Jelemiia 43 - O Mikanda Ikola

Jelemiia a muʼambata kuala o kifuẋi aia-nê ku Ijitu

¹ Anga ki bhita kuila kioso Jelemiia kia zubha kutangela mundu uoso o kizuelu kia Jihova, Nzambi iâ, kizuelu kia mu tumikisine na-kiu Jihova, Nzambi iâ, ene kiá o maka oso enhó muene a tange muene.

² Bheneʼobho phe Azadiia, monʼa Hozaia, ni Nzuanana, monʼa Kadiiá ni athu oso akua izala, a zuela, a tangela Jelemiia, exi: Eie ua mu tanga makutu; Jihova, Nzambi ietu ka ku tumu kutanga, kuila: Ka bokona mʼoxi ia Ijitu, phala kunhunganena momo.

³ Mbaluke, monʼa Nediia, muene ua mu ku funhisa eie kokuetu, phala u tu bhakule bhu lukuaku lua akua Kaldeia ni a tu jibhe mba a tu tumikisa ku ixi ia Babilonha.

⁴ Nzuanana-phe, monʼa Kadiiá, ka tumaka, mba umoxi ngó ku makota ma ilombo ia masoladi, mba o mundu uoso, o dízui dia Jihova, phala ku kala mʼoxi ia Juda.

⁵ Inda kia di te-ku, Nzuanana, monʼa Kadiiá ni makota oso a ilombo ia masoladi a zangula iá o masubhu a Juda, a vutuka ku jixi joso kua a takuilile phala eze mu kunhunganena mʼoxi ia Juda,

⁶ o mala, ni ahetu, ni tuana tua ndenge, ni anʼa ahetu a sobha, ni mienhu ioso kiá ia xile Nebuzaladane, kabhitangu ka kilangidilu, kua Jedaliia, monʼa Haikane, monʼa Safane, ni Jelemiia muene dia polofeta, ni Mbaluke monʼa Nediia.

⁷ Anga a bokona-nâ mu Ijitu, mukonda nguâ kutumaka o dízui dia Jihova, anga eza katé bhu Tafane.

Jelemiia u zambula kuila Ijitu a-nda ku mu lua kuala Nabukodonozolo hé u mu tambula

⁸ Bheneʼobho kizuelu kia Jihova, anga kʼiza kua Jelemiia, bhu Tafane, kuila:

⁹ Eie nomona ni maku mê, matadi a makota, u ma sueke koxiʼa mavu mu folono iala bhu muelu ua inzu ia Falaó iala mu Tafane, o kioso ki ua a sueka, o mala a akua Juda bhene muene bhua kala.

¹⁰ Anga u a ambela, uixi: Jihova dia Ifuẋi, Nzambi ia Izalaiele uambe kiki: Talenu, nga-nda kutuma, hé ngi katula Nabukodonozolo, sobha ia Babilonha, mubhikʼami, hé ngi ta kiandu kiê kuthandu dia matadi iá u nga sueka, muene balaka iê ia ungana, uà kà iʼòlekela ku thandu dia matadi enhá.

¹¹ Hé ua kʼèza anga ua kà kuama o ixi ioso ia Ijitu: O uoso a muʼambe ku kalunga, ku kalunga; a muʼambe ku ubhika, ku ubhika; a muʼambe ku xibhata, ku xibhata;

¹² Nga-nda kua kà ta mu túbhia o jinzu joso ja jinzambi ja Ijitu; muene ua-nda kuà jiʼoha anga u jiʼambata ku uhutile; o ixi ia Ijitu anga i kemba kiua kala mubidi kia zuata o kizuatu kiê; muenhomo muene, ua kà tunda-mu ni kutululuka.

¹³ O iteka ia Beteseme, iala mʼoxi ia Ijitu, ua-nda kua kà i bula-bula, o jinzu ja jinzambi ja Ijitu hádia ua ká jiʼoha mu túbhia.