Jelemiia 42 - O Mikanda Ikola

Jelemiia u tendelesa athu kuila kʼaie mu Ijitu

¹ Bheneʼobho makota ma ilombo ia masoladi oso, o jikabhitangu, ni Nzuanana, monʼa Kadiiá, ni Jezaniia, monʼa Hozaia, ni mundu uoso tundé ku monʼa-ndenge tulé ku muadiakimi.

² Anga ambela polofeta Jelemiia, exi: Kudionda kuetu ku sonokene kindala bhu pholo ié, u tu diondele kua Jihova, Nzambi ié, ku ene osuʼá subhuka, mbata ku nzungule i tua kexile, tua subhuka tua tolo kiá, kala ki ua mu di muena éʼmuène ni mesu mé.

³ Phala Jihova, Nzambi ié, a tu longese njila i tua fuama kuendela ni kioso ki tua fuama kubhanga.

⁴ Polofeta Jelemiia anga u ambela, uixi: Eme nga mʼivu; tala, eme nga-nda kusamba kua Jihova, Nzambi ienu kala ki mua zuela; o kioso-kioso Jihova kia mi vutuila, eme nga-nda ku mi tangelakiu, ki nga-nda ku mi dingila kima.

⁵ Ene hê a vutuila Jelemiia, exi: Jihova a tu kale mbangi ia kidi ni ufiiele, bhu kaxi ketu, se tu kamba kubhanga kioso kiambe o kizuelu kioso kia-nda ku ku tumikisa na-kiu Jihova, Nzambi ié, kókuetu.

⁶ Kizuelu kiê, ki uabhiʼê mba ki ibhiʼê, dízui dia Jihova, Nzambi ietu, ku tua-nda ku ku tumikisa, diene di tua-nda kutumaka, phala tu muene-ku mbote, mu kutumaka dízui dia Jihova, Nzambi ietu.

⁷ Anga ki bhita kuila, kia zubha kúbhua kuinhi dia izuua, kiene kieza kizuelu kia Jihova kua Jelemiia.

⁸ Anga uixana Nzuanana, monʼa Kadiiá, ni makota oso a ilómbo ia masoladi, o tubhitangu, a kexile-nê kumoxi, ni mundu uoso, tundé ku mona-ndenge tulé ku muadiakimi.

⁹ Hé uʼambela, uixi: Jihova, Nzambi ia Izalaiele, ku mua ngi tumikisa, phala ku bhiẋidisa o kudionda kuenu ku pholo iê, uambe kiki:

¹⁰ Se mu kalenu muene mʼoxi muenhumu kiambote, kuabhu-phe, eme ue nga-nda ku mi tunga, ki nga-nda ku mi bula, kana; nga-nda ku mi kuna, ki nga-nda ku mi vuza; kuma o ku ibha kuoso ku ngène mu ku mi bhanga, kua ngi kuata ku muẋima.

¹¹ Ki mu kale ni uoma ua sobha ia Babilonha, mua mu kuatela o uoma; ki mu kale ni uoma, Jihova ua ki tange, mukonda eme ngala ni enu phala ku mi bhulula, ni ku mi bhangesa kubhulaka bhu lukuaku luê.

¹² Nga-nda ku mi bhanga jihenda, phala muene ue a mi kale ni jihenda, jenu, nda a mi vutule dingi mʼoxi ienu.

¹³ Maji-phe, enu ki muila, muixi: Etu mʼoxi mumu ki tua-nda ku kalamu, hé mu kamba kutumaka o dízui dia Jihova, Nzambi ienu,

¹⁴ muexi: Kana, kota o kuietu ku ixi ia Ijitu, koko ki tua-nda kumona-ku dingi ita, mba tuà kʼevua mbimbi ia koloneta, mba tua kà kala ni nzala ia kudia inda tua kà kala kuneʼoko.

¹⁵ Kiókio-phe hé kiene, ivuenu kizuelu kia Jihova, enu mua subhuka kua Juda: Jihova dia Ifuẋi, Nzambi ia Izalaiele, uambe kiki: Se enu mua jijila ku ta ngoho jipholo jenu phala kubokona mu Ijitu, anga mu bokona momo phala kunhunganena-mu,

¹⁶ mua-nda kuila o xibhata ia mi kuatele uoma, o koko ia-nda ku à mi tula muene mʼoxi ia Ijitu, ni nzala i mua kuatela hele kunu, ia kà kala ni enu mu Ijitu, o kuenhoko kuene ku mua-nda kua kà fuila.

¹⁷ Kienhiki kiene kia-nda kua kà bhita ni athu oso a ta jipholo jâ mu kubokona mu Ijitu phala kunhunganena-mu; a kà fua ku xibhata, ni ku nzala, ni ku dibhebhu; ku eneʼoso ió ki kua kà subhuka muthu mba ku bhulaka muthu, ku kibuika ki nga-nda kubheka ku thandu diâ.

¹⁸ Mbata Jihova dia Ifuẋi, Nzambi ia Izalaiele, uambe kiki: Kala kia lunduluka o njinda iami ni kutema kuami ku thandu dia iá a tungile mu Jeluzaleme, kiene kia-nda kulunduluka o kutema kuami ku thandu dienu, se mu bokona mu Ijitu; anga mua kà kituka mu akua mázui, mu kidiuanu, enhoso a mi zemba, mu kala mu akua lusebu, o kididi kiki, ki mungu dingi mu ki mona.

¹⁹ Jihova ua zuela ku mbandu ienu, eie u masubhu a Juda! Kana kubokona mu Ijitu; ijiienu-kiu mu kidi, kuila lelu nga mi bhela umbangi u mi bhanga kia ibha.

²⁰ Mukonda enu o mienhu ienu mua i tobhesa, kuma mua ngi tumikisa kua Jihova, Nzambi ienu, muexi: Tu sambele kua Jihova, Nzambi ietu; o iene ioso muene i ku tangela Jihova Nzambi ietu, iene muene eie i u tu tangela, etu ni tu i bhange.

²¹ Iene-phe iii i nga mi tangela lelu; maji mu ima ioso ia ngi tumu na-iu muene kòkuenu, enu mua tokoka ku bhana mátui ku dízui dia Jihova, Nzambi ienu.

²² Kikiphe ijiienu-kiu mu kidi, kuila, ku xibhata, ni ku nzala, ni ku dibhebhu, kuene ku mua-nda kua kâ fuila, mu kididi kiene ki mua bhindamena ku bokona phala kunhunganena-mu.