Jelemiia 6 - O Mikanda Ikola

Jeluzaleme a mu Kondoloka Ku jinguma

¹ Enu muʼana a Bejami, mu kaxi ka Jeluzaleme tundenu-mu, mu lengele o muenhu uenu; xikenu ue mbungu mu Tekoua, lekenu ue sama ia túbhia mu Beth-haselene; kuma ku mbandu ia kusuku ku kuijiia kibhidi ni kibuika kia dikota.

² Monʼa kilumba mu Ziione, mukua makembu, ngi mu sendumuna.

³ Abidi a-nda ku mu kana ni ilunga iâ; hinu a kà mu phaphela jibalaka mu jimbandu joso mu ku mu bilukila, kala mubidi u disa kilunga kiê bhu kididi kiê.

⁴ Mu kasedienu ita i mu buikise; balumukenu, tu bande mu kumbi dia mediia; kokolo dietuʼé! kumbi di diia kiá; o ilembeketa ia ngoloxi ilebhela kiá o kuiê.

⁵ Balumukenu, tu bandienu ni usuku, tu lundumune o mazemba mâ.

⁶ Mbata Jihova dia Ilombo Ieta, uambe kiki: Batulenu muxi, mu tunge imbaka mu ku bilukila Jeluzaleme; iii iene o mbonge ia-nda kutalesa hadi; usuéia mu usuéia ngó ua tungu muʼaxaxi kê.

⁷ Kala o fixi ki i tubhula o menha mê, ni muene kiene kia kuata ku tubhula o phulu iê; momuê mua kalé kiá o undanda ni kuzanga; ni uhaxi, ni jifidila jenhé kiá bhu pholo iami.

⁸ Diiukise, eie Jeluzaleme, phala muenhu uami ki u kuxie, hé ngi ku bhanga u ngundu, nʼu kituka ixi ia kamba dibhata.

⁹ Jihova dia Ilombo Ieta, uambe kiki: O masubhu ma Izalaiele a-nda ku ma nona ni muanu uoso, mukua ni mu dibhia dia muvide mua munu kiá; lukuaku lué tá na-iu dingi mu iinda, kala ki bhanga o mukua kumuna jiúva.

¹⁰ Enu mala, mukuahi ngi mu tela maka hé ngi mu bhela umbangi, nʼevue? Talesa, kuma ene ala ni mátui a musununu a lémbua kuivua; tala-phe, kuma o maka ma Jihova, phala ene, kima kia jisonhi; ka ma uabhela.

¹¹ Mu kiki ngezala ni njinda ia Jihova; nga bhuila kiá, ki nga tena dingi ku i fudisa: ngi i lunduluila mu nzunga, ku thandu dia tumbonga ni bhu mabhongolokelu a minzangala bhuamoxi; kuma katé ni diiala ni mukajiʼê a kà a kuta, ni ua kuka kumoxi ni ió uezala ndumba dia izuua.

¹² O jinzo jâ a kà ji xila athu engi, ni itaka iâ, ni akajiʼâ bhuamoxi; mbata nga-nda ku sunununa o lukuaku luami mu kuhuha o atungi-a-mabhata aʼxi iii, Jihova ua ki tange.

¹³ Kuma tundé ku ndenge jâ, tulé ku dikota, ene oso muthu ni muthu a di bhakula ku luimbi lua kitadi; tundé ku polofeta katé ku nganga, a jijila midimu ia makutu.

¹⁴ Hê a tumba o fidila ia mona kilumba kia mundu uami ni mangonha moso, exi: Kuatululuka, kuatululuka, mbé kuma kuene kana-ku kutululuka.

¹⁵ Ene o kia bhanga o ufusa manhi a kala ni sonhi? lémbue! ene kene mu kala ni sonhi ia kima, né ngó bhuʼofele kuijiia kioso ki kuata o sonhi, kala kiki ene ue a-nda ku di bhala kumoxi ni iá a dibhale; a-nda ku di lukula bhoxi, bhu kithangana ki nga-nda ku a zungila, Jihova ua ki tange.

¹⁶ Jihova uambe kiki: Kutukenu mu jinjila, mu tale nda mu ibhule ikoka ia xahulu, ioso o njila iauabha, muʼendele muenhomo; nda mu sange o dinhohenu dia jinzumbi jenu: Maji ene-phe exi: Nguetu kuenda.

¹⁷ Nga mi tela ue alangidi, ngixi: Ividilenu dízui dia koloneta: ene-phe exi: Ki tua-nda kuividila.

¹⁸ Kala kiki enu ifuẋi, ivenu-kiu; enu kionge tumenu ku kijiia kioso kiambe kubhanga muaʼxaxi kâ!

¹⁹ Ivua kunu, eie u ixi! Talesa, o mundu iú nga-nda ku u bhekela kibhidi, kia tundu mu kibundu kia ixinganeku iâ-ene; mbata maka mami kala ku ma suua, o ngonge iami ue a di tunu-iu.

²⁰ Uasu ua dizumba-phe uahi uene, ua mu ngi tundila ku Seba kuná, ni lumbungu lua beta kuiuka lua ima ia mazumba lua tundu ku jixi ja makanga? mibhaku ienu ia kuoha ki ia ngi uabhela, o jisata jenu ue ki ja ngi kala ku vondadi.

²¹ Kala kiki Jihova uambe uixi: Mundu iú nga-nda ku a tela idibhukanu ku pholo, a-nda ku di bhukana-ku o jitata ni ana bhuamoxi; ni dikamba ni mukuá a tungu-nê a kà buikila bhuamoxi.

²² Jihova uambe kiki: Talesa kuala kuiza athu a tunda ku mbandu ia ku suku, ku jimbalelu ja ixi kua-nda kubalumuka kifuxi kionéne.

²³ A-nda kua kʼèza ni mufula ni dionga; ene isuéia-phe ka xikina kulenduka; kibulukutu kiâ ki zuma mukuâ ni mabhuku, endela ku jikabalu, a di zeleka kala makuenze ma ita phala ku ku balukila eie, monʼa kilumba mu Ziione.

²⁴ Etu tua evu fuma iâ; ni maku metu ma bulukuta kiâ; kua tuiza jingongo, mika kiá kala ia kivuadi ku isenda.

²⁵ Ki mu di tele ku mukáu, mba muendela mu njila; kuma o nguma uala ni xibhata, o ku jimbandu joso kuala uoma.

²⁶ Kilumba kia mundu uami, tata, dikute kidinhaji, u mbolomoke mu uthokua; tá muene ngololo kala ia kudila monʼumoxiʼèlele, ngololo ia malamba; mbata mubuikixi kua mu kambe ngó kofèle u tu sanga.

²⁷ Nga ku tula muʼaxaxi ka mundu uami, u mbonge ia kilangidilu, u kimbaka, nda u tene o kuijiia, u tongolole o njila iâ.

²⁸ Ene oso, ene a beta o kuẋinuka, anga a nanga ni ku longolola; a kolo kala ngondo ni felu: ene oso uendelu uâ ua ku di bolesa.

²⁹ O muanzu ua jikata kiá, o xumbu ia jila ni túbhia; muzunzi ua mu tala ngó hadi ia kuzunza ngó ni muanu, o isuéia hanji ia naminina, a lémbua ku vuza.

³⁰ A-nda kua kà exana phalata iò jine, mbata Jihova ua a tènde.