Jipoxolo 18 - O Mikanda Ikola

Phaulu mu Korindo

¹ Kia bhiti imʼ iii, Phaulu ua tundu mu Atena, hé u bhixila mu Korindo.

² Anga u sanga-mu Judé dijina diê Akuila, mukua bhata diê ku Pontu, kindala kia tundu ku Italia, ni mukajiʼê Pidisila. Ene koko a tundu-ku, mukonda Kaláudio ua kexi mu tumina mu Loma, ua tumu kukaiesa o Jijudé joso a kexi mu Loma.

³ Phaulu anga u a kana ene, mukonda ufunu uâ uene umoxi, anga u xala-nâ, hé a kala mu kalakala, kuma o ufunu uâ kutunga jibalaka.

⁴ Anga u lombolola maka jisabhalu joso mu dilombe, u sota kuxikanesa o Jijudé ni Jingeleku.

⁵ Kia mu sange-phe Sila ni Timote, a tundu ku Masedonia, Phaulu u jijila ngo kutanga o maka. U kala mu kuambela o Jijudé kuma Jezú muène Kristu.

⁶ Ene-phe a lungulukila Phaulu, hé a ẋinuka ni ku mu xinga. Muène anga ua a kukumuina izuatu iê, uixi: Enu se mu texika, o manhinga menu ma kala ku thandu dienu! Eme nga zele, tunde kiki ngi di lunga kiá ni akua matumbu.

⁷ Anga u tunda kuenioko, u bokona mʼonzo ia muthu ki Judé dijina diê Tisiu dia Justu, mubhezi a Nzambi. Muenʼiú onzo iê ia zukama ni dilombe mua kexi mu bhezela o Jijudé.

⁸ Krispo, o dikota dia dilombe, anga u xikana ue ni dibhata diê dioso. Ni akua Korindo avulu evu, a xikana, anga a a batizala.

⁹ Ngana anga u ambela Phaulu ku nzoji mʼ usuku, uixi: Ku kale ni uôma, enda ni kutanga, kana ku di xibha.

¹⁰ Mukonda Eme ngala ni eie. Kana muthu u tena ku kubhanga kiaiibha; kuma mu mbongeʼ umu, Eme ngala-mu ni mundu uami uavulu.

¹¹ Paulu anga u bhanga muvu ni mbeji jisamanu mueniomo ni kulonga o maka ma Nzambi mu ʼaxaxe kâ.

¹² Kia kala-phe Ngalio nguvulu ia Akasia, Jijudé ji balukila Phaulu kumoxi, anga a mu bheka katé bhu kibhuna kia milonga,

¹³ exi: Muthu iú mukua kubhomba athu phala Nzambi a mu bheze kiengi, ki kiene kia tumu Sezalu.

¹⁴ Phaulu-phe ki andekele o kuzuela, Ngalio u ambela Jijudé, uixi: Se mu ejiie kidi ni mulonga ua ufumbe, mba usueia, enu mu Jijudé, eme nga fuamene ngi xididika ni ku mʼivua.

¹⁵ Maji o ki mu edi maka a mambu, ni majina, ni utuminu uenu mudienu, sokenu nakiu enu-enu, eme ki ngandala ngi fundisa maka kala iá!

¹⁶ Anga u a kaiesa bhu kibhuna kia milonga.

¹⁷ Ene oso anga a kuata Sosetene, dikota dia dilombe, anga a mu betela bhu kanga dia kibhuna kia milonga. Ngalio-phe, ima ioso iii, ka i suu.

Phaulu uia ku Efezo, ni ku Andiioka

¹⁸ Phaulu kia zubha kubhanga dingi izuua iavulu mu Korindo, ua xalesa jiphange, anga u di longa mu naviiu kuia ku Sídia, kumoxi ni Pidisila ni Akuila. O kuila kiluua a di longa mu naviiu, ua diangele-phe kubhuta muthue mu Sengeleia, kuma ua bhangele polomesa kua Nzambi (uadi dikangu, ua te hasa).

¹⁹ O kia kuaka bhu Efezo, Phaulu ua a xi bhenhobho Pidisila ni Akuila, muene-phe u bokona mu dilombe, hé u di kumbulula maka ni Jijudé.

²⁰ O kia mu bhingi kubhanga-nâ izuua, muène ua ditunu, hé u a xalesa, uixi: Nzambi se uandala hinu ngi mi sanga dingi.

²¹ Anga u di longa mu naviiu, u katuka mu Efezo.

²² O kia kuaka bhu Sezaleia, ua bande ku Jeluzaleme iú ua menekena o Ngeleja. Mu Jeluzaleme anga u kulumuka ku Andiioka ia Sídia.

²³ O kia zubha kubhanga thembu bhenhobho, u katuka, hé u bhita kʼ oxi ia Ngalata ni Filija ni kuendesa ididi ni kukolokotesa o jixibulu joso.

Apolo mu Efezo ni mu Korindo

²⁴ Kiki kueza Judé ku Efezo, dijina diê Apolo, mukua bhata ku Xandediia Muene uala mesene kuma uejiia kiambote o Madivulu ma Nzambi.

²⁵ Muene ua di longo kiá kiavulu o Njila ia Ngana, mu kuzuela u fulujuka mu nzumbi, anga u tanga, u longa ni uhete o imbamba ia Jezú, maji uejiia ngó o batizu ia Nzuá.

²⁶ Anga u kuata kutanga maka mu dilombe dia Jijudé ni kubhua uôma. O Pidisila-phe ni Akuila, kia mu ivu, a mu bheka bhuala ene mʼ onzo iâ, anga a mu zubhila ku mu lomboluela kiambote o Njila ia Nzambi.

²⁷ O kioso Apolo kia mesena kuzauka ku Akaia, jiphange mu Efezo ja mu kuatekesa, anga a sonekena jixibulu koko phala ku mu tambulula. Muene kia bhixila koko, ua a kuatekesa kiavulu oso a xikana mu kiadi kia Nzambi.

²⁸ Kuma Jijudé ua ji belesa jinga kiavulu ku maka bhu nangu dia mundu, mukonda u idikiza mu Madivulu ma Nzambi kuma Jezú muène Kristu.