Jelemiia 40 - O Mikanda Ikola

Jelemiia u kala bhu Mixpa kumoxi ni Jedaliia

¹ O kizuelu kieza kua Jelemiia, kia tundu ku mbandu ia Jihova, kioso Nebuzaladane, kabhitangu ka kilangidilu, kiʼambudisa Jelemiia bhu Lama, kioso kia mu katula, kuila muene uala hanji ni malubhambu mê mu kaxi ka ene oso ai ku uhutile a tundu mu Jeluzaleme ni mua Juda, kua ió a ambata ku uhutile ia ai na-u ku Babilonha.

² Mbata o kabhitangu ka kilangidilu uambata Jelemiia iú ua muʼambela, uixi: Jihova, Nzambi ié ua tange divuua didi ku kididi kiki.

³ Jihova phe ua di bheka muene iú ua bhange kala kiambele, mukonda mua te kituxi kua Jihova, nguenu kutumaka dízui diê, kú kua mʼiza ima ioso kala ienhiʼii.

⁴ Kikiphe, tala, nga ku jituna lelu ku malubhambu ma kexile mu maku mé. Se kia ku uabhela kuiza nʼeme ku Babilonha, zá; eme muene nga-nda ku ku langa, maji se ki ki ku uabhela kuiza nʼeme ku Babilonha, kalʼé. Talesa-phe, oxi ioso iala ku mesu mé, bhuoso bhu ua mono bhua ku uabhela, bhua ku iukila ku mesu mé, ndé, u kaliʼé bhenhobho.

⁵ Kuma-phe, muene ka vutukile luua, u muʼambela, uixi: Vutuka kua Jedaliia, monʼa Haikane, monʼa Safane, ió a mu te ku ukota ua jimbonge ja Juda kuala sobha ia Babilonha, phala u tunge-nê mu kaxi ka kifuẋi; o ki uila dingi sai kuma kuengi kua ku uabhela kuia, ndé. Kabhitangu ka kilangidilu hé u mu bhana ni huta ia ku dila mu njila ni mahitula anga u muʼambudisa phala kuié.

⁶ Uenhú o uijilu ua Jelemiia kua Jedaliia, monʼa Haikane, bhu Mixpa, anga u tunga-nê mu kaxi ka kifuẋi kia athu a subhukile mu ixi ia Juda.

⁷ Kioso o makota a ilombo ia masoladi, kumoxi ni mundu uâ, a kexile ku mukáu, kia kʼivu kuila sobha ia Babilonha ua te Jedaliia, monʼa Haikane, ku ukota ua kutumina ixi, ia a mu bhana ue kulangidila mala ni ahatu ni tuana tua ndenge ni jingadiama ja ngadiadia mu ixi, a kambele kuia-nâ ku uhutile mu Babilonha,

⁸ anga eza ku di mona ni Jedaliia bhu Mixpa, a kexile: Ijimaiele, monʼa Netaniia, ni Nzuanana, ni Jonatane, anʼa Kadiiá, ni Selaia, monʼa Tanumete, ni anʼa Ifai, mukua Netofe, ni Jezaniia, monʼa muthu ua tokala bhu Mahaka, ni ene ni mundu uâ.

⁹ Jedaliia, monʼa Haikane, monʼa Safane, anga u a lokela ene ni mundu uâ uixi: Ki mu kale ni uoma ua kubhikila akua Kaldeia; kalenu moxʼumu, bhikilenu sobha ia Babilonha, ima i miʼende kiambote.

¹⁰ Eme-phe nga tungu bhenhabha bhu Mixpa, nda ngi di lunge ni akua Kaldeia oso eza kokuetu; enu-phe endenu ni kubhongolola o vinhu, ni ibundu ia musonoko ua mvula, ni maji, mu i te mu itabhu ienu, nda mu tunge mu jimbonge joso ji mua bhundu.

¹¹ Kiene kimoxi ue ni jijudé joso a kexile ku Mouabhe, ni mu kaxi ka anʼa Amone, ni ku Idomo, ni iá a kexile mu jixi joso jenhojo, kievu kuila sobha ia Babilonha ua xisa-ku o masubhu mua Juda, iú ua a tela-ku Jedaliia, monʼa Haikane, monʼa Safane, ku ungana ua kutumina,

¹² ene oso o jijudé a kexile mu ididi ioso mua a takuilile, a vutuka anga eza mʼoxi ia Juda, kua Jedaliia, bhu Mixpa; hé a bhongolola ndumba dia vinhu ni ibundu ia musonoko ua mvula ni kuvula kuoso.

Ijimaiele u sota kujibha Jedaliia

¹³ Nzuanana, monʼa Kadiiá ni makota oso a ilombo akexile ku mukáu, anga eza kua Jedaliia bhu Mixpa,

¹⁴ anga a mu tangela, exi: Eie ua kʼijiia kiambote kuila Bahali, sobha ia anʼa Amone, ua tumikisa Ijimaiele, monʼa Netaniia phala ku ku katula o muenhu? Maji Jedaliia, monʼa Haikane ngué kuẋikina ia mu zuelela.

¹⁵ Sumbala, Nzuanana, monʼa Kadiiá, ua tangela Jedaliia mu kasuekele, bhu Mixpa, uixi: Nga-nda kuia kindala ni nga kà jibha Ijimaiele, monʼa Netaniia, ki bhua-nda ku kala muthu u kʼijiia; mukonda diahi muene uandala ku ku katula eie o muenhu, o kibuka kioso kia Juda kia di bhongoluela kokué anga ki muangana, o a a subhuka kua Juda hé a jima o mbutu?

¹⁶ Maji-phe Jedaliia, monʼa Haikane, uambela Nzuanana, monʼa Kadiiá, uexi: Kana kubhanga kiokio; mukonda eie ua mu tanga makutu, Ijimaiele ua mu mu tatelʼé ngó.