Jelemiia 45 - O Mikanda Ikola

O njimbu ia Jelemiia kua Mbaluke

¹ O maka a zuela Jelemiia, dia polofeta, kua Mbaluke, monʼa Nediia, kioso muene kia kexi mu kusoneka maka ió, mu divulu, ku dikanu dia Jelemiia, mu muvu ua kauana ua Nzuakí, monʼa Joziia, sobha ia Juda, uixi:

² O Jihova, Nzambi ia Izalaiele, ku mbandu ié eie, Mbaluke, ua tange, kuila:

³ Eie, uambe, uixi: Kindala, kokolo diami, tatʼé! Kuma ku thandu dia hadi i ngala kumona, Jihova ua ngi ueza-ku dingi dilamba! Nga zondo ni kukema kuami, nhohenu nga di lémbua.

⁴ Eie-phe u mu tangela kiki: Jihova uambe, uixi: Tala, kioso ki nga tungu, ngi ki bula; o kioso ki nga phaphe, ngi ki vuza; kienhiki muene mu ixi ioso muenhumu.

⁵ Eie anga uia ni kusota maunéne? Kana ku a sota; Mukonda nga-nda kubheka kuiibha ku thandu dia xitu ioso, eme ngi Jihova, eie-phe o muenhu ué uene u nga-nda ku ku bhana kuma iene o mbole ié kuoso-kuoso ku u di texila.