Jelemiia 44 - O Mikanda Ikola

Ku kuatesa uoma o jijudé joso ja lengela mʼoxi ia Ijitu

¹ O Kizuelu kieza kua Jelemiia, ku mbandu ia jijudé joso, ja tungu mʼoxi ia Ijitu, a kexile bhu Mingidole, ni bhu Tafane, ni bhu Nofe, ni mʼoxi ia Patulu, kiexi;

² Jihova dia Ifuẋi, Nzambi ia Izalaiele, uambe kiki: Enu mua di muena o kuiibha kuoso ku nga lauila ku thandu dia Izalaiele ni ku thandu dia jimbonge joso ja Juda; talenu, leluʼidi ja di bhange jingundu ki bhuala muthu u tunga-mu.

³ Mukonda dia kuiibha kuâ kua bhanga jinga, phala ku ngi thathamesa, kioso kiʼàia jinga mu kuoha uasu ua dizumba ni kudiundila jinzambi jengi, ja bhingi ene ka jʼijidile ngó, né ene, mba enu, mba o jitata jenu.

⁴ Eme-phe, abhikʼami oso, o jipolofeta, nga mi tumikisa-nâ, ngi di meneka mu ku a tumikisa ku mi tangela, kuila: Tatʼenu! Kana kubhanga kiki kia bolo ki nga ibhila eme.

⁵ Maji ene nguâ kubhana mátui; mba a bheteka dítui diâ nʼa diele ima iâ ia ibha, nʼehe kuia ni kuoha uasu ua dizumba ku jinzambi jengi.

⁶ Njinda iami-phe ni kutema kuami anga i di lundulula hé i uamena mu jimbonge ja Juda ni mu jinzunga ja Jeluzaleme; jene jí ja kituka ixi ia kisekele, ja biluka jingundu, kala ki kia di monekena mu lelu.

⁷ Kiki-phe, Jihova, Nzambi dia Ilombo Ieta, Nzambi ia Izalaiele, uambe kiki: Enu muenhu uenu mu u bhangelaʼhi kuiibha kua soko kiki! Kia mi bhangesa o kuzangula o diiala ni muhatu, ni mona-ndenge ni iú uala hanji ku mele anga mu a katula mu kaxi ka Juda hé mu fula ku xa-mu ngó muthu uosouoso u subhuka.

⁸ O ki mua-nda ku ngi thathamesa ni ikalakalu ia maku menu, kioso ki muʼoha uasu ua dizumba ku jinzambi jengi mʼoxi ia Ijitu, mu mua bokona, enu, phala kunhunganena-mu, mbebhu kʼenuʼenu mua-nda ku di jimisa o mbutu anga mu di bhanga mu akua mázui ni lusebu mu kaxi ka miji ioso mu ngongo?

⁹ Kuiibha kua jitata jenu mua ku jimbi kiá, ni kuiibha kua jisobha ja Juda, ni kuiibha kua ahetuʼâ, ni kuiibha kuenu enuʼenu, ni kuiibha kua ahetuʼenu, kua bhangela jinga mʼoxi ia Juda ni mu jinzunga ja Jeluzaleme?

¹⁰ Nguâ ku di tolesa katé mu kizuua kia lelu, mba a kala ni uoma, mba enda mu ngonge iami, mba mu itumu iami i nga te bhu pholo ienu ni bhu pholo ia jitata jenu.

¹¹ Kala kiki, Jihova dia Ifuẋi, Nzambi ia Izalaiele, uambe kiki: Talenu, pholo iami nga-nda ku i talesa kokuenu phala ku mi bhanga kiaiibha, Juda dioso nga-nda ku mu vuza.

¹² Nga-nda ku katula o masubhu, a subhuka kua Juda, a te pholo iâ mu kubokona mʼoxi ia Ijitu phala kunhunganena momo, anga a buikila eneʼoso mʼoxi ia Ijitu; a kà di bhala ku xibhata, a kà fua ku nzala; a kà jikinina muene tundé ku mona-ndenge tulé ku muadiakime; ni ku xibhata ni ku nzala kuene kua kà fuila; a kà kituka mbolèle, a ka di bhanga kisunji, ni mázui ni lusebu.

¹³ Mbata oso a tungu mu ixi ia Ijitu nga-nda kua kà a zungila ni xibhata, ni nzala ni dibhebhu, kala ki nga zungila Jeluzaleme.

¹⁴ Katé ki mua kà moneka muthu u bhulaka hé u subhuka ku mbandu ia masubhu a Juda, a bokona mʼoxi ia Ijitu phala kunhunganena momo, hé u vutuka mʼoxi ia Juda, kala ki kia a kexile kinéne muene ku muẋima, o kuvutuka phala kutunga dingi mʼoxi ia Juda; maji kiki-phe ka kà vutuka, kikale kiá ngoho oso a kà bhulaka.

Mundu a di tuna maka ma Jelemiia

¹⁵ Mala oso ejidile kuila ahetuʼâ a mu kuoha uasu ua dizumba ku jinzambi jengi, ni ahatu emanene bheneʼobho, kifuẋi muene kia dikota kumoxi ni mundu uoso ua tungile mu Ijitu, bhu Patulu, a vutuila Jelemiia, exi:

¹⁶ Ku maka ió u ua tu tangela mu dijina dia Jihova, eie ki tua-nda ku ku tumaka:

¹⁷ Kota-kota tua-nda kutumaka kizuelu kia tundu mu kanu dietuʼetuene, tuenda ni kuoha jinga o uasu ua dizumba kua sobha ia diulu ia muhatu, ni ku mu bhakuila makúnua, kala ki tuene mu kubhanga kiá etu, ni jitata jetu, ni jisobha jetu, ni ilamba ietu, mu jimbonge ja Juda ni mu jinzunga ja Jeluzaleme; etu tuene mu kala ni kúdia kua di xala ni kusanguluka, kana-ku ue kuiibha kuoso-kuoso ku tua mono.

¹⁸ Maji tundé kiá ki tueha o kuoha uasu ua dizumba, kua sobha ia diulu ia muhatu, ni ku mu bhakuila o makúnua, ioso muene ia tu kambe, tua diua ku xibhata ni ku nzala.

¹⁹ Etu-phe, kizuua kuẋi, ki tuoha uasu ua dizumba kua sobha ia diulu ia muhatu, etu tua mu bhakuila makúnua, mba ku mu bhangela jimbolo phala ku mu diundila ni ku mu bhanga ujitu ua makúnua, o mala etu anga a kamba ku kala-bhu?

Jelemiia u tanga kaxtiku ka-nda kuiza ku thandu diê

²⁰ Bheneʼobho-phe, Jelemiia uambela kifuẋi kioso, o mala ni ahatu, ni mundu uoso a mu vutuilile kiki, uixi:

²¹ Manhi enu mua fika kuila Jihova ua kambe ku kʼijiia, mba ku muẋima uê ki ki mu bhiti-ku, o uasu ua dizumba u muʼohela mu jimbonge ja Juda, ni mu jinzunga ja Jeluzaleme, enu ni jitata jenu, ni jisobha jenu, ni ilamba ienu, kumoxi ni mundu uoso uala mu ixi?

²² Kí kia bhekela kuila Jihova ue ka tenene dingi kulendukila mu kithangana kia vulu o kuiibha kua ibhangelu ienu ni ima ia isunji i mua bhanga jinga, ixi ienu iú ua i bilula kikangalakata, ia di bhange kima ki kuatesa uoma, ia kituka ixi ia mázui, ki i moneka athu a tungamu, kala ki muala ku i mona leluʼidi.

²³ Mbata enu muʼoha uasu ua dizumba, kuma mua te kituxi kua Jihova, nguenu ku tumaka o dízui dia Jihova, mua fulu kuenda mu ngonge iê ni mu itumu iê, kiene kia mʼijiia kuiibha kuosʼuku kala ki kia di monekena mu kizuua kia lelu.

²⁴ Jelemiia anga uambela dingi mundu uoso ni ahetu oso, uixi: Ivenu kizuelu kia Jihova, enuʼoso mu akua Juda, mua tungu mʼoxi ia Ijitu.

²⁵ Jihova dia Ifuẋi, Nzambi ia Izalaiele, ua mu zuela kiki, uexi: Ni enu ni ahatuʼenu, ki mu ki zuela ngó ni dikanu dienu, maji mua ki bhange muene ni makuʼenu, muixi: Ni kidi kiene tua-nda ku kumbidila muene izuelu ietu i tua tange, ia kuoha o uasu ua dizumba kua sobha ia diulu ia muhatu ni mu mu bhanga ujitu ua makúnua; kiene-phe muene ki mua tona kutanga enu mua kumbidila muene kala ki mua zuela.

²⁶ Uila kiki, ivuenu o kizuelu kia Jihova, enuʼoso mu akua Juda mua tungu mʼoxi ia Ijitu: Talenu, eme ngi loka mu dijina diami dia dikota, eme ngi Jihova, kuila ki mungu dingi dijina diami a di tumbula kuala dikanu dia muthu ua tokala kua Juda mʼoxi ioso ia Ijitu, nʼedi: Ki kola! Jihova a nangenene!

²⁷ Kiki-phe nga-nda ku a langidila, ki phala mbote, maji phala kuiibha; athu oso mua Juda, ala mʼoxi ia Ijitu, a-nda kujikinina ku xibhata ni ku nzala, katé kiʼábhua-mu ene oso.

²⁸ O oso a-nda kua kà subhuka ku xibhata, a kà tunda mʼoxi ia Ijitu mu ku vutuka mʼoxi ia Juda, maji a kà kala ngó ofele mu ku alula. Phala o masubhu a subhuka kua Juda, ia a bokona mʼoxi ia Ijitu phala kunhunganena momo, a kà kʼijiie mba kizuelu kiebhi ki nangenena, mba o kiâ ene mba o kiamiʼeme.

²⁹ O kiki ki mi kala kiene o kijimbuete, eme ngi Jihova, kuila nga-nda ku mi betela bhu kididi kienhiki; enu nda mu kʼijiie kuila ni kidi kiene o maka mami ma nangenena ku thandu dienu phala ku mi bhanga kiaiibha.

³⁰ Jihova phe uambe kiki: Talenu, Falaó dia Hofala, sobha ia Ijitu, nga-nda ku mu bhakula bhu lukuaku lua jinguma jê ni bhu lukuaku lua iá a mu sota ku mu jibha; kala ki nga bhakula Zedekiia, sobha ia Juda, bhu lukuaku lua Nabukodonozolo, sobha ia Babilonha, nguma iê, ua kexile mu mu sota ku mu jibha.