Jelemiia 39 - O Mikanda Ikola

Nabukodonozolo u tolola o mbonge ia Jeluzaleme

¹ Mu muvu ua kavua ua Zedekiia, sobha ia Juda, bhu mbeji ia kakuinhi, Nabukodonozolo, sobha ia Babilonha anga uiza ni kifuẋi kiê mu kúlua ni Jeluzaleme, mbonge anga u i konda.

² Mu muvu ua kakuinhi ni umoxi, ua Zedekiia, bhu mbeji ia kauana, mu kizuua kia kávua ku mbeji, kiene kia bulu o lumbu lua mbonge.

³ Anga makota oso a sobha ia Babilonha a bokona hé emana bhu muelu ua dikaẋi, enhá: a ngana Nenga-Sazele, Sanga-Nebu, Xasekime, Labe-Sadi, Nenga-Sazele, Labe-Make, ni akuá eneʼoso makota ma sobha ia Babilonha.

⁴ Anga ki bhita kuila, Zedekiia-phe, sobha ia Juda, kioso kia a mono, kumoxi ni makuenze mê moso ma ita, a lenge, anga a tunda ni usuku mu mbonge, a di tela njila ia kadíbhia ka sobha, bhu dibhitu diala bhu kaxi ka malumbu ma iadi, anga u tunda u di ta mu njila ia kiphenza.

⁵ Maji-phe o kifuẋi kia masoladi ma akua Kaldeia, ki a kaiela, anga Zedekiia a mu kuatela mu dinhana dia Jedikó, hé a mu kuta, anga a mu tumikisa kua Nabukodonozolo, sobha ia Babilonha, bhu Dibalah, mʼoxi ia Hamate, anga u mu fundixila mueneʼomo.

⁶ Anga sobha ia Babilonha u jibha ana oso a Zedekiia, bhu Dibalah bheneʼobho, Zedekiia iú tala muene ni mesu; o ilamba ioso, makota mua Juda, sobha ia Babilonha ua a jibha ue ene oso.

⁷ Hé u tufula mesu a Zedekiia, u mu kuta ni malubhambu aiadi a ngondo, phala kuia-nê ku Babilonha.

⁸ Akua Kaldeia anga oha inzu ia sobha mu túbhia ni jinzu ja mundu uoso, o imbaka ioso ia Jeluzaleme hé a i bula.

⁹ O tumbalu-mbalu tua subhuka mu mbonge ni iá kiá a tundile ku mbandu iâ ia a di bundile ku jinguma, kumoxi kiá ni iá a subhuka ku mundu, Nebuzaladane, kabhitangu ka kilangidilu, uainâ ku Babilonha.

¹⁰ Maji oso ió jingadiama, mu athu, ka moneka kima, Nabuzaladane, kabhitangu ka kilangidilu, ua a xisa mʼoxi ia Juda; anga u a bhana mábhia ma mivide ni mikáu mu kizuua kieneʼokio.

Jelemiia a mu bhulula

¹¹ Maji o Nabukodonozolo, sobha ia Babilonha, ua tendelele Nabuzaladane, kabhitangu ka kilangidilu, ku mbandu ia Jelemiia, uixi:

¹² O mesu mé ta na-u kua muene, u mu katule, kana ku mu bhanga ku ibha kuoso-kuoso; inda uila kioso muene kia ku tangela, eie kiene ki u mu bhanga muene.

¹³ Kienhiki kiene Nabuzaladane, kabhitangu ka akua kulanga, kia tumina, anga Nebuzahabane, ni Labe-Sadi, ni Nenga-Sazele, ni Labe-Make, ni makota oso a sobha ia Babilonha,

¹⁴ a tuma ku katula Jelemiia mu lumbu lua kilangidilu, hé a mu bhana kua Jedaliia monʼa Haikane, monʼa Safane nda a muʼambate kʼonzo iê; muene hé u kala mu kaxi ka mundu uoso.

O kudielela kua Ebede-Meleke

¹⁵ Tala, kizuelu kia Jihova kiejile kua Jelemiia, kioso kia mu jika hanji mu lumbu lua kilangidilu, kiexi: Ndé, u tangele Ebede-Meleke, mukuá Itiiopia, uixi:

¹⁶ Jihova dia Ilombo Ieta, Nzambi ia Izalaiele uambe kiki: Tala, eme nganda kubheka maka ami ku thandu dia mbonge iii, ki phala mbote, kana, maji phala kuiibha; anga kizuelu kiami kia kà tenena muene bhu mesu mé mu kizuuʼokio.

¹⁷ Eie-phe, mu kizuuʼokio, nga-nda ku ku bhululʼé muene, eme ngi Jihova, bhu maku ma iá a ku kuata uoma ku a tala ngó pholo, ka-nda ku ku bhakula-bhu.

¹⁸ Mukonda ni kidi kiene, nga-nda ku ku bhulula, o ku xibhata kua kà di bhala-ku; maji o muenhu ué uene ua-nda ku kala o mbole ié, mukonda ua dielela kokuami, eme ngi Jihova.