Jelemiia 47 - O Mikanda Ikola

Jelemiia u zambula ima ia-ndo bhita ni akua Fidixia

¹ O kizuelu kia Jihova, kieza kua polofeta Jelemiia, kia kuzoka ni akua Fidíxia, kioso hanji Falaó kiluua a jimisa o mbânza ia Ngaza.

² Jihova, uambe, kiki: Tala o menha a tunda kusuku a-ndo balumuka anga a di bhanga kihungulule ki subhajaka, anga a kʼèzalesa ixi ioso muene ni uvimba uê, ni mbonge ni oso a tungu momo; athu a kà di kola-kola, ene oso a tungu mu ngongo a kà dila jingololo.

³ O mu kuívua o mixindu ia ikoto ia jikabalu jâ ja nguzu, ni jibuia ja makalu mâ, ni kunumina kua malola mâ; jitata a lembua kubhanga kioso kʼiandalele tuana tuâ mukonda dia (kubulukuta) kua maku mâ.

⁴ Mukonda dia kizuua kia mu kuiza phala kubuikisa o akua Fidíxia oso, phala kubatuila ku Tilu, ni ku Sidone, mbebhu ki kuize athu mu ku a kudila; mbata Jihova ua-nda kujikinisa akua Fidíxia, ió oso a subhuka mu kikolo kia Kafitoli.

⁵ Ngaza kua muʼiza kabhuetete, Axikilone a mu vuza kumoxi ni masubhu a dikolo diê; katé-phe bhebhi bhu u suka ni ku di tandujula?

⁶ Éhʼê! Xibhata ia Jihova, tata! Eie ua-nda kunhoha katé bhebhi? Vutuka mu kizu kié, nhoha, tululuka muene!

⁷ Eie-phe u nhoha kiebhi, se Jihova muene ua ku bhana ngonge ia kuzoka ni Axikilone, ni ndundu ja musanza ua kalunga? Bhobho-phe bhene bhua kuxindila.