Jipoxolo 11 - O Mikanda Ikola

Phetele kia mu ibhula o batizu ia Koloneliu, u di lungisa bhu pholo ia Ngeleja

¹ Kiki jipoxolo ni jiphange ku Judeia a kʼ ivua kuila akua matumbu a tambula ue o maka ma Nzambi.

² O kia bhixila Phetele mu Jeluzaleme, enʼió a jijila o kifua kia kusaia a funda-nê,

³ exi: Eie ua bokona, iá a ku langeka mʼ onzo ia akua matumbu, ka a saie, katé uadi-nâ ue kumoxi!

⁴ Phetele-phe u matekena bhua tundu o maka, u tanga ioso, anga u a lomboluela, uixi:

⁵ Eme nga kexile mu mbonge ia Jopa mu kusamba, anga ngiia ku kiambu. Ngi mona kisumua, mu diulu mua tuluka kima kiedi kala kidilasola, a ki zoza ni jipondo jê jiuana, katé bhuoso bhu ngala eme.

⁶ Ki nga zambula o mesu, ngixi-mu sûi, muala jixitu joso jenda ni inama iuana, ni iama, ni ibamba i zanzala bhoxi, ni jinjila ji bhita bhulu.

⁷ Ngevu ue dizui, dixi: Phetele, balumuka, u jibhe, u die!

⁸ Ngixi-phe: Ki ki xikina, Ngana! Eme kana kima kiaiibha mba kiaxidi kia ngi bhiti luua mu kanu!

⁹ Dizui ku diulu anga di ngi kumbulula dingi, dixi: Kia zelesa Nzambi, eie kuile uixi kia xidi.

¹⁰ Kienʼiki anga a ki bhanga lutatu; iene ioso anga a i sunga dingi mu diulu.

¹¹ Kithanganʼ okio-phe, talesenu, mala a tatu a tula bhu kanga dia ʼnzu mu tuala, a a katula ku Sezaleia, a ngi kane eme muène.

¹² O Nzumbi ia Nzambi anga u ngi longesa kuia-nâ, uixi: Kana kuta-bhu phata. Ni jiphange jisamanuʼiji, akua Jopa ele ku ngi bheka, anga tu bokona mʼ onzo ia Koloneliu muthu ua ngi tumu.

¹³ Muène anga u tu kunda ue kuma anju ia mu tukulukila mʼ onzo iê, iexi: Tuma muthu ku Jopa, a takane-ku diiala a mu ixana Ximá, jina diê diamukuâ Phetele.

¹⁴ Muène u ku tangela o maka ma ku bhekela kubhuluka, ni eiemuène ni dibhata diê dioso.

¹⁵ O ki nga kuata o kuzuela, Nzumbi Ikôla ua tuluka ku thandu diâ, uila kia diangele kutuluka ku thandu dietu.

¹⁶ Anga ngi lembalala maka ma Ngana, kia tangele, uixi: Nzuá ua mi batizala muene ni menha, maji enu-phe hinu a batizala ni Nzumbi Ikôla.

¹⁷ O ki kala ió ki Jijudé Nzambi ua a bhange ujitu uila kia tu bhange-u etu, kioso ki tua xikana Ngana Jezú Kristu, emiʼeme nanhi ngi fudisa Nzambi?

¹⁸ Ene kia zubha kuivua imʼ iii, phata iabhu. Anga a ximana Nzambi, exi: Manhi ni akua matumbu uâ Nzambi ua a bhana o kudiela, nʼamone o muenhu ki uabhua!

Njimbu Iambote i sambuka ku Andiioka

¹⁹ Kienʼiki ió oso a kexi mu kaiela Jezú a muangana mukonda dia hadi iejile-ku kua Xitevá. Amoxi-mu aia ni kuenda katé ku Fenisia, ni ku Xipele, ni ku Andiioka, o maka ma Nzambi ala ku ma tela Jijudé ngó.

²⁰ Maji amoximu-phe mudiâ, akua Xipele ni Silene, ki a bhixila mu Andiioka, a zuelela ue ió ki Jijudé, anga a a tudila o Njimbu Iambote ia Ngana Jezú.

²¹ O lukuaku lua Ngana anga lu kala-nâ, athu avulu hé a xikana, anga a biluka kua Ngana.

²² O fuma iâ anga i bhixila ku matui ma Ngeleja mu Jeluzaleme, anga a katula Barnabé, hé a mu tuma ku Andiioka.

²³ Muene kia zubha kutula, anga u mona kiadi kia Nzambi ku athu ió, u kala ni ngalasa iavulu. Anga u a suinisa ene oso kuma a kolokote kuenda mu kidi ni Ngana, ni kutetuluka kua muẋima.

²⁴ Kuma o Barnabé muene muthu ua mbote uezala Nzumbi Ikôla ni kuxikana. Anga ku di banda athu avulu kua Ngana.

²⁵ Muene iú ua katuka kuia ku Talasu mu sota Saúlu; o kia zubha ku mu sanga, uiza-nê ku Andiioka.

²⁶ Mu kukala-kukala-phe anga a bhanga muvu ua muvimba ni ku di bhongolola ni mundu ua Ngeleja ieneʼ oio, hé a longa athu avulu. Momo, mu Andiioka, muene mua dianga athu kuiuka jixibulu ja Jezú o dijina dia Jikidistá.

²⁷ Kiki mu izuuʼ omo ku tunda jipolofeta ku Jeluzaleme, eza ku Andiioka.

²⁸ Mudiâ anga mu kala muthu dijina diê Akabu, uimana, hé u tuma kuijidisa ni kutena kua Nzumbi Iambote kuma, kuanda ku kala nzala ia dikota mu ngongo ioso. O nzalʼ iii ia bhiti mu izuua ia kexi mu tumina Kaláudio.

²⁹ Kieniokio jixibulu joso, kala muthu kioso kia soko na-kiu, a sola kusanga ngasu ia kutuma kubindumuna jiphange ja tungu mu Judeia.

³⁰ Anga a ki bhanga, o kitadi a ki tumikisa adiakimi a Ngeleja; ki endela ku maku ma Saúlu ni Barnabé.