Jelemiia 9 - O Mikanda Ikola

¹ Tamanu mútue uami ua bilukile menha, o mesu mami ma bilukile fiẋi ia masoxi! Kienhokio ngeju dila imbi ia kilumba kia mundu uami, muanha ni usuku.

² Tamanu mu kikangalakata mua kexile kisasamba kia jingenji-a-thumba! hinu ngeji kuxa o mundu uami, inga nga a sondoloka, mukonda ene oso ala ati a jiphanda, ala ue kilunga kia jiphèke-phèke mu jiphèke-phèke.

³ Oleka o dimi diâ kala uene o mufula uâ, mu kuta o makutu; a di suinisa maji ki phala o kidi, kana: mukonda a muia dingi ku pholo ni kubhanga usuéia mu usuéia, eme a lémbua ku ngʼijiia, Jihova ua ki tange.

⁴ Muthu ni muthu a di lange ku dikamba diê, kana ue kudielela phange ioso-ioso; kuma phange joso muene a mu bhanga ngó mangonha kuabhu; o makamba oso enda ni kutatela.

⁵ Muthu ni muthu u bhanga mukuá kasekelu, ka zuela kidi, lémbue: dimi diâ a di longesa kuzuela o makutu; a di bhuidisa muene ni kubhanga ima ia iibha.

⁶ Eie-phe ua tungu muʼaxaxi ka mangonha; o mu mangonha mâ a di tunuʼâ muene ku ngʼijiia, Jihova ua ki tange.

⁷ Kala kiki, Jihova dia Ilombo Ieta uambe, uixi: Talesa-ze, eme nga-nda ku a zunza, anga nga a lola; mukonda-phe, o kilumba kia mundu uami ngeji ku bhanga-nê dingi kiebhi?

⁸ O dimi diâ mukuá ni musongo a uasela kujibha; a zuela ni kádia; kia zuela ni mukuá dikanu diê di tanga ima ia uembu, maji o moxi dia muẋima uê-phe ua mu olekela mibhetu.

⁹ Manhi mu ima íii ngeji ku i talela ngó sé ku i bhesa njumbu, Eme Jihova? inga muenhu uami u kamba kuvutula phonzo ku athu kala iá?

¹⁰ Ku milundu ngi tela-ku nzongo ia ku dila, mu ididi i dila o ibhaku mu kikangalakata ngi tela-mu jingololo; kuma mua jikata kiá, u bhita-mu ka moneka dingi; ki muala dingi ku tunda kukoma kua ibhaku; tundé ku jinjila ja bhulu, tulé ku iama, edi o bunganʼéel … ia a lenge-mu!

¹¹ Jeluzaleme-phe nga-nda ku mu kitula jindunji ja matadi, dibhata dia midikixi, o madiembu ue mu Juda, ngi maxa jingundu, katé ki mu kala dingi muthu u tunga-mu.

¹² Nanhi muene o njimu a tongolole kiki? Mukuahi a mu tangela maka kuala dikanu dia Jihova, nda a tene ku ki kunda? oxi ia buikilaʼhi kala kiki, i i ia jokota mukuá ni kikangalakata, mu mua bhingi né ngó muthu u bhitamuʼé?

¹³ Kuala Jihova uixi: Mukonda ngonge iami a i xi, i nga a tudila bhu pholo iâ, ia a kambe kubhana ue matui ku dízui diami, mba ngó kuendela-mu, nguâ.

¹⁴ O Kiala-bhu a kaiela ngó kia a tumu o muẋima uâ, ni kukaiela o mahamba ma Bale, ma a longesa kuala o jitata jâ.

¹⁵ Uila kiki, Jihova dia Ilombo Ieta, Nzambi ia Izalaiele, uambe uixi: talesa, mundu iú nga-nda ku u disa ima ia lulu; anga nga a bhana kunua menha ma ndululu.

¹⁶ Hé nga a muangena muʼaxaxi ka ifuẋi ene ka ijidile ngó, né ene né o jitata jâ, anga ngi tuma xibhata ku a kaiela, katé ki ia kà a jimisa o mbutu.

Mundu ua Jeluzaleme a di kola mu Kubhinga dikuatekesu

¹⁷ Jihova dia Ilombo Ieta, uambe kiki: Xinganekenu, muʼixane oso adidi-a-jithambi, nda eze; tumenu ue kusota ahatu a dilongo, nda eze uâ.

¹⁸ Alenguluke-phe, a zangule ngololo iâ mukonda dietu; nda mesu metu ma koboke mu kisoxi, o ibhebhetulu ietu i di zunze menha.

¹⁹ Kuma ku Ziione evu-ku dizui dia kudila: Etu tua sengulukʼó! Sonhi ja tu kuata kiavulu, mukonda ixi tua i xi, o ene mabhata metu iá a tu senguluila-nâ.

²⁰ Ivenu-ze, enu, mu ahatu, o kizuelu kia Jihova, o matui menu ma tambule kizuelu ki tunda mu kanu diê; nda mu longe anʼenu a ilumba o kudila, kala kilumba a longe mukuá o ku-ta jingololo.

²¹ Kuma kalunga ka sambela bhu jinjanena jetu, ka ka bokona mu mazemba metu, phala ku buba tuana mu jinzunga ni minzangala bhu itanda.

²² Zuela: Eme Jihova uambe kiki: Katé ni imbi ia athu, ia-nda kutakujuka kala ditobe mu mukáu ua dianeka, mukuá ni phunga ia kidima ia xala mua bhiti o mubhongolodi, o u i bhongolola ka moneka.

²³ Jihova uambe kiki: njimu ka di thathe mu unjimu uê, mba dizonda u di thatha mu uzonda uê; mvuama ka di thathe mu unvuama uê.

²⁴ Maji uoso uambe ku di thatha a di thathele mu kiki: Mu ku ngʼijiia eme ni kuijiia kuamba eme muene ngi Jihova, ngi mukua kulendukila muthu, ni kufundisa ni kubatula mu kidi mu ngongo; mbata ima ienhiʼii iene ia ngi uabhela, eme ngi Jihova.

²⁵ Talesa izuua ii iza, Jihova ua ki tange, uixi: nga-nda kubhana njumbu kua ia oso a a saie kumoxi ni oso a kambe ku a saia.

²⁶ Kua Ijitu ni Juda ni Idomo ni ana a Amone ni Mouabhe ni ianá a-kua ku batula thungi ia ndemba jâ, a tunga mu kikangalakata; mbata ifuẋi iosololo, eneʼâ ngó sé ku a saia, o dibhata dioso ue dia Izalaiele ka di saie o muẋima.