Jelemiia 5 - O Mikanda Ikola

O ituxi ia Jeluzaleme ni Juda

¹ Jingujukenu mu jinzunga ja Jeluzaleme, dimueninu kiá, mu tokuesa muene, bhitenu mu jisengu jonéne, mu mone mba mu sanga-mu muthu, mba muala ngó o muthu umoxi u kumbidila o kuiuka, mba u sota o kidi; eme inda ió ngi mu loloka.

² Né-mbe a zuela kuila: Jihova a kole muenhu, ni kidi kiene a loka ngó makutu.

³ Jihova tata, mesu mé ma kamba kutonginina o kidi? O ki ua a betʼokio, ene ki kia a kate: eie ua a huha kiua, maji ene nguauâ kutoloka ni kutambula mulongi: jipholo jâ a ji kolesa muene ditadi ndenge, a ditunu kuvutuka.

⁴ Eme-phe ngixi: Kia kidi kiene o iá ene o jingadiama ja jisemenhiʼiji: malaji ahatu, kuma kejiia njila ia Jihova, ni ubatuilu ua Nzambi iâ.

⁵ Ngiia ku adiakimi, anga nga kà zuela-nâ; mbata ió o njila ia Jihova a i ijiia, ni ubatuilu ua Nzambi iâ: maji enhá ene-oso bhuamoxi, kanga a i bukujula, o mikolo a i thathumuna.

⁶ Mukonda dia kiki hoje ia tundu mu kitumba ia-nda ku a buidisa, o kimbungu kia ixi ia kisekele kia-nda kua sengulula; ongo ia batamena o madiembu mâ: uoso-uoso u tunda mu jisazalʼomo a mu sasujula; mbata o itondalu iâ ia sokoloka, o umbaluke uâ ua di bandekeza.

⁷ Eme-phe o ki ngi mona kiki, ngi ku loloka kiebhi? anʼé a ngiʼxa eme hé a lokela ku jinzambi ki jinzambi ngó, kioso eme ki nga zubha kua ekutisa, ai kiá kuta jiphanda jâ, a bokona monzo ja idianzunga, a di bhanga ibuka-ibuka.

⁸ Edi kala jikabalu jadi jekuta, jifundumuka mu kimene anga ji kuata kuzulumina iú ku mukajiʼa mukuá, iú ku mukajiʼa mukuá.

⁹ Manhi ima kala iii ngeji ku i talela ngó, sè ku i bhesa kaxtiku, eme ngi Jihova? inga muenhu uami u kamba kuzoka ni muiji u kala kiki?

¹⁰ Sambelenu ku imbaka iâ, mu a buidise: jithangu jê saunenu-ju, mbata ki ja Jihova.

¹¹ Mbata dibhata dia Izalaiele ni dibhata dia Juda a ngi kitukila ni ufumbe uavulu, Jihova ua ki tange.

¹² Adituna Jihova, anga ela exi: Ió ki muene; exi dingi: Ki kua-nda ku tuiza kiluezu kia kima; ki tua-nda ku mona xibhata né nzala.

¹³ Katé ni misesedi a ka di bhanga mbambe ni kitembu, mukonda o kizuelu ene kala-nakiu: ioso iala mu zuela o jipolofetʼoio, ene muène ia-nda ku a bhita.

¹⁴ Kala kiki Jihova, o Nzambi ia Ilombo Ieta, uambe kiki: Kala kiki, o ki uazuela maka ió, talesa, maka mami mu kanu dié ngi ma kitula tubhia, o mundu iú ngi u kitula jihuinhi, ene-phe a-nda kubuika.

¹⁵ Talesa-ze, eie u dibhata dia Izalaiele, nga-nda ku mi solomuena kifuxi ki tunda makanga, Jihova ua ki tange; kifuxi kia nguzu. Kifuxi kia xahulu, kifuxi kia bhingi eie o mbimbi iâ kuanda ku ijiia; kioso kia zuela eie kua-nda kutena ku kʼivua.

¹⁶ O kizu kiâ ufika kala mbila ia jikuka: Ene oso mazonda mu mazonda.

¹⁷ Ene hinu a kàdia o itula ié, ni mbolo ié ia tokalele anʼé a mala ni anʼè a ahatu; jimbudi jé ni jingombe a kà kudia-ju; a kà dia ue ni muvide ué ni mufiku ué; o jimbonge jé ja makota ji ua dielela a-nda ku ku senguluila-ju kuala o xibhata.

¹⁸ Hanji-phe, mu izuua ienhoio, eme Jihova, ki nga-nda ku mi buidisa katé mua jimi, kana.

¹⁹ Anga ki bhita kuila, kioso enu ki muila: Jihova Nzambi ietu ua tu bhangela-hi ima ioso iii? Eie-phe ua ambela: Kuma enu mua ngi xisa, enu mua bhikila jinzambi jengi mʼoxi ienu, kiene-phe ue ki mua-nda kubhikila jingana jengi, moxi ia athu engi.

²⁰ O kiki jimbulenu-kiu mu dibhata dia Jakobo, kundenu-kiu mua Juda, kuamba:

²¹ Kindala ivenu-kiu-ze, enu mu mundu ua tekuka, mua kamba o muẋima, muedi mesu muala-nâ, maji mu tokoka o kumona, o matui mualanâ, maji mu tokoka o kuívua.

²² Jihova uambe: Enu nguenu ku ngi xila, kuambienu? nguenu ku ngi kala ni uoma, eme nga te o mbambe ia kisèkele kia hatu mu xitila o kizanga kia kalunga, i ia xalela ngonge i nangenena ia bhingi o muene u lembua ku i matuka? Né-mbe u fundumuna mabhuku mê, ka tena kutolola; né-mbe mabhuku a zuma, mbambe ka kà i somboka.

²³ Maji o mundu iú uala ni muẋima ua ku baluka, ni kuẋinuka; a balukʼâ, ia aiiʼâ muene.

²⁴ Alembua kuila mu muẋima uâ, exi: O kiki tu xile kiá Jihova Nzambi ietu, mukua ku bhana o mvula, ni ia kudinji ni ia kasamanu, bhu kithanga kiê; mukua ku tu bhakela o jisemana joso ja tu xindila jinga kumuna o idima.

²⁵ O ikuma ienu iene iène ku fudisa o ima ienhiʼii, o ituxi ienu iene i mi sondolola o mbote.

²⁶ Mbata muʼaxaxi ka mundu uami muala ni akua-phulu: Muthu ni muthu uenda ni kubatamena, kala akua kuolekela mabhebhe a tunjila; oleka mibhetu iaiibha muenda ni kukuatela o athu.

²⁷ Jinzu jâ u sanga jezala mangonha mu mangonha, mukua ni ngaiola iezala tunjila; kiene kia di bhangela athu ònene ia a biluka jimvama.

²⁸ U a sanga a nete ni ene, aẋanana, o ku ungumba a somboka imbokoto; anʼa madifundu ka a fundila dimanda, exi avula kubhanduluka; mba ngó o jiphulungu ku a batuila milonga.

²⁹ Manhi ima iii ngeji ku i talela ngó, se ku i bhesa kaxtiku, Jihova ua ki tange; mbé o muenhu uami u kamba kuvutula phonzo muiji kala iú?

³⁰ Kima kiala kubhanga moxʼumu, kikola, ki kuata uoma.

³¹ O Misesedi a tanga ima ia makutu, o jinganga a tumina ku maku mâ-ene; o mundu uami uene, kiene ue kia a uabhela; o ku kia kà suka mua-nda kubhanga kiebhi?