Jelemiia 8 - O Mikanda Ikola

¹ Mu kithanganʼomo, Jihova uixi: a kà vumbumuna ifuba ia jisobha ja Juda, ni ifuba ia ilamba iâ, ni ifuba ia jinganga, ni ifuba ia misesedi, ni ifuba ia jithunge ja Jelezaleme, hè a i bheka ku kanga dia jimbila jâ.

² Anga a i aneka ku muanha, ni ku mbeji ni ku ilombo ioso ia diulu, ia zolele ene, ia bhikila jinga, ia kaiela jinga, ia kexile mu kusota, ia a kexile ku i diundila: ka kà i ongeka, né ku i funda; ia kà xalela ngó mukua ni ditobe ku thanduʼa mavu.

³ Oso-phe o masubhu a kà subhuka ku muiji iú ua iibha, enhó a kʼènda o kufua o muenhu ka-nda ku uinda, oso a-nda kusubhuka mu ididi muoso mu nga a takuila, Jihova dia Ilombo Ieta ua ki tange.

Povo ia Nzambi ia baluka, a di kengela kibetu

⁴ A tangele dingi: Jihova uambe kiki: abha athu a di bhalelà-ku kiá, kene dingi ku balumuka? A bhambukilà-ku kiá, ka vutuka dingi?

⁵ Mundu iú, ua Jeluzaleme, a bhambukilaʼhi ni ku balukilà-ku kiá, anga endelela? a jijila kunganala, o ku biluka nguâ.

⁶ Eme ngʼevidila, eme ngevu: Kala kuzuela kia iuka; ki bhuala muthu u diela ku usuéia uê, uixi: Nga bhangʼehi? Kala muthu ni muthu u bhambuka mu njila iê, mukua ni kabalu ka di takula ni nguzu ku ita.

⁷ Katé ni dibanda bhulu, uejiia ithangana iê ia mu xindila; o diembe ni munzoue ni phiaphia a tongolola kiambote o kithangana kiâ kia kuvutukila kua tundu; maji o mundu uami-phe, ua lémbua kuijiia ubatuilu ua Jihova.

⁸ Muila kiebhi-phe: Etu tua dimuka, o ngonge ia Jihova tuala na-iu? Talesa-ze, o pena ia makutu ia asoneki iala ku tala ngó hadi mu ku kalakala.

⁹ O jinjimu sonhi ja a kuata, a a tukumuisa ia a a kutu: Oko a tènde o kizuelu kia Jihova; unjimu uahi-phe ua kala na-u?

¹⁰ Uila kiki, akajiʼâ nga-nda ku a bhana ku athu engi, o itaka iâ bhu kala ni iá a i bhingana: Mbata tundé ku jindenge tulé ni ku makota, a jijila midimu ia makutu.

¹¹ Hé a tumba o fidila ia monʼa kilumba kia mundu uami ni mangonha moso, exi; Kua batama, kua batama, manhi kuene kana-ku kubatama kua kima.

¹² Ene kia bhanga ufusa, manhi a kala ni sonhi? lémbue! ene kene mu kala ni sonhi ia kima, né ngó bhuofele kuijiia kioso ki kuata o sonhi; kala kiki ene ue a-nda kutenuka kumoxi ni iá a tenuka; bhu kithangana ki nga-nda ku azungila a-nda ku di lukula bhoxi, Jihova ua ki tange.

¹³ Nga tange kidi, nga-nda ku a kuata, Eme Jihova. Ki kuala dingi jiúva ku muvide, mba jifiku ku mufiku, o mafe ma lalumuka; katé ni kiná muene ki nga a bhele kia-nda ku a xa.

¹⁴ Tua xikamena-hi phe dingi? Diphophienu nda tu bokone mu jimbonge ja nguzu, tuile muenhomo hudí; kuma o Jihova Nzambi ietu ua tu di xibhisa kiá, iú ua tu bhana kunua menha a ndululu; mukonda tua te ituxi kua Jihova.

¹⁵ Tua kinga o kutukuluka, maji kia uabha ki kia moneka; tua kinga o kithangana kia kuiluka, maji kua tuiza dinhengena!

¹⁶ Tundé ku Dane ia evua kiá o dihemakata dia jikabalu jê: oxi ioso ii zamba mukonda dia kuívua o mázui ma jikabalu ja nguzu; ia eza muene, a habula oxi ni nzungule iê ia ima; ni mbonge, ni ió oso a tungu-mu.

¹⁷ Kuma, talesa, nga-nda ku mi tumikisa jinhoka ni ita-sele muʼaxaxe kenu, o nhoka jiji né ku umbanda ki ji xikina, jene ja kà mi numata, Jihova ua ki tange.

Jelemiia ua di suuata mukonda dia mundu uê

¹⁸ Uá! se eme nga tenene ku di konda dilamba diami, tata! muẋima uami iú jila moxi.

¹⁹ Ivua o nzongo ia mona a kilumba kia mundu uami, ku ixi ia makanga! Jihova kifua mu Ziione kala-mu? Sobha iê kene-mu? Mukonda diahi-phe a ngi lokalala, njinda a i balumuna ni iteka iâ ia kuseta, ni ukumbu ua iteka ia akua jixi jengi?

²⁰ Kumuna kua bhiti o thembu ia mvula iabhu, etu-phe ki tua bhuluka.

²¹ Nga budijika muene mukonda dia kitalakanha kia kilumba kia mundu uami: nga mu kuenda ni ndômbe; kua ngiza kubhuuama.

²² Manhi mu Ngiliiade kana-mu unguendu? Inga ki muala kimbanda kia kusaka? Phalaʼhi-phe a kambe kusaka o monʼa kilumba kia mundu uami?