Jipoxolo 13 - O Mikanda Ikola

Barnabé ni Saúlu a a tuma ku ukunji

¹ Kikki-phe mu Andiioka, mu Ngeleja mueniomo, mu kala jipolofeta ni alongixi iá: Barnabé, ni Ximinhá a mu edi Muxiketedi, ni Lúsiu mukua Silene, ni Manahene a mu sasa kumoxi ni Helode dia tetalaku, ni Saúlu.

² Kizuua kimoxi, o ki a kala mu bheza Ngana, ni mu kujila, Nzumbi Ikôla uixi: Ngi tunguidienu mu akuâ, Barnabé ni Saúlu, aie mu sedivisu ioso i nga exanena kubhanga.

³ Kieniokio, kia zubha kujila ni kusamba, a tula maku ku thandu dia Barnabé ni Saúlu, anga a a sulula.

Aia ku Xipele. Elimase, mukua uanga

⁴ Barnabé ni Saúlu-phe, kia a katula Nzumbi Ikôlʼ iki, a kulumuka ku Seleuxa, kuenioko anga a di longa mu naviiu, a zauka katé ku Xipele.

⁵ Kia kuaka mu mbonge ia Salamina, a longa maka ma Nzambi mu malombe ma Jijudé. Nzuá, a mu ixana ue Marku, anga u kala mukuatekexi uâ.

⁶ Ene anga a tandulula o kikolo kioso katé ku Pafu. Kuenioko a sangaku mukua uanga, polofeta ia makutu—Judé, dijina diê Bale-Jezú.

⁷ Muen iú anga u kala dikamba dia nguvulu Serju Phaulu, muthu ua kilunji. Nguvulu anga u tuma kuixana Barnabé ni Saúlu, u mesena u ivua maka ma Nzambi.

⁸ Maji Elimase-phe, mukua uanga, kuma diene o dijina diê mu ku di lombolola mu ngeleku, u a fudisa, u sota kufunhisa nguvulu phala a kambe kuxikana.

⁹ Saúlu-phe, a mu ixana ue Phaulu, uezala ni Nzumbi Ikôla anga u mu toka mesu,

¹⁰ uixi: Monʼ a Diabhu! Eie uezala mangonha ni uloji! U nguma ia ima ioso iambote ni kidi! Eie kifua nuka dingi u fula kubhengeleka o jinjila ja kidi ja Ngana?

¹¹ Kiki-phe, talesa, lukuaku lua Ngana lua ku tula. Uandu bhanga thembu ku ufofo, dikumbi ku di mono. Mu ʼanzanzʼ omo Elimase uivua mu mesu mua mu tuluka kavunda ni usuku, anga u andeka kujingujuka ni kubabajala mu kusota uoso u mu kuata mu lukuaku.

¹² O nguvulu-phe kia mono kioso kia bhange, u xikana, kuma ua diuana o ulongelu ua Ngana.

Phaulu u longa maka mu Andiioka ia Pizidia. O kuẋinuka kua Jijudé

¹³ Kiki Phaulu ni akuâ a di longela mu Pafu, anga a zauka katé ku Peleje mu Pamfidia. Nzuá dia Marku, anga u a xa bheniobho, hé u vutuka ku Jeluzaleme.

¹⁴ Ene-phe a bhitakena mu Peleje, hé a bhixila ku Andiioka mu Pizidia. Mu kizuua kia sabhalu anga a bokona mu dilombe dia Jijudé, anga a xikama.

¹⁵ Kiabhu o kutanga mu Kitumu kia Mozé ni mu jipolofeta, makota ma dilombe a tuma kua ambela, exi: Enu mu akuetu, athu se muambe ku a tela maka ma kulonga, kindala zuelenu.

¹⁶ Phaulu anga uimana, u a batela ni lukuaku, uixi: Enu akuâ Izalaiele, ni enu oso mu akua ʼxi jengi muala mumu mu bheza Nzambi, ivenu:

¹⁷ O Nzambi ia mundu iú ua Izalaiele ua sola jitata jetu, iú ua sokolola mundu uâ kia kexile hanji mu inhunginu iâ, mʼ oxi ia Ijitu, anga u a katula momo ni lukuaku luasuina.

¹⁸ Anga u tenesa makuinhi a uana a mivu ni kulendukila o kubhuma kuâ mu kikangalakata.

¹⁹ O kia zubha kubuikisa sambuadi dia ifuẋi mʼ oxi ia Kanana, oxi ua a bhana-iu ku i lundula mu hâma jiuana ja muvu ni makuinhi a tanu.

²⁰ Kia bhiti imʼ iii ua a bhana afundixi katé bhua Samuuele, polofeta.

²¹ O mundu kia bhingi sobha, Nzambi u a bhana Saúlu mona Kiji, mukua muiji ua Bejami, hé u bhanga makuinhi a uana a muvu ni ku a tumina.

²² Kia mu katula-ku, Nzambi ua zangeleka Davidi kukala sobha iâ. Anga u mu kalela mbangi, uixi: Nga bongo Davidi, mona Jese, muthu ua ngi zelela ku muẋima, u bhanga ima iami ioso i ngandala.

²³ Ku mbutu ia Davidi, Nzambi uila kia bhele kizuelu, ua bheka-ku o Kibhamuenhu kia Izalaiele, muène Jezú.

²⁴ Kuila Jezú kiluua a zubha kuiza, Nzuá dia Batizu ua mu tuamenena, ni kulonga o batizu ia kudiela ku mundu uoso ua Izalaiele.

²⁵ Maji o Nzuá kioso kia kala mu kuzubha o thembu iê, u tangela o mundu, uixi: Enu mua fika kuma eme nanhi? Eme ki eme ió muene ku mu kinga. Maji talenu! Muène iú uiza ku dima diami. Muenʼió eme ki ngi fuama ngó, né kiá ku mu zozesela o jihaji jê ku inama.

²⁶ Phaulu anga u zuela dingi, uixi: Enu phange jami, mu ana kixina kia Mbalahamu, ni enu oso ki mu Jijudé maji mua xila Nzambi, makʼ ama ma kubhuluka ma tu kane etu-ene oso.

²⁷ Kuma ió a tungu mu Jeluzaleme ni afundixiʼâ ka tongoloka kuma Jezú muene o Mubhuludi. O maka ue ma jipolofeta ki ma a tetulukila, sumbala ene ku ma tanga izuua ioso mu jisabhalu. Maji né kieniokio, mu kuelêsa Jezú mizambu ia jipolofeta a i kumbidila, sè ku kʼ ijiia.

²⁸ Mukonda sumbala ka mu mono ni kikuma ki tokala ku mu fisa, a bhomba Pilatu phala na tume ku mu jibha.

²⁹ O kia zubha ku mu bhanga ima ioso ia mu soneka jinga mu Madivulu Makôla, a mu tulula ku dikulusu, hé a mu tula mu mbila.

³⁰ Maji Nzambi-phe ua mu fukununa.

³¹ Muène anga u tukulukila mu izuua iavulu kua ió oso a tundile-nê ku Ngalileia, hé eza-nê mu Jeluzaleme. Kiki ene ala jimbangi ja Jezú bhu pholo ia mundu ua Izalaiele.

³² Etu-phe tueza ku mi bhana Jingolokela Jambote, kuma o kizuelu kia bhele ku jitata,

³³ Kiki Nzambi ua ki kumbidila ko-kuetu etu tu anʼ â, mu kufukununa Jezú. Kiene kia ki sonekena mu Salamu ia kaiadi, exi: eie u Monʼ ami, lelu muene nga ku vuala.

³⁴ Kieniki kiene kia tange Nzambi, mu kufukununa Jezú ku ʼalunga, iú uambe kuila katena dingi kuvutuka mu kusekumuka, mukonda uambe dingi kiki: Eme nga kà mi bhana jimbote ji nga lekelela Davidi, ki jene kufula.

³⁵ Mukonda ni mu Salamu iamukuâ uambe uixi: Muthu uê uangene, Eie kuanda ku mu ehelela kusekumuka.

³⁶ Kuma ni kidi, Davidi kia zubha ku di tuma ni Ngana ku muiji uê, uaia ku kilu, iá a mu tula ni jitata jê. Kalunga ka mu sekumuna muene.

³⁷ Maji o iú-phe a mu fukununa kuala Nzambi, kalunga ki ka tena ku mu sekumuna.

³⁸ Ki tualʼ iki, ijiienu-kiu, akuetu, phange jami, kuma a mi tudila muloloko ua ituxi mu dijina dia Jezú iú.

³⁹ Uoso u xikana, u lungila kua muène ku imbamba ioso i bhinga o Kitumu kia Mozé ki ki tena ku mu lungisa.

⁴⁰ Alukenu-phe, ki ki mi bhite kia soneka mu jipolofeta, exi:

⁴¹ Talesenu, enu muene mu kutobhesa ioso, muanda kukakuka anga mu jikinina! Kuma o kikalakalu ki nga mu bhanga mu izuua ienu kikalakalu enu ki mu ki xikina, né-mbe hanji bhu kala muthu u mi ambela-kiu ue.

⁴² O kia kala Phaulu ni Barnabé mu kutunda, a a dionda ku a tangela makʼ ama mu sabhalu iamukuâ ianda kuizaku.

⁴³ Kiki kia muangana athu mu dilombe, Jijudé javulu, ni alungi ene kubheza-nâ, a kaiela Phaulu ni Barnabé, ene anga a zuela-nâ, a a longesa o kukolokota mu kiadi kia Nzambi.

⁴⁴ Kutula mu sabhalu iamukuâ, ku kamba ngó kofele mu mbonge ioso ku di bhongolola mu kuivua o maka ma Nzambi.

⁴⁵ Jijudé-phe kia mono o mundu uavu-lu kiki, a kala ni dixinga dionène. Ima iala kutanga Phaulu, a mu kuatesa makutu, a mu xinga.

⁴⁶ Phaulu ni Barnabé-phe anga mu kuzuela a beta dingi kubhua uôma, exi: Kia bhingile a mi dianga enu mu Jijudé ku mi tangela o maka ma Nzambi. Kuma-phe enu mua mu tènde, ki mu di mono kufamena o muenhu ki uabhua, etu tu lungulukʼ Ó, tu zuela kiá ni akua ʼxi jengi.

⁴⁷ Kuma kiene kia tu tumu Ngana, uixi: Eme nga ku xikika mu kukala u mukengeji ua akua matumbu, eie ua ka bheke mu ngongo ioso o kubhuluka, katé ku maẋokololo.

⁴⁸ Akuaʼ ʼxi jengi ki evu kiki, a kala ni ngalasa iavulu, hé a ximana o maka ma Nzambi. Oso-phe a a sola, a fuamena o muenhu ki uabhua, anga a xikana.

⁴⁹ O maka ma Ngana anga ma sambuka mʼ oxi iosuʼ oio.

⁵⁰ Jijudé-phe ji funhisa ahatu a jingana, ene kubhezanâ, ni adiakime a makota mu mbonge, hé a kuata kuzukutisa Phaulu ni Barnabé, anga a a kaiesa mu mbambe jâ.

⁵¹ Jipoxolo ene-phe, a a kukumuina o fufuta ia inama iâ, anga aia ku Ikônio.

⁵² Maji o jixibulu-phe mu Andiioka jezala ni ngalasa iavulu ni Nzumbi Ikôla.