Jipoxolo 12 - O Mikanda Ikola

Helode u jibhisa Tiiaku

¹ Kiki bhu thembu ieneʼ oio, sobha Helode u sununa maku mê mu kutatesa o athu ku Ngeleja.

² Anga u tuma ku jibhisa Tiiaku, phange ia Nzuá, ku xibhata.

³ O kia mono kuma kia uabhela Jijudé, u tona kukuata Phetele. Mueniomo mu izuua ia Fesa ia Jimbolo ja Kambe Kithuthume,

⁴ Kia zubha ku mu kuata, Helode u mu ta mu ʼaleia, hé u mu bhakula ku ibuka iuana ia masoladi ia kiuana-kiuana, phala ku mu inga. Oko Helode ua fika kuila ki zubha o Phasu kubhita, u mu katula nʼ a mu bheke bhu pholo ia mundu.

⁵ Kienʼiki Phetele a mu jikila mu ʼaleia, ni ku mu langa ku masoladi. Maji o Ngeleja-phe a mu sambela kua Ngana ni kujiza.

Phetele a mu katula mu ʼaleia

⁶ Kutula mu usuku, ua kuila kimene kiê Helode uanda ku mu katula nʼa mu bheke bhu pholo ia mundu, Phetele u kala ku kilu ni masoladi maiadi a mu bhake bhu kaxi. Muene a mu jika malubhambu maiadi, ni alangi bhu kanga a lange o dibhitu dia kaleia.

⁷ Talesa-phe, bhu mbandu iê bhu imana anju ia Ngana, mu kaleia mu di muika mukengeji. Anju anga i bhana Phetele huxi mu jimbanji, u mu phaphumuna, uixi: Lenguluka, u balumuke! Malubhambu mê anga ma mu zuluka mu maku.

⁸ Anju anga i mu ambela, iexi: Dikute o phonda, u zuate jihaii. Phetele anga u ki bhanga. Uixi: Difute o mulele, u ngi kaiele!

⁹ Phetele anga u tunda mu ʼaleia u kaiela o anju. Maji ka kʼ ijiia kuma kia bhiti ku luelu kia bhange o anju. Inda ua fika ku nzoji kuala.

¹⁰ Kia zubha kusomboka alangidi adianga, ni a kaiadi, a bhixila bhu dibhiti dia felu dia kutundila mu luua ia mbonge. Dibhitu anga di di jikula diene, ene a tunda, anga enda luua imoxi, mu ʼanzanzʼ omo anga anju i mu jimuka ku mesu, muene ua xala bhobho.

¹¹ Phetele kia zubha kuphaphumuka, uixi: Kindala nga kʼ ijiia kiá kuma ku luelu muene ni kidi! Ngana ua tumu o anju iê, ua ngi kudila bhu maku ma Helode, iú ua kakula mundu ua Jijudé, ku kioso kiambele ku ngi bhanga.

¹² Phetele kia sunga kilunji, u di tela ku onzo ia Madiia, mamʼ â Nzuá, jina diê diamukuâ Marku. Kueneʼoko kua bhongoloka athu avulu ala mu samba.

¹³ Muène kia ṗhuṗha ku dibhitu dia luua, kueza mona kilumba mu kuividila, mukalakadi mueneʼomo, dijina diê Lode.

¹⁴ O ki evu dizui dia Phetele, dibhitu ka di jikula dingi, mukonda dia ngalasa, u vutuka mʼ onzo ni lusolo, u a tangela kuma Phetele uemana bhu kanga.

¹⁵ Ene a mu ambela, exi: Eie ua tekuka! Muène-phe ua ki jijila, uixi: Kidi kiene! Exi-phe: Hé kiene, o anju iê!

¹⁶ Phetele-phe hanji iú ṗhuṗha. Bhenhobho anga a jikula o dibhitu. O kia mu mono kuila Phetele muene, a diuana!

¹⁷ Muène ua a batela ni lúkuaku phala a di xibhe, anga u a kundila kioso Ngana kia mu katula mu ʼaleia. Uixi: Imʼ iii kundilenu-iu Tiiaku ni jiphange. Anga u katuka, uia kididi kiengi.

¹⁸ Kiki-phe, ki kuákie, ku kala kavanza ka dikota ku masoladi mukonda kioso kia axi Phetele ka kʼ ijiia.

¹⁹ Kia tumu ku mu sota Helode, anga a lémbua ku mu mona, u tokuesa alangi, anga u tuma ku a jibha. Kia bhiti imʼ iii, Helode u xa mu Judeia, anga u kulumuka ku Sezaleia, hé u nakina kuenioko.

O ufuilu ua Helode

²⁰ Helode muene-phe ua luualela kiavulu akua Tilu ni Sidonha. Ene anga a di kasa, eza kumoxi kibuka kia muvimba phala ku mu hindula. A dianga-phe ku kuata ukamba ni Balaxtu dikota dia mukalakadi ua sobha, ua tambula konda ia hâma iê. Anga aia kiua katé kua soba Helode, hé a mu dionda kuditambulula-nâ ku paze, mukonda o ku makudia, oxi iâ ia bhindumukina ku oxi ia sobha.

²¹ Helode anga u a xindila o kizuua kia ku di mona-nâ. Ku tula bhu kizuua kia tokala, Helode u zuata, hé u di lumbila ijingu ia ungana, u xikama bhu kiandu, u a tela maka.

²² O mundu anga a di kola, exi: Iú ua mu zuela, Nzambi, ki muthu kana!

²³ Mu kithanganʼokio, anju ia Ngana i mu kuama, mukonda ua kambe kujingisa Nzambi; anga u diua ku mabhuka, u zubhidisa.

²⁴ Maka ma Ngana-phe ma sambuka, mʼaia ni kusokoloka dingi.

²⁵ Barnabé ni Saúlu anga a vutuka, a tunda ku Jeluzaleme, kia zubha kuku o ukunji uâ ua kubhindumuna; anga a bhitula-ku Nzuá, jina diê diamukuâ Marku.