Jipoxolo 10 - O Mikanda Ikola

Kabhitangu Koloneliu

¹ Kiki mu kala muthu mu Sezaleia, dijina diê Koloneliu, kabhitangu ka kompaniia a ixana ia Itália.

² Muène mubhezi, muthu ua ujitu, u xila Nzambi ni dibhata diê dioso. Mukua kubhana jimola javulu mu kukuatekesa o Jijudé, oso ala jingadiama, ni kusambela jinga Nzambi.

³ Muene u mona kisuma ku mesu mazele, mu ola ia kàvua ku kizuua, (o ola ia katatu ku kiemba) anju ia Nzambi ia mu tukulukila, uixi: Koloneliu!

⁴ O muène kia mu edi sûi, ni uôma ua mu kuata, uixi: Kiebhi, Ngana! Uixi, Nzambi uevu o misambu ié, ni jimola jé ji uene mu bhana o jingadiama, ja bande kuma dilembalelu bhu pholo ia Nzambi.

⁵ Kiki-phe tuma athu ku Jopa kutakana-ku muthu Ximá, uala dingi ni dijina dia Phetele.

⁶ Muène a mu langeka kuala Ximá dia muteki a ibha, uavu inzu iê iala bhu mbandu ia kalunga. Muène ua kà ku tangela kioso ki ua fuama kubhanga.

⁷ Kia zubha anju ia mu zuelesa kutunda-bhu, muène uexana mala aiadi ku akua mbele, ni disoladi dimoxi. O disoladi iú, mubhezi, muthu ua ujitu kua ió ala ku mu sedivila jinga.

⁸ O kia a jimbuila maka moso ʼama, u a tuma ku Jopa.

⁹ Kukia ni kimene-phe, kioso ki ala mu njila, a zukama kiá mu mbonge ia Jopa, Phetele u banda ku thandu dia ʼnzo mu kusamba mu ola ia mediia.

¹⁰ Phetele nzala anga i mu kuata, uinda kudia. Kioso-phe ki ala ku mu telekela, uia ku kiambu.

¹¹ Anga u mona diulu dia jikuka, kuala mu tuluka kima kiedi kala kidilasola ala ku ki zoza ku pondo jê jiuana katé bhoxi.

¹² Muenhumu anga mu kala mbutu joso ja jixitu jenda ni inama iuana, ni ibamba i zanzala bhoxi, ni jinjila ji bhita bhulu.

¹³ Anga Phetele uivua dizui dixi: Balumuka, Phetele, u jibhe, u die!

¹⁴ Phetele-phe, uixi: Ki ki xikina, Ngana!—Eme kiluua ngi dia kima kiaiibha mba kiaxidi!

¹⁵ O dizui anga u dʼ ivua lua kaiadi, dixi: Kia zelesa Nzambi, eie ku ile uixi kiaxidi.

¹⁶ Kiki anga a ki bhanga lutatu. Kithanganʼ okio o kidilasola anga a ki sunga dingi mu diulu.

¹⁷ Kiosuiki Phetele kia kala ku phata mba kisumuʼiki, kia mono, ki tokala ki longa-hi, talesa, athu a a tumu kuala Koleneliu ebhudisa kiá mba onzo ia Ximá i tokala kukala kuebhi, a tula bhu kanga.

¹⁸ Anga exana muthu ua tokala mʼonzo ieneʼoio, a mu ibhula se Ximá, jina diê dia mukua Phetele, mba a mu langeka muenhomo.

¹⁹ Kioso hanji kia kuata Phetele kuxinganeka o kisumua, Nzumbi Iambote ia mu ambela, iexi: Ivua! Talesa, mala atatu ió ala ku ku sota.

²⁰ Ndoko, u tuluke, uie-nâ, ku te-bhu phata, kuma Eme-muène nga a tumu.

²¹ Phetele anga u tuluka bhuala mala eneʼ â, uixi: Emʼ iú, mualu ngi sota. Kima kiahi kia mi bheka kunu?

²² Ene a vutula, exi: Kabhitangu Koloneliu muene ua tu tumu. Muène mubhezi a Nzambi, muthu uaiuka, u xila Nzambi, a mu tumbula ue kiambote kuala akua ʼxi ioso ia Jijudé. A mu longesa kuala anju ia Ngana, o ku ku tuma eie kuiza ku onzo iê, eie u mu tangele maka.

²³ Kieniokio-phe Phetele u a bokuesa mʼ onzo, hé u a langeka momo o usuku uenʼ ió. Ki kukia mu kimene, Phetele u katuka, hé uia-nâ. Anga kukala ue athu ku jiphange ja akua Jopa, aia-nê ku mu bheka.

²⁴ Mu kizuua kia kaiadi anga a bhixila mu Sezaleia, a sanga Koloneliu ua a xikamena kiá, ua bhongolola ue o jindandu jê ni makamba, iá ala kukinga Phetele.

²⁵ Kia kala Phetele mu kubokona, Koloneliu uia ku mu sangesa, u takana-nê, hé u mu fukamena bhu inama iê u mu bheza.

²⁶ Phetele-phe u mu balumuna, uixi: Imana! Eme ue ngi muthu ni mukuenu.

²⁷ O kia kala ku mu kunda, Phetele u bokona mʼ onzo, hé u sanga athu avu-lu a bhongoloka.

²⁸ Anga ua ambela, uixi: Enu mua kʼ ijiia kuma muthu uala Judé, a mu kidika o kukuata ukamba ni mukua ʼxi iengi, mba kubokona ngó mʼ onzo iê ni kubhongoloka-nê kumoxi. Maji eme-phe Nzambi ua ngʼ idikiza kuma ki ngâmbe dingi muthu kuiibha mba kuxila.

²⁹ Uila kiki, eme ki ngi te-bhu phata, enu ki mua ngi tumu. Ngebhula-phe kioso ki mua ngi tumina ku ngʼ ixana?

³⁰ Koloneliu, uixi: Lelu uana kizuua tunde ki nga kexile mu ku kumbidila o ola ia katatu ia kusamba, ku kiemba Mu kumbi uila mueniumu, mʼ onzo iami, kua ngi tukulukila muthu ni izuatu ibenha,

³¹ uixi: Koloneliu, misambu ié Nzambi ua ivu iú ua lembalala ioso i uene kubhanga mu kukuatekesa o jingadiama.

³² Tuma-phe muthu ku Jopa a takane-ku diiala a mu ixana Ximá, jina diê diamukuâ Phetele. Muène a mu zalela mʼ onzo ia Ximá dia muteki a ibha, ua tungu bhu mbandu ia kalunga.

³³ Eme nga lenguluka o ku ku tuma; eie ue ua bhange kiambote ki ueza. O kikiphe etu oso tua bhongoloka bhabha ku mesu ma Nzambi, mu kuivua ima ioso ia ku tumu Ngana o kuzuela.

Phetele u tanga o Njimbu Iambote

³⁴ Phetele anga u kuata kuzuela, uixi: Kia kidi kiene, nga mono kuma Nzambi kene ni kathombo ka athu.

³⁵ Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.

³⁶ Enu muejiia kuma muene ua tumikisa maka ku ana a Izalaiele, o Njimbu Iambote ia paze ia kolele Jezú Kristu, muène Ngana ia mundu uoso.

³⁷ Makʼ ama enʼuenu mua ejiia, a fumana mu Judeia ioso, tunde ku Ngalileia, kia bhiti o batizu ia kolele Nzuá.

³⁸ Muejiia ue o maka ma Jezú dia Nazalé, kioso Nzambi kia mu undu ni Nzumbi Ikôla, iú ua mu bhana ni kutena. Muène anga u nhunga ku mbandu joso ni kubhanga o mbote, ni kusaka oso a a tatesa kuala Diabhu, kuma Nzambi uala-nê.

³⁹ Etu tuala tu jimbangi ja ima ioso Muene ia bhangele ni mʼ oxi ia Jijudé ni mu Jeluzaleme. Ene-phe a mu jibha, ni ku mu nhenga ku dikulusu.

⁴⁰ Maji Muène, Nzambi ua mu fukununa mu kizuua kia katatu, anga u mu tukulula ko-kuetu.

⁴¹ Muène ka mu tukuluila bhu pholo ia mundu uoso, maji bhu pholo ietu ngó tu jimbangi ja sola Nzambi. Etu-ene, tua di-nê, tua nu-nê kumoxi, kia zubha kuvutuka ku ʼalunga.

⁴² Muène iú ua tu tendelela kutula o Njimbu Iambote ku mundu, ni kubhana umbangi kuma Muène a mu lekela kuala Nzambi kukala Mufundixi ua athu a muenhu ni madifundu.

⁴³ Muenʼiú ni jipolofeta joso ja mu kala jimbangi, kuma ene a mu tange kuila uoso u mu xikana, u tambula muloloko ua ituxi mu dijina diê.

Akua jixi jengi a tambula Nzumbi Ikôla

⁴⁴ Kioso Phetele ki ala hanji mu zuela kiki, Nzumbi Ikôla u tuluka ku thandu dia oso a kexi mu kuivua o maka.

⁴⁵ O Jijudé, iá a xikana kiá, a tokala mu kifua kia kusaia, eza kubheka Phetele, a diuana, mu kumona kuma Nzambi ni akua matumbu ue ua a bhange ujitu ua ku a bhana Nzumbi Ikôla ku thandu diâ.

⁴⁶ Kuma ene a evu kuzuela ni madimi mengi, ni kujingisa unene ua Nzambi. Phetele anga u kumbulula, uixi:

⁴⁷ Manhi bhuala muthu u tena kukidika menha ma kubatizala iá a tambula ue o Nzumbi Ikôla mukuâ ni etu-ene?

⁴⁸ Anga u tuma ku a batizala mu dijina dia Jezú Kristu. Kia bhiti kiki, ene anga a dionda Phetele kuinduluka-nâ tu izuua.