Jelemiia 51 - O Mikanda Ikola

¹ Jihova uambe kiki: Tala, hádia ngi fundumuna kitembu ki buikisa, mu kuzoka ni Babilonha, ni mu kuzoka ni ió a tungu mu kaxi ka iá ene ku ngi balukila eme.

² Hádia ngi tumikisa akua kubhiata, mu kuzoka ni Babilonha, anga a mu bhiata muene, o mavu mê anga a ma lundulula; kuma bhu kizuua kiê kia kubhondalala a kà mu konda ku mbandu joso.

³ O muasi a misongo oleke mufula uê mu kuzoka ni iú uejiia ue kuoleka o mufula, ni mu kuzoka ni íú ua dielela o kivunga-thulu kiê; o minzangala iê ia mala kana ku i kuatela henda; o kifuẋi kiê kioso kia masoladi jikinisenu-kiu muene.

⁴ Hádia a fuila mu ixi ia akua Kaldeia, a a tomena mu jinzunga.

⁵ Mukonda Izalaiele ni Juda ka ehelela luua kuala Nzambi iâ, kua Jihova dia Ifuẋi, némbe hanji oxi iâ izala ni ikuma bhu pholo ia ió Ukola mua Izalaiele.

⁶ Mu kaxi ka Babilonha lengenu-mu! O muthu ni muthu a bhulule muenhu uê. Ki mu di jikinise anuʼenu mu ku ibha kuêmuène; mukonda o kiki kiene o kithangana kia phonzo ia Jihova; Muene hádia u mu bhana kioso kia mu fuama.

⁷ Babilonha ua di bhangele kala kopho ia ulu bhu lukuaku lua Jihova, ia kexe mu ku kodiuisa o ngongo ioso; ku vinhu iê kuene kuanu akua jixi; kiene kia bhangesa miji ioso kudianguka.

⁸ Maji mu kithangana kimoxi, Babilonha ua di bhale iú ua senguluka; mu didienu, mu kuate maji ma dizumba mbé o misusu iê, sumba u di sanza.

⁹ Kuma Babilonha tuandelele ku mu saka nʼa disanze maji muene ua lémbua kudisanza; muʼambudisienu, kala muthu aie ku ixi iê; mbata difundisilu diê dia bhixila ku diulu, dia di leka tulé ku matuta a suku-ku bhulu.

¹⁰ O kulunga kuetu, Jihova ua ku bheka mu mukengeji; zenu, nda tu ki tange mu Ziione, o kikalakalu kia Jihova, Nzambi ietu.

¹¹ Zelesenu misongo, o ivunga-thulu iudikenu-iu muene kiambote; Jihova ua phaphumuna miẋima ia jisobha ja Mediia; mbata kia mu kala miẋima mu kuzoka ni Babilonha, o ku muanga kuene; mukonda iii iene o phonzo ia Jihova, o ditota dia Tembulu iê.

¹² Olekenu dibandela ku thandu dia imbaka ia Babilonha, kilangidilu ki kole, tenu alangidi, iudikenu mibhetu; mukonda Jihova ua xinganeka iú ua bhange kala kiambele ku mbandu ia iá a tungu mu Babilonha.

¹³ Eie, tata! Ua tunga ku thandu dia menha ma ndumba, uezala ni jimbongo ja vulu! Zubhilu dié dia bhixila, kala o kizongelu kia unjenje ué!

¹⁴ Jihova dia Ifuẋi ua di lokela muenemuène, uixi: Ni kidi kiene nga-nda ku kuizalesa ni athu kala uombe, ene à kʼemba ni kutana ku thandu dié-eie.

¹⁵ Kuma muene ua bhange o ixi ni kutena kuê, o ngongo iú ua mu i tumina ni kuijiia kuê, iú ua zale o diulu mu unjimu uê.

¹⁶ Muene kia di ta mutendu mu kuivisa dízui diê, diulu dioso dizala kilungutu kia menha, mbundu iia ni kutukumuka tundé kua suku oxi; Muene ua bhange o jinzaji mbé o mvula, anga u katula kitembu mu malundilu mê.

¹⁷ Bheneʼobho-phe athu a tobha, kuijiia a ku lémbua; akua kusula iteka ia kuseta, ene oso sonhi ja a kuata; mukonda o iteka iâ ia utadi ua kuzunza iala makutu, kuma kana-bhu né kiteka kimoxi ngó kiala ni muenhu moxi diê.

¹⁸ Kuma iteka kingoho, a i kalakela kutobhesa ngó athu; hádia bhu kithangana ki nga-nda ku i zungila, ioso i jikinina.

¹⁹ Dikanda dia Jakobo-phe ki kiene ki dia di fu; mukonda Muene muene ua bhange o ima ioso; o Izalaiele uene o muiji ua undundu uê; Jihova dia Ilombo Ita, diene o dijina diê.

²⁰ Eie eie u kiṗhuṗhilu kiami, eie u mata mami ma ita, ngi sasujula miji ioso ni eie, sobha joso ngi ji sengulula nʼeie.

²¹ Ni kabalu ni iú ua sambela-ku ngʼa sasujula nʼeie; ni dikalu ni uoso uia mu dikalu ngʼa sasujula nʼeie.

²² Ni diiala ni múhetu ngʼa sasujula ni eie; ni munzangala ni ua kuka ngʼa sasujula nʼeie; ni munzangala ua diiala ni kilumba kia muzeletete ngʼa sasujula nʼeie.

²³ Mubidi ni kilunga kiê nga kà a sasujula ni eie; kidimakaji ni ngombe jê jiiadi nga kà a sasujula nʼeie; jikabhitangu ni atumini nga kà a sasujula nʼeie.

²⁴ Anga mua kà ki mona ku mesuʼenu, kioso Babilonha ni ene oso a tungu mu Kaldeia, ki nga-nda ku a futa o ufusa uâ uoso ua bhanga jinga mu Ziione, Jihova ua ki tange.

²⁵ Eme bhabhʼú, mu kuzoka nʼeie, eie u mulundu ua kimuanga u muanga ixi ioso, Jihova ua ki tange; lukuaku luami ngi lu sunununa mu kuzoka nʼeie, ngi kumbolomuena muene ku matadi, anga ngi ku bhanga mulundu ua túbhia.

²⁶ Momuʼè ka kà katula-mu ditadi dia thungi mba ditadi dia ku tela madisesa, mukonda eie ua kà kituka o ngùndu i nangenena; kiene kia tange Jihova.

²⁷ Lekenu o mvela mu ngongo, mbungu xikenu-iu mu kaxi ka akua jixi; akua jixi a di zelese phala kuzoka-nê; bhongololenu mautuminu ma Alalate, ni Mini, ni Xikena, mu kuzoka-nê; mu kuzoka-nê katulenu kilolo, o jikabalu ji muʼendele muene mukua ni uombe ua salumuna.

²⁸ Zelesenu akua jixi mu kuzoka-nê: ni jisobha ja Mediia ni tubhitangu tuê ni ilamba iê ioso ni ixi ioso ia utuminu uê.

²⁹ Kieneʼokio-phe o ixi ia kà teketa, mbata o ixinganeku ioso ia Jihova ia nguzu mu kuzoka ni Babilonha, phala kubhangesa kuila ixi ia Babilonha i kala ngùndu ki i mono athu a tunga-mu.

³⁰ O mazonda a Babilonha kubhânga a kuʼeha, a di jikila mu imbaka, nguzu iâ ia zondo, a biluka kala ahetu; o mabhata mâ a mʼoha mu túbhia, sabhi jâ a ji bukujula.

³¹ Muambatiʼa mikanda ua kà lenga mu ku takana ni muambatiʼa mikanda ua kamukuá, o mukunji mu ku takana ni mukunji ni mukuá, phala ku ki tangela sobha ia Babilonha kuila o mbanza ié a i tambula kiá mu jimbandu joso.

³² O matabhu a kuvuua a ma xitila, o iangu a iʼoha mu túbhia; o makuenze oso a ita, uoma ua a kuata.

³³ Mukonda Jihova dia Ifuẋi, Nzambi ia Izalaiele, uambe uixi: O monʼa kilumba ua Babilonha uedi kala dizanzu (kienda) bhu kumbi dia kuvunda jimbutu; kua mu xala ngó kithangana kumbi dia kumuna di bhixila.

³⁴ Nabukodonozolo, sobha ia Babilonha ua ngi di kihabula, ua ngi diota-diota, ua ngi bhange ngi kitutu kia hatu, ua ngi minha mukuá ni kimudikixi iú uezalesa vumu diê ni kikexilu kiami kia ujitu; iu ua ngi kaiela bhu kanga.

³⁵ O kusuina kua ngi bhange eme ni xitu iami, kuize ku thandu dia Babilonha, ua tunga mu Ziione a ki tange; o manhinga mami ma laúkile ku thandu dia iâ a tungu mu Kaldeia, Jeluzaleme a ki tange.

³⁶ Uila kiki Jihova uambe: Tala, mvunda ié nga-nda ku i bhânga, nganda kuvutula phonzo ku phonzo ia ku tate eie; o musanza uê ngi u kukutisa, o otho iê ngi i bhuisa-ku.

³⁷ O Babilonha anga u kituka maxita, u di bhanga tungilu dia jinhoka ja ibha, kisunji, mu ku mu mona athu a xika muphióphio, ni umoxi ngó u tunga-mu ka moneka.

³⁸ A kà kumuina kumoxi kala minzangala ia jihoji; a kà di zumina muene kala tuana tua jihoji.

³⁹ Ki a-nda kuila a salumuka eme ngʼa bhana kúnua kuâ, hé ngʼa kodiuisa phala nʼende ni kutuka-tuka; maji hádia a kà zeka kilu kia muiokoioko, ki mungu dingi a tona, Jihova ua ki tange.

⁴⁰ Nga-nda ku a kulumuisa kala jimbudi jiia bhu dijibhilu, mukua ni ilumbe ia jimbudi ni isutu ia jihombo.

⁴¹ Sezake a mu tambula, tata! O matunda ma ixi ioso a ma kuata muene mu kitukumuise! Babilonha ua di bhange kisunji mu kaxi ka akua jixi,

⁴² O musanza ua kalunga ua bande ku thandu dia Babilonha, ndumba ia mabhuku ma kalunga ia mu vungina.

⁴³ Jimbanza jê joso ja kituka bhoxi-mavu, ixi ia kukuta, ia di bhange kikangalakata, ixi ki i moneka uoso u tunga-mu, mba mu bhita ngó monʼa muthu.

⁴⁴ Hádia Bele mu Babilonha, nga-nda ku mu zungila, o ioso ia minha mu kanu diê nga-nda ku mu katula-iu, akua jixi ki mungu dingi aia ni kuia kokué; o kimbaka ue kia Babilonha kia di bhale.

⁴⁵ Enu mu mundu uami, mu kaxi ka Babilonha tundenu-mu, muthu ni muthu a bhulule o muenhu uê, mukonda dia kiaúla kia njinda ia Jihova.

⁴⁶ O miẋima ki i mi titile mba mu kala ni uoma ua kibulukutu ki muʼivua mu ngongo; mbata mua-nda kuila kuiza muvu ni kibulukutu kiê, o ki kuiza muvu ua mukuá ni kibulukutu kia mukuâ; mu ngongo mua kà kala usueia, mutumini u zoka ni mutumini ua mukuá.

⁴⁷ Uila kiki, izuua í iza, i nga-nda kuzungila o iteka ia kusonga ia Babilonha, o ixi iê ioso ia kà kala ni jisonhi; o ió oso a mu tokala a a tubujula, a kà di bhalela muene mu kaxi kê.

⁴⁸ Ni diulu ni ixi, ni ioso iala na-iu, ia kà tana mu ku mona Babilonha; mukonda ku suku kuene kua-nda ku muʼijila oso a-nda ku mu muangamuanga, Jihova ua ki tange.

⁴⁹ Kala Babilonha kia bhangesa ku dibhala jithomiue ja Izalaiele, kiene ue mu Babilonha kia kà dibhala jithomiue mu ixi ioso.

⁵⁰ Enu-phe mua subhuka ku xibhata ndénuʼenu, ki muʼimane; ku makanga kuenhoko lembalalenu Jihova, o Jeluzaleme aie ni kubanda ku miẋima ienu.

⁵¹ Mua kà kiʼamba, kuila: Sonhi ja tu kuata muene mukonda tua sebuluka; pholo ia tuʼizala jisonhi, mbata kueza akua jixi jengi mu mabhezelu a kola a inzu ia Jihova.

⁵² Uila kiki, Jihova uambe, uixi: Kua-nda kuiza izuua i nga kà zungila o iteka iâ ia kusonga; o ixi iê ioso ia kʼezala ni kukema kua ió oso a a kubula.

⁵³ Mukonda nê-mbe hanji o Babilonha u banda katé ku diulu mba u kolesa o kitala kia kimbaka kiê, kokuami muene hanji kuene ku tunda oso a mu tulukila phala ku mu muanga, Jihova ua kiʼambe.

⁵⁴ O nzôngo ia kudikola a ivu mu Babilonha, ni ia kibuika kia dikota mu ixi ia akua Kaldeia;

⁵⁵ mukonda Jihova ua jimisa Babilonha, ua-nda kubhangesa kuila momuê dízui dia dikota di jima-mu ue; anga o mabhuku mé ma kà zuma kala kilungutu kia menha ma vulu; o kinuminu kia dízui diê a-nda ku kʼivua muene.

⁵⁶ Mukonda o mubuikixi ua-nda ku muʼendela, ua-nda kuendela Babilonha, o mazonda mê ua kà ma kuta, o mifula iâ ua i bukujula kiá; mukonda Jihova, Nzambi uavu o futu, ua kà mu vutuila kioso kia fuama.

⁵⁷ Nga kà kodiuisa o ilamba iê, ni jinjimu jê, ni jikabhitangu jê, ni makota mê ma jinganga, ni mazonda mê; hé a ká zeka kilu ki nangenena, ki mungu dingi a tona; Sobha ua bhingi dijina diê Jihova dia Ilombo Ieta muene ua ki tange.

⁵⁸ Jihova phe, dia Ilombo Ieta, uambe kiki: O imbaka ia zanze ia Babilonha hádia a kà i bula muene iene ioso, o mabhitu mê ma lebha kiambote ma kà uama mu túbhia; anga ifuẋi ia kà kalakala mu kingoho, o miji ia kà xikamena ngó phala túbhia, hé ia kà iokojoka muene.

⁵⁹ O kizuelu kia tumikisa Jelemiia, o polofeta, kua Selaia, monʼa Nediia, monʼa Mahaseia, kioso kia luʼia ku Babilonha kumoxi ni Zedekiia, sobha ia Juda, mu muvu ua kauana ua utuminu uê, anga Selaia u kala kilamba kia tululuka.

⁶⁰ Jelemiia hé u soneka mu divulu dibhebhu dioso dia-nda kuiza ku thandu dia Babilonha; maka oso enhá òʼsoneke kiá ku mbandu ia Babilonha.

⁶¹ Jelemiia hé uambela Selaia, uixi: Kioso eie ki ua kà bhixila ku Babilonha, ua kà tala hé u tanga maka oso enhá.

⁶² Hé ua kà zuela, uixi: Jihova, tata! Eie ua zuela ku mbandu ia kididi kiki, kuila ua-nda ku ki jimisa muene, katé ki bhu xala uoso u tunga-bhu, tundé ku muthu katé ku iama, maji ki biluka muene ngùndu i nangenena.

⁶³ Anga kia kà kala-phe kiki: Kioso eie ki ua kà zubha kiá kutanga o divulu didi, ua kà di kutila ku ditadi hé u di takuila mu kaxi ka ngiji ia Ufalate,

⁶⁴ hé uà kʼèla uixi: Kienhiki ue kia kà njoboka Babilonha, o kubalumuka ua kà ku lémbua, mukonda dia usuéia u nga-nda ku mu bhekela ku thandu diê. Akua Babilonha a kà lémbua muene. Bheneʼabha bhua suku o maka a Jelemiia.