Jelemiia 41 - O Mikanda Ikola

Dijibhilu dia Jedaliia

¹ Anga ki bhita-phe kuila mu mbeji ia kasambuadi, Ijimaiele, monʼa Netaniia, monʼa Elixama, ua tokala ku muiji ua jisobha, ueza kumoxi ni tubhitangu tua sobha, mu ku ejiia, kuinhi dia muthu dieza na-diu kua Jedaliia, monʼa Haikane, bhu Mixpa; ene anga a dia-nê mbolo kumoxi bheneʼobho bhu Mixpa.

² Anga Ijimaiele, monʼa Netaniia, u balumuka, kumoxi ni kuinhi diê dia muthu dia kexi na-diu, anga a kuama Jedaliia, monʼa Haikane, monʼa Safane, ni xibhata, kienhiki anga a jibha ió a mu tele ku ukota ua xi, kuala sobha ia Babilonha.

³ Ijimaiele hé u jibha ue jijudé joso ja kexile kumoxi ni Jedaliia bhu Mixpa, kumoxi ni akua Kaldeia, mala a ita a kexile bheneʼobho.

⁴ Mu kizuua kia kaiadi, anga ki bhita kiki, kuila muene ua jibha kiá Jedaliia, sé muthu ku kʼijiia,

⁵ anga kuiza-phe athu a tundu ku Xikeme ni ku Silu ni ku Samádia; makuinhi nake a muthu, ni miezu iòkonge, ni izuatu ia tandujuka ni mikutu ia batujuka; o bhu maku a bheka maujitu mâ makudia ni uasu ua dizumba phala ku uʼambata mʼonzo ia Jihova.

⁶ O Ijimaiele, monʼa Netaniia, kiʼai mu ku a kauidila, ua ile ni kudila tundé bhu Mixpa; o kia a sange, iú ua ambela uixi: Ndokuenu kua Jedaliia, monʼa Haikane.

⁷ Anga ki bhita kuila, ene kiʼai ni kuenda, katé kia bhixila mu kaxi ka mbonge, Ijimaiele, monʼa Netaniia, ua a jibha, ni muene ni athuʼê a kexile-nâ kumoxi, iú ua a lunduluila mu fiẋi.

⁸ Maji mu kaxi kâ mua kexile kuinhi dia muthu ambela Ijimaiele, kuila: Etu ku tu jibhe; mukonda tuala ni jimbongo ji tua sueka ku makáu, ni tiliku, ni sevada, ni maji ni uiki. Muene ue kiene kia ehela, ka a jibha kala kia jibha o jiphange jâ.

⁹ O fiẋi, mua tele imbi ioso ia jibha Ijimaiele, mukonda dia Jedaliia, iene ia kandele sobha Aza mukonda dia Bahasa, sobha ia Izalaiele; ienhiʼii muene iezalesa Ijimaiele, monʼa Netaniia, ni imbi.

¹⁰ Ijimaiele, anga uʼambata ku uhutile, athu oso a subhukile akexile bhu Mixpa; ku tale anʼa ahetu a sobha, uixi o kifuẋi kioso kia athu a subhukile bhu Mixpa, a bhele Nebuzaladane kabhitangu ka kilangidilu kua Jedaliia, monʼa Haikane; ene osuʼâ, Ijimaiele, monʼa Netaniia ua ambata ku ubhika anga uia-nâ phala ku di bunda ku anʼa Amone.

¹¹ Nzuanana, monʼa Kadiiá, kioso kievu, kumoxi ni makota oso a ilombo ia masoladi a kexi-nê kumoxi, o ku ibha kuosʼuku kua bhange Ijimaiele, monʼa Netaniia,

¹² a katula mala oso a kexile na-u, hé aia mu kulua ni Ijimaiele, monʼa Netaniia, anga a mu sanga bhu mbanduʼa menha a vulu a kala mu Ngibiione.

¹³ Anga-phe ki bhita kiki kuila: Kifuẋi kioso kia kutile Ijimaiele, ki kia mono Nzuanana, monʼa Kadiiá, uala mu kuiza kumoxi ni adiakime oso a ilombo ia masoladi, a kuata kusanguluka.

¹⁴ O kifuẋi kioso kia athu a kutile Ijimaiele bhu Mixpa, kia mu bhe dikunda, anga ki vutuka, kiia kua Nzuanana, monʼa Kadiiá.

¹⁵ Maji Ijimaiele, monʼa Netaniia, kumoxi ni nake dia muthu a lenge, kia mono Nzuanana, anga aia ku anʼa Amone.

¹⁶ Bheneʼobho, Nzuanana, monʼa Kadiiá, kumoxi ni makota ma ilombo ia masoladi, a kexile-nê kumoxi, anga a katula iá a subhuka ku kifuẋi kia tambula kua Ijimaiele, monʼa Netaniia, tunde bhu Mixpa kioso kia jibha Jedaliia, monʼa Haikane, ni mala, makuenze a ita ni ahatu, ni tuana tua ndenge, ni jingolambole a a tambuile bhu Ngibiione.

¹⁷ Anga a katuka, aia mu kutunga bhu Jelute-Kimane bhua zukama ni Beleme, phala bhobho kiá kubokona mu Ijitu,

¹⁸ mukonda dia akua Kaldeia; mbata a a kuatelele uoma, mukonda dia Ijimaiele, monʼa Netaniia ua jibha Jedaliia, monʼa Haikane, a mu tele ku ungana uaʼxi kuala sobha ia Babilonha.