu kala sambuadi dia ana a Seva nganga ia dikota ku Jijudé, a bhanga jinga kienʼiki.

¹⁵ Maji o nzumbi iaiibha-phe ia a vutuila, iexi: Jezú nga mu suu, o Phaulu nga mu ijiia, enu-phe mu akua-hi?

¹⁶ O diiala uala ni nzumbi iaiibha moxi diê, anga u a tukila ku thandu, u kala kota ku nguzu, u a tolola ni kibetu katé kia lenge mʼonzo ni tuẋi, ni mikutu iatu.

¹⁷ Kienʼiki anga a kʼivua kuala athu oso a tungu mu Efezo, ni Jijudé, ni Jingeleku. Anga uôma u a kuata ene oso, o dijina dia Ngana Jezú hé di fumana.

¹⁸ Kua iá a xikana, athu avulu eza ni kufisala ni kutukulula imbamba ia kexi mu bhanga jinga mʼ okulu.

¹⁹ Sai ue athu kʼatolo, a tambuile uanga, a bheka o madivulu mâ, anga a ma ta mu tubhia ku mesu ma mundu. Hé a kuata konda kioso ki ate o madivulu, ma tena konda ia makuinhi a tanu a midi ia itadi ia phalata.

²⁰ Uila kiki, o Maka ma Ngana, ma kala dingi mú sambuka ni kusuina, ma lenda ioso.

Demetrio u salumuna akua Efezo

²¹ Kia bhiti imʼ iii, Phaulu u kana ku muẋima uê kubhita ku Masedonia ni ku Akaia, ni kuia ku Jeluzaleme, uixi: Se nga zubha kubhita kuenioko, nga kàia ku Loma.

²² Anga u tuamekesa ku Masedonia kiiadi kua iá ala ku mu kuatekesa, Timote ni Erastu, muène-phe ua xala hanji mu Azia.

²³ Kithangana kieniokio-phe mu mbonge ia Efezo kavanza ka bhitile-mu, mukonda dia Njila ia Ngana, ki katolo.

²⁴ Kuma ku kala muthu dijina diê Demetrio, mesene ia ufunu, mukua kuiudika iteka ia phalata ia tembulu ia Hamba-Diiana. Mu uenji uê uenʼiú, o nganhu ia jimesene ja kexi mu kalakalanê kumoxi, ia mono-ku ki ia tolo.

²⁵ Muene anga u a bhongolola, kumoxi ni akalakadi a ufunu uâ uene umoxi, uixi: Enu jingana, mua kʼ ijiia kuamba ufunu iú uene uala ku tu muesa itadi.

²⁶ Mua mono ue, enu mua kʼ ivu kuila o Phaulu muenʼ iú, kana ngó mu Efezo, maji kua mu kambe ngó kuzubha o Azia ioso, ni kubhomba athu avulu ni ku a funhisa, mbata uala ku a tangela kuma o jinzambi jokalakale ni maku ki jinzambi!

²⁷ O ki tualʼ iki-phe, se ki tu dimuka, ni ufunu uetu uene uanda kudibota! Ki bhene-phe ngó bhu ki suka! Ni Tembulu iene ia kiteka kia dikota kia muhatu Diiana, anda ku i kita kingoho, katé ni muene Diiana, ene ku mu bheza kuala Azia ioso, ni athu oso mu ngongo, hinu a mu katula o kijingu.

²⁸ Ene kia zubha kuivua kiki, ezala njinda, anga a kuata kukola-kola, exi: Diiana dia akua Efezo ukôla!

²⁹ Mbonge ioso anga izala kavanza. Mundu uoso anga u di lukula muenhu umoxi, hé a kuata ni kuxinjika Ngaio ni Aristarko, akua Masedonia, ene mu kuenda ni Phaulu, katé mu teiatulo.

³⁰ Phaulu muene kia mesenene u bokona mua bhongoloka o mundu phala kuzuela-nâ, jixibulu-phe ka mu ehela.

³¹ Sai ue ni makamba mê, makota ma athu mu Azia, a tuma ku mu dionda kuila ka bhange iluezu ia kubokona mu tiiatulo.

³² Kithangana kieniokio mundu uoso ua bokona mu kavanza ka dikota. Iá-phe a di kola kiki, iá a di kola kiokio, kuma kifuẋi kia di vunza-vunza ngó o athu kavulu-ku ejiia kioso kià bheka.

³³ Anga a tubhula Xandele mu ʼaxaxi ka mundu, mukonda amoxi-mu a fika kuma muene uala ni kikuma, mbata, Jijudé ja mu jijila kuia mu kuimana ku pholo. Xandele anga u bhalula ni lukuaku, u mesena u di kaiula kikuma bhu pholo ia mundu.

³⁴ Maji o kia mu mono-phe kuma Judé, a di kola lujiji mu ola jiiadi, exi: Diiana dia akua Effezo u kôla!

³⁵ Bhenhobho xikidivá ia mbonge-phe, ua bateka o mundu, uixi: Enu mala mu akua Efezo! Mukua-hi ua kambe ku kʼ ijiia kuma diembu dietu dioso dia Efezo diala mukombi-a-tembulu ia Diiana, kota dia dihamba, ni ditadi di kôla dia lauka ku diulu kua Nganga-nzumba?

³⁶ Kuma imʼ iii ki i tena ku i kuata phata, mua fuama mu batâma, ki mu bhange kima ni kusuina sé kuxinganeka kiambote.

³⁷ Enu mua bheka bhabha o mala iâ, maji ene mu tembulu ka nhana-mu, mba o dihamba dietu ka di ẋonguena.

³⁸ O ki tualʼ iki, Demétrio, ni jimesene ni akuâ, se ala ni muthu ua kikuma kiâ, sai izuua ni ididi ia kufundisa madimanda, sai ue ni afundixi. Ene a di xitale kuenioko mudiâ.

³⁹ Maji se kuala makʼ engi u mua bhindamena, kikale ku ma tetulula kuê ku kionge kia athu a ujitu mu mbonge ietu.

⁴⁰ Kidi kiene tuala ni hele ia ku tu ibhula o mvunda ia lelu, ki i moneka kikuma, ni ku tu ixana kuila tu akua kavanza, mukonda dia ima ienʼiii ialu bhita lelu. Kuma kioso kia salumuna o mundu iú ki tua kʼ ijiia, kana-ku ue kikuma ki tokala kubheka o mufufu uosʼú.

⁴¹ O kia zubha muene kuzuela kiki, iú ua muanganesa o mundu.