Jelemiia 46 - O Mikanda Ikola

Muzambu uaiibha phala miji ia vulu. Polofeta u zambula ima ia fuama kua Ijitu

¹ O kizuelu kia Jihova, kieza kua Jelemiia, dia polofeta, kia kuzoka ni akua jixi.

² Ku mbandu ia Ijitu, kia bilulukila kifuẋi kia Falaó dia Neku, sobha ia Ijitu, kifuẋi kiê kia kexile bhu mbandu ia honga ia Ufalate, bhu Kakemixi; kifuẋi kia jibhile Nabukodonozolo, sobha ia Babilonha, mu muvu ua kauana ua Nzuakí, monʼa Joziia, sobha ia Juda:

³ Exi: Zakelenu o ngubu iòfele ni ia dikota muize ku ita.

⁴ Tenu makomola ku jikabalu mu sambele, enu mu asambedi a jikabalu tukulukenu ni jikapasete ja kuxitila mítue, o matoma menu zelesenu-nâ, zuatenu ivunga-thulu.

⁵ Mukonda diahi nga mu mona akua uoma kubhana-ku makunda? Mazonda mâ a ma tolola, o mu kulenga ka mu tala dingi kuema; kuma uoma uavulu ua a kuata ku mbandu joso— Jihova ua ki tange.

⁶ Ua lenguluka ka lenge, o ió uala dizonda ka subhuke; ku mbandu ia kusuku, bhu ndundu ia honga ia Ufalate bhene bhua dibhukanena ia a-di-bhale.

⁷ Nanhi muenhú, uiza ni kubanda kala honga ia Nilu, ua bhingi menha mê ma kunguluka kala ma jingiji?

⁸ Ijitu muene ua mu kuiza ni kubanda kala Nilu, o menha mê ene ala mu ku kunguluka kala a jingiji; kuma muene uixi: Nga-nda kubanda, nga kà vungina ixi, nga kà jikinisa o mbonge ni oso a tungu momo.

⁹ Enu jikabalu bandenu, enu mu makalu numinenu, mazonda ende ni kutunda; akua Itiiópia ni akua Pute ejiia kubhânga ni ngubu, ni akua Lida ejiia kubhânga ni kuoleka o mufula.

¹⁰ Mbata o kizuua kiki kiene o kizuua kia Ngana, kia Jihova dia Ifuẋi, kizuua kia kuvutula phonzo phala nʼa vutule ditota ku jinguma jê; o xibhata ia kà dia, ia kʼekuta, ia kà kodiua ni manhinga mâ. Mbata Jihova dia Ifuẋi, o Ngana,— uala ni kilumbu mu ixi ia kusuku, bhu mbandu ia ngiji ia Ufalate.

¹¹ Banda ku Ngiliiade, ua kà tambule maji ma dizumba eie u muzeletete, u monʼa kilumba ua Ijitu; milongo né ua i vudisa, kingoho; eie o ku disanza ku ku mono dingi!

¹² Miji ioso dilebhu dié evu ku di zuela, o ngongo iezala ni mikole-kole ia kudikola kué; mukonda dizonda ua di bhukana ku dizonda, kiiadi kiâ ia a dibhalela kumoxi.

¹³ Kizuelu kia tangele Jihova kua Jelemiia, polofeta, ku mbandu ia kuiza kua Nabukodonozolo, sobha ia Babilonha, phala kujimisa o ixi ia Ijitu.

¹⁴ Exi: Tuienu mazelele mu Ijitu, kiki ivisenu-kiu bhu Mingidole, jimbulenu-kiu a kivue mu Nofe ni mu Tafane; tangenu, muexi: Di bhakule, u di lunge; mukonda o xibhata ia di kiá kioso kia ku kexile mu jimbandu jé.

¹⁵ Kia bhiti kiebhi mazonda mé oso a a te bhoxi? A lémbua kuimana mukonda Jihova muene ua a tolojola.

¹⁶ Ua sokolola ió a kexile mu ku di bhukana; ene uâ a di bhala-bhala iú ku thandu dia mukuá, iú ku thandu dia mukuá, ia a di zuelesa, exi: Balumuka, phala tu vutuke kuembu dietu, mʼoxi mua tu vualela, mukonda dia xibhata ia tu phopheka.

¹⁷ Anga a di kola bheneʼobho, exi: Falaó, sobha ia Ijitu, ua di bhangiʼé ngó muxindu ua hatu; kuma kithangana kia xindile ua ki bhitisa.

¹⁸ Sobha ua bhingi dijina diê muene Jihova dia Ifuẋi, uambe uixi: Eme ngi nangenena! Kuma ni kidi kiene, kala kiala o mulundu ua Tabolo bhu kaẋi ka milundu ni mulundu ua Kalamelu bhu mbandu ia kalunga, kiene kià kʼeza muene.

¹⁹ Eie-phe di lunge, phala kuia ku ubhika, eie u thungi, u monʼa kilumba ua Ijitu; mukonda Nofe a-nda kuà mu sengulula, ua kà uama kala makala ma túbhia katé ki mua kà tena dingi kutunga muthu uoso-uoso.

²⁰ Kangombe ka mukaji ka uabha kinéne, eieʼmuène u Ijitu, maji, tala, kibuika kié kí kiza kiá, kia mu tundila ku suku.

²¹ Katé ni masoladiʼé a ku futila, edi kala tungombe tua nete, tuʼòbhange mu kaxi ké; maji enhá ue a bhe-ku makunda ia a lengela kumoxi; a lémbua kuimana, kuma o kizuua kiâ kia kusenguluka kia bhiẋila kumoxi ni kithangana kiâ kia ku a zungila.

²² O dízui diâ dia kèla kala mulokoso ua nhoka ia mu lenga; kuma nguma jê a kà di lukula ni kifuẋi kia masoladi, a-nda ku muʼendela ni makuua kala akua kuxanga jihuinhi.

²³ Ditutu diê dia xitile, ki di ẋkina ku di bokona, a di kokela-bhoxi Jihova ua ki tange, mukonda a beta o kudivualulula kihoho ndenge; ka ẋikina ku a tanga.

²⁴ O monʼa kilumba ua Ijitu, sonhi ja mu kuata; kuma a mu bhakula bhu lukuaku lua kifuẋi kia akua suku.

²⁵ Jihova dia Huxi, Nzambi ia Izalaiele, uixi: Talesa, Amoni dia Nó nganda ku mu zungila, ni Falaó, ni Ijitu ni jinzambi jâ, ni jisobha jâ; ni Falaó muene, ni oso a dielela kua muene.

²⁶ Anga ngà ka a bhakula bhu lukuaku lua iá a bhindamena ku a jibha, bhu lukuaku lua Nabukodonozolo, sobha ia Babilonha, ni bhu lukuaku lua abhikʼê; maji hádia u tunga dingi kala mu izuua iê ia ukulu, Jihova ua ki tange.

²⁷ Eie-phe Jakobo, dia mubhikʼami, ku kale ni uoma, mba u kala ni kimbuua eie Izalaiele; mukonda eme nga-nda ku ku bhuluila muene dikanga, o mbutu ié ngi i bhuluila muene ku ixi ia ubhika uâ; o Jakobo hádia u vutuka, anga ua kà nhoha, u tuluka muene, ki bhua kà kala muthu u mu kuatesa uoma.

²⁸ Eie ku kale ni uoma, mubhikʼami Jakobo, Jihova ua ki tange, uexi: mukonda eme ngala ni eie; mbata miji ioso mu nga ku takuila, nga-nda ku a jima o mbutu; maji eie phe, ki nga-nda ku ku jikinisa, inda nga-nda ku ku bhana kaxtiku ké mu kizongelu kia tokala, kuma ki nga-nda ku kuila ngixi mu mulonga eie ue uabhu-mu muene.