Jelemiia 50 - O Mikanda Ikola

Muzambu ku mbandu ia Babilonha

¹ O kizuelu kia zuela Jihova ku mbandu ia Babilonha ni ku mbandu ia ixi ia jikaldeu, mu kuzokanâ, kua Jelemiia polofeta, uixi:

² Tangenu-kiu mu kaxi ka akua jixi. Ambenu-kiu a kʼivue, lekenu muene o mvela ambenu-kiu a kʼivue, kana ku ki sueka, kuila: Babilonha a mu tolola kiá, Bele ua tandanganha, Melodake a mu bhiti ku thandu, o iteka iâ sonhi ja a kuata, jinzambi jâ ja dibhale bhoxi.

³ Mukonda kua muʼendela muiji ua kusuku ueza mu kuzoka-nê, ua-nda kubhangesa kuila ixi iê i kituka ixi ia ngùnzu, ki i moneka uoso u tunga-mu; tundé ku muthu tulé ku iama ene oso a lenge, aii muene, lalá!

⁴ Jihova uixi: Mu izuuʼomo ni kithanganʼokio, anʼa Izalaiele a kʼèza, ni ene ni anʼa Juda kumoxi; mu kuiza kuâ, a kʼèla ia enda ia dila, mu kusota Jihova Nzambi iâ.

⁵ A kʼèbhula njila ia Ziione, kueneʼoko kuene kua talela jipholo jâ; hádia a kʼèza anga a kà di bunda kua Jihova mu kikutu ki nangenena kia bhingi ki mungu dingi a ki jimba.

⁶ Kifuẋi kiami kia di bhangele kala mbudi ja jimbidila, tubhila tuâ ene muene a ji tondalesa, a jiʼehelela kutexika mu milundu; a tunda mulundu eza mulundu ni kuenda, a jimbi kididi kiâ kia kunhohena.

⁷ Eneʼoso a kexi muʼia ni ku ji bonga, aia ni ku ji diʼâ; o jinguma jâ aia ni kutanga, exi: Ki tuandu kala-ku ni kikuma; mukonda ene a te kituxi kua Jihova, uene o Kibuta kia Kuiuka; xi, kua Jihova, o Kidielelesu kia jitata jâ.

⁸ Mu kaxi ka Babilonha lengenu-mu, mu tunde mu ixi ia jikaldeu; muile kala ilumbe ia jimbudi bhu pholo ia kilunga.

⁹ Mukonda, tala, eme nga-nda kufundumuna ni kutumikisa, kifuẋi kia miji iònene, akua ixi ia kusuku, a kà di iudika mu kuzoka ni Babilonha, bheneʼobho a ka mu tolola muene; o misongo ia mifula iâ ia kèla kala ia kiiala kia dizonda; né umoxi ngó ki u vutuka ua kambe kubhanga kima.

¹⁰ O Kaldeia ua kà di bhanga mbole; ene oso a kà mu bhunda-bhunda hé ki a kuma, kiene kiambe Jihova.

¹¹ Mukonda mua sanguluka, mua tuka-tuka ni kutana, enu mua bhunda-bhunda o undundu uami! Anga mu di nanukisa kala kangombe ka nete, muia ni kuthúlula kala jikabalu ja nguzu.

¹² Kizuua mamʼenu ua-nda kutandanganha kiavulu! Ió ua mi vuala, hádia sonhi ji mu kuata! Tala, ua-ndu kala uene kiá o muiji ua suku kuema dia akuâ, u di bhanga kikangalakata, ixi ia kukuta, ia biluka ngùndu, muda huhúm!

¹³ Mukonda dia njinda ia Jihova, ki mua kà kala muthu u tunga-mu, maji ia kà kituka ixi ia kibuika ngó, kuabhu; uoso u bhita mu Babilonha ua kà diuana, anga u xika muixi kia mona o mabhebhu mê moso.

¹⁴ Anuʼenuʼoso muʼoleka o mufula, di iudikienu phala Babilonha mu mu kondoloke; mu muʼasa muene, misongo kana ku i mamena, mukonda ua te kituxi kua Jihova.

¹⁵ Te-nu nzongo ia kuzoka-nê! Mu kondolokienu! Muene ue ua tolokʼê kiá! Madisesa mê ma lundumuka, o imbaka iê iòbule. Mukonda iii iene o phonzo ia Jihova; mu vutuidienu ditota; kioso kia bhange muene kiene ki mu mu bhanga ue.

¹⁶ Uoso u kuna ni ió uoso uambata kibholola bhu thembu ia kumuna, mu Babilonha mu tukudienumu; mukonda dia xibhata ia bhinjika, kala muthu ua-nda ku vutukila ku kifuẋi kiê, o muthu ni muthu anga u lengela ku ixi iâ.

¹⁷ Izalaiele ua soko ni mbudi ia jimbila; a mu kaiesa kuala jihoji; sobha ia Asídia muene ua dianga ku mu dia; o kua suku kunu, Nabukodonozolo, sobha ia Babilonha, muene ua mu bukula o ifuba.

¹⁸ Kala kiki, Jihova dia Ifuẋi, Nzambi ia Izalaiele, uambe kiki: Tala, sobha ia Babilonha nga-nda ku mu zungila, ni muene ni ixi iê, kala ki nga zungila sobha ia Asídia.

¹⁹ Anga Izalaiele ngi mu vutukisa mu kibuta kiê, hé ua kà di dikila ku mulundu ua Kalamelu ni ua Baxane; muenhu uê anga uikutila ku mulundu ua Ifalaimi ni ua Ngiliiade.

²⁰ Mu izuuʼomo ni mu kithanganʼokio, Jihova uixi, kuiibha kua Izalaiele a-nda kuà ku sota, maji ki kuanda kumoneka dingi; ni ituxi ia Juda ue, maji ki ia kà moneka; kuma eme nga-nda kuloloka oso u ngi xisa masubhu.

²¹ Banda mu kuzoka ni Melataimi, banda u zoke-nê, ni iá ue a tungu bhu Pekode; jimisa muene o mbutu, sengulula ioso kuema diâ, Jihova ua ki tange, u bhange ioso kala ki nga ku tumu.

²² Munumango ua ita uala mu ngongo ni kibuika kia dikota!

²³ Kiṗhuṗhilu kia ixi ioso a ki batula, a ki bukujula, tata! Babilonha ua kituka kiebhi kidiuanu mu kaxi ka miji!

²⁴ Nga ku tela mabhebhe, eie uafu-mu muene, Babilonha! Eie phe ku kʼijidile! A ku bongo, iá a ku kuata, mukonda eie ua di metena kuzoka ni Jihova.

²⁵ Jihova ua jikula mu dilundilu diê, iú ua katula-mu ingolongondo ia kutema kuê; mbata Jihova, Jihova dia Ilombo Ieta; uala ni kikalakalu kia kubhanga mu ixi ia akua Kaldeia.

²⁶ Zenu-phe mu lue-nê, tundenu muene ku maẋokololo aʼxi, jikulenu-phe inganja iê, ixi ioso titidilenu-iu mukuâ ni iangu, sengululenu-iu muene iene ioso: ki bhu kale kima ki mu subhuka.

²⁷ Tungombe tuê tuoso jibhenu-tu ni xibhata, kulumukenu bhu dijibhilu: kokolo diâ! Mukonda o kizuua kiâ kieza-bhu, ni kithangana kiâ kia ku a zungila!

²⁸ Dienhidi diene o dízui dia iá a lenge, ia a bhulaka mu ixi ia Babilonha, mbé nʼa di jimbule mu Ziione o phonzo ia Jihova, Nzambi ietu, o phonzo ia Tembulu iê.

²⁹ Babilonha mu bhongoluedienu oso akua kuasa ni misongo, oso ejiia kuoleka o mufula, a zoke-nê; mu tedienu ndala-mbuta mu jimbandu, phala ki bhu kale muthu u lenga-mu; mu futienu kala kia fuama o ikalakalu iê, kioso kia bhange muene, kiene ue ki mu mu bhanga; kuma ua di zangelekele mu kuzoka ni Jihova, mu kuzoka ni Ukola mua Izalaiele.

³⁰ Kala kiki minzangala iê ia mala a-nda ku fuila mu jinzunga; o makuenziʼê oso a ita bhu kizuuʼokio, a-nda ku a vuza, Jihova ua ki tange.

³¹ Kiki-phe, tala, nga ku lungulukila, eie nʼa mama dia ukumbu! Jihova, Nzambi ia Ilombo Ieta ua ki tange: mukonda kizuua kié kieza-bhu, o kithangana kié ki nga-nda ku ku zungila.

³² Kienhiki, nʼa kaukumbu, ua-nda ku di bhukana anga u di bhala, u mu balumuna ka-nda ku moneka; anga jimbanza jê ngi ji ta mu túbhia, tuene anga tuoha katé mu jimbandu jê joso.

³³ Jihova dia Ifuẋi uambe kiki: Anʼa Izalaiele ni anʼa Juda a a talesa o hadi kumoxi; o ió oso ambata anʼa Izalaiele ku ubhika, a a bhake muene, nguâ kua eha.

³⁴ Maji-phe o Mukudi uâ, Kindanda; Jihova dia Uombo Ieta; diene o dijina diê, ni kidi kiene o mvunda iâ ua-nda ku i bhânga, phala ixi nʼa i bhane o kunhoha, ni kuzukutisa iá a tungu mu Babilonha.

³⁵ O xibhata ia-nda kuiza ku thandu dia akua Kaldeia, Jihova ua ki tange, ni ku thandu dia ia a tungu mu Babilonha, ni ku makota mê ma jingana ni ku jingijiie jê.

³⁶ O xibhata ia-nda kuiza kua oso a tanga o makutu, anga a kà kituka ioua; xibhata ia-nda kuiza ku mazonda mê, anga a kàia ku kiambu.

³⁷ O xibhata ia-nda kuiza ku thandu dia jikabalu jâ ni ku thandu dia makalu mâ ni ku thandu dia kifuẋi kia athu a di bundu kumoxi mu kaxi kâ; ene-phe a kà di bhanga kala ahetu; xibhata ia-nda kuiza ku thandu dia jimbongo jâ, a kà ji bhunda-bhunda.

³⁸ Kikukute kia kà laukila ku thandu dia menha mâ, anga ma kukuta; mukonda iala ixi ia iteka ia kusonga, o ene phe ala ni kuthathamana mukonda dia iteka iâ.

³⁹ Kiene kia-ndo bhekesa kuila mu tunga ngó iama ia ixi ia kisekele ni iama ia mukáu mu ikolo; ni i minzoue muene ue mu ia kà tunga; ki mungu dingi mua kà kala athu, mba kutungamu, ku tunda muiji kuiza muiji.

⁴⁰ Mukuá ni Nzambi kia jikinisa Sodoma ni Ngomola ni jimbanza ja zukamene na-ju, kiene kimoxi ue momo ki mua kà kala u tunga-mu, mba monʼa muthu u tá-mu dibhata, Jihova ua ki tange.

⁴¹ Tala, ku suku kua-ndo tunda kifuẋi kia muiji ua dikota; sobha ja nguzu ja-nda ku tunda muene ku maẋokololo mu jimbandu jaʼxi.

⁴² A ka kuata mifula ni madionga bhu maku; athu a di kake, kʼejiia ku kuatela henda; dízui diâ dia kà numina kala musanza ua kalunga, a kʼendela ku jikabalu mukuá ni muthu u lengela kuia ku ita, mu kuzoka nʼeie, monʼa kilumba ua Babilonha.

⁴³ Sobha ia Babilonha uevu fuma iâ, o maku mê iá a botomoka; kimbuua kia mu kuata, kua muiza misusu, kala muhatu ua-nda ku vuala.

⁴⁴ Talesa, umoxi uila kala hoji, uanda kubanda ni hungulule ia Njolodá, uendela dibhata dia dizonda, maji muʼanzanzʼumu nga-nda ku mu kaiesa-bhu; uoso nga mu solo eme muene ngi mu ta-bhu mu kuzoka-nê; mbata nanhi ua di fu nʼEme? Nanhi muene u ngʼixana eme mu kufunda? Nanhi muene o mubidi u tena kuimana bhu pholo iami?

⁴⁵ Kala kiki, ivuenu kaiula ka Jihova ka te mu kuzoka ni Babilonha, ni ixinganeku iê ia kanena na-iu ixi ia akua Kaldeia, uixi, ni kidi muene, ka kilunga né kòfele, kʼaia muene ni ku a kuka, kuma dibhata diâ hádia di xala ngùndu kidi muene.

⁴⁶ Ixi ia teketa ku kinuminu kia Babilonha kioso kia mu tolola; o kudikola kuê a kuʼivu mu kaxi ka miji ioso.