Jihebeleu 1 - O Mikanda Ikola

Kristu kuma Monʼ a Nzambi, uala kota, ji-anju ndenge

¹ Nzambi, ua vudile jithembu ni jimoda ja kuzuelela o jitata jetu mʼ ukulu ku jipolofeta.

² Maji kunu kua suku o izuua, ua tu zuelela kua Monʼê. O mua Monʼê, Nzambi muène mua bhangela o ima ioso iene mu ngongo.

³ O Mona, muène o kimuikinu kia kubenha kua Nzambi, muène ue kilomboluelu kia kidifua kiê, muène u kuatesa o ima ioso mu ngongo, ni kizuelu kia nguzu iê. O kia zubha kuzelesa athu ku ituxi iâ, iú ua xikama ku diulu, ku lukuaku lua kudia, lua Nzambi Tata Uatena ioso.

O Mona ni ji-anju

⁴ O Mona iú uala kota ku kijingu, ji-anju ndenge, kiene ue Nzambi kia mu lukila o dijina dia beta kota ku ujitu, o ene ndenge.

⁵ Kuma anju kuẋi, Nzambi iambelele uixi: Eie u monʼ ami, lelu muene nga di bhange ngi Tata ié. Kana-ku ue anju iambelele uixi: Eme ngi kala ngi Tatʼ enu, eie u kala u monʼ ami?

⁶ Kioso Nzambi kia tumikisa ue o Thungunu iê mu ngongo, uixi: O ji-anju joso ja Nzambi ji mu bheze.

⁷ O mu ku tanga o ji-anju-phe, Nzambi, uixi: Nzambi ua bhangesa ji-anju jê kubiluka kitembu, o akua-mbele iê, mulengu ua tubhia.

⁸ Maji o kua Monʼê, muene uixi: O kiandu kié, eie u Nzambi, kienié katé ku hádia ni hádia! Eie o Utuminu ué, ua kà uendesa ni mbasá ia kuiuka.

⁹ Eie o kuiuka ua ku zola, usueia ua u zemba. Mukonda dia kiki, Nzambi, Ngana Nzambi ié, kiene kia ku solela, iu ua ku undu ni maji ma ngalasa, ni kijingu, akuenu oso ndenge.

¹⁰ Muène ue uixi dingi: Eie Ngana, ku dimatekenu ua bhangele oxi, o maulu ua ma kalakala ni maku mé eie-muène.

¹¹ Oxi ni diulu ia kà buika, eie-phe ua kà xalela-ku. Ia kà kuka mukua ni kizuatu.

¹² Eie muène ua kà i futa-futa kala dibeka, ua kà i lungulula kiengi, kala kizuatu. Eie-phe eie-muène umoxi, kuene ku kuka, lémbua.

¹³ Ku ji-anju-phe, Nzambi anju kuẋi iambelele uixi: Xikama ku madilu mami, katé ki ngi ku bhanga kuila jinguma jé ji kala bangu bhoxi dia inama ié.

¹⁴ O kiki-phe, ji-anju kima kiahi bhu pholo iê? Ene oso ala jinzumbi ji sedivila, a a tumu ku sedivisu mukonda dia ibhinganu ia tokala o kubhuluka.