Jelemiia 4 - O Mikanda Ikola

¹ Se uedi u vutuka, eie Izalaiele, vutukila-phe kokuami, eme ngi Jihova, o ki uila u sondolola isunji ié bhu pholo iami, kua-nda kuenda dingi ni kubungana.

² O ki u loka kuila: Ni Jihova muenhú! Jihova a kole muenhu! mu kidi, ni mu mabatuilu ni mu kuiuka; ni akua jixi jengi-phe a-nda ku di bhanduluila mua muene, mua muene muanda ku di thathela.

³ Mbata Jihova uambela mala ma Juda ni Jeluzaleme, kiki: Dimenu mavu enu a maxinde, ki mu kune jimbutu jenu mu minha.

⁴ Di saiesienu phala Jihova, humbulenu o mabôlo ku miẋima ienu, enu mu mala ma Juda, nʼenu mua tunga mu Jeluzaleme, mua lengesa kuila o njinda iami hinu ki i bambuke kala tubhia, ni tu kuata kulema anga a lembua ku tu jima, mukonda dia usuéia ua ikalakalu ienu.

⁵ Bokenu mu Juda, ivisenu mu Jeluzaleme, muila muexi: Xikenu koloneta moxiʼumu! dikodienu ni dizui dia suina, muixi: Bhongolokenu tu bokone mu jimbonge ja nguzu!

Kubokona kua akua ixi iengi a ku tanga hé a ku jimbulula

⁶ Lekenu mvela mua lungu ku Ziione, lengelenu muenhu uenu; ki mu sukamene; mbata eme nga-nda kuiza ni kisuéia ki tunda ku suku, ni kibuika kiònene.

⁷ O hoje ia fomoka kiá ku muxitu uê, ii banda, ni mubuikixi ua ifuẋi; muene ua katuka kiá, iú ua tundu kiá bhu kididi kiê, phala kubhangesa oxi ié i biluke jingundu; phala ku ku buikisa o madiembu mé, ki bhu kala dingi muthu u tunga-mu.

⁸ Kala kiki zuatenu idinhaji, dilenu dikokolo, endenu ni kukumba mbata o kutema kua njinda ia Jihova ki kua tu eha.

⁹ Jihova uambe, uixi: Kia-nda kubhita muene mu thembu ienhoio kuila o muẋima ua sobha ni muẋima ua ilamba ubotomoka; jinganga ja-nda kubhuuama, jipolofeta ja-nda ku diuana.

¹⁰ Eme bhenhobho ngixi: Èhé, Ngana Nzambi, tata! Kidi kiene o mundu iú ni Jeluzaleme ua a tobhesa kinéne, kuma eie ua ambelele, kuila: Mua-nda kukala ni kutululuka; o kikiphe xibhata i ia a toma katé ku muenhu.

¹¹ Mu kithangana kinhá a kʼàmbela mundu iú ni Jeluzaleme kuamba: kitembu kia thothuena kia tundu bhu thala ia kikangalakata, kieza mu njila ia monʼa muhatu ua mundu uami, kí kieza phala ku bhiata, kí kieza phala ku zelesa.

¹² Kitembu kia nguzu ia kibhungu kia-nda ku ngi kana muene: kiki eme ue nga-nda ku tubhula maka ma ku a fundisa milonga.

¹³ Talesa, muene ua-nda kuiza ni kubanda mukua ni matuta, ni makalu mê mukua ni ngûngu; ʼkabalu jê mu sangama jiholokoko ndenge ku lusolo. Kokolo dietu, etu tua buikʼó!

¹⁴ Sukula o muẋima ué ku usuéia, eie u Jeluzaleme, nda u tene kubhuluka; katé bhebhi u jijila momʼué o ixinganeku ié ia ibha?

¹⁵ Mbata dízui dia dikola dia tokomoka tundé mu Dane, dʼivisa o divuua tundé ku mulundu ua Ifalaimi.

¹⁶ O kiki kolenu-kiu ku akua jixi, ivisenu-kiu kuma Jeluzaleme a mu bilukila: o ku ixi ia makanga kuene kua-nda ku tunda ió oso a-nda ku mu kondoloka, hé a kà zangumuna o mbimbi iâ, mu kubilukila o jimbonge ja Juda.

¹⁷ Jihova ua tange, uixi: A-nda ku mu kondoloka mbandu ni mbandu kala alangidi a díbhia; mukonda muene ua ngi balukila.

¹⁸ O uendelu ué ni ikalakalu ié iene ia ku seiela ima ienhiʼii: o kiki kiene o kikuma kié, o kulula kue kuavulu ku ku bhixila katé ku muẋima.

¹⁹ Uá! Vumu diami, vumu diami, tata! A ngi kuama ku muẋima uami! muẋima uami iú lunguta! ku di xibha nga lembua; mukonda o muenhu uami koloneta ua ivué ni milolo ia ita.

²⁰ Kutunda kibuika kuiza kibuika ni kubhana jingolokela, kuma oxi ioso ió buikise kiá; nga tukumuka ngó o jibalaka jami ni jikortina a ji jikinisa, muʼanzanzʼumu!

²¹ O mvela i ngi kala ku mesu katé bhebhi? Katé bhebhi ni kuivua o mutendu ua koloneta?

²² Ni kidi kiene o mundu uami a dianguka, ka ngijiia dingi; a di bhange mizunda ia ana, ka dimuka kana; ala ngó ni unjimu ua ku bhanga phulu, kejiiâ kubhanga mbote, lémbue.

²³ Nga kengelela oxi nga i mono iòbuikise i iezala jingundu; nga kengelela madiulu, ki mala ni mukengeji.

²⁴ Tala, nga kengelela milundu, nga i mono i teketa; o malundu me moso ma di nhika-nhika.

²⁵ O ki ngedi sûi, nga mono ki muala muthu, katé ni jinjila joso bhulu ja lenge-mu.

²⁶ Nga mono ue kuma oxi ia vudila kuima, ia xala kikangalakata, o jisanzala jê joso a ji bulabula bhu pholo ia Jihova, ni kutema kua njinda iê.

²⁷ (Mbata Jihova uambe, kiki: Oxi ioso ienhiʼii a-nda ku i buikisa; maji, kana, ki ngi i jikinisa xata-babá!)

²⁸ O kiki kia-nda ku didisa oxi, o madiulu bhulu a-nda kuvunda; kuma kiene ki nga zuela, kiene ki nga kane, ki nga tolola dingi o thulu (kudiela), ki nga-nda ku ki lungulula dingi.

²⁹ Ku mutendu ua akua jimonde ni ifanda ia mifula, jisanzala joso muene ja-nda kulenga; a-nda kuia mu mazalakata, ni ku kanduka ku matadi; jisanzala joso ja-nda ku xala jingundu, ki bhu kala dingi muthu u tunga-mu.

³⁰ O ki ualʼokio ua-nda kubhanga-phe kiebhi, eie a ku sengulula? Né-mbe, u zuata thanga jikusuka, né-mbe u di ta makembu ma ulu, né-mbe u di teka mu mesu ni antimonio, kua-nda kuuabha dingi, né ngó, jimbuẋila ja ku buakulula kiá, ka kuandala dingi, ia sota kiáʼ ku katula o muenhu.

³¹ Mbata ngala kuivua kiá mbimbi mukua ni muhatu uala ku isenda, mika kala ia ió u vuala mona ua phande-kumbi; diene o dizue dia mona Ziione ua muhatu, uiza ni kuhaha, iú ua mu sunununa o maku, uixi: Uaué! Kindala kokolo diami: mukonda o muenhu uami uambuka bhu pholo ia ijibhanganga!