Jelemiia 38 - O Mikanda Ikola

Jelemiia a mu ta mu kiboiongo

¹ Anga a kʼivua kua Sefatiia, monʼa Matane, ni Jedaliia, monʼa Paxulu, ni Jukale, monʼa Selemiia, ni Pazulu, monʼa Malkiia, o maka oso Jelemiia a kexi mu tangela mundu, uixi:

² Jihova uambe kiki: Uoso u xala mu mbonge mumu, ua-nda kufua ku xibhata, ni ku nzala ni ku kipheku; maji uoso uia ku akua Kaldeia ua-nda ku kola muenhu; mukonda o muenhu uê, uene kiá ua-nda ku kituka kibhundile kiê, hé u laia.

³ Jihova uambe kiki: O mbonge iii ni kidi muene, a-nda ku i bhakula bhu lukuaku lua kifuẋi kia masoladi a sobha ia Babilonha, o muene anga u i tolola.

⁴ Makota hé ambela sobha, exi: Muthu iú a fue, kuma muene mu ku bhanga kiki, uala kubhuidisa o maku ma athu a fuama kúlua ita a subhuka hanji mu mbonge mumu, ni maku ma kifuẋi kioso mu ku a zuelela maka a di fu kiki; mukonda o muthu iú kala mu sota kutululuka kua kifuẋi kiki, maji phulu ngó.

⁵ Sobha Zedekiia-phe, uixi: Talenu, muene uelʼé kiá bhu makuʼenu; mukonda sobha ka tena kulenda kima kioso-kioso ki mi bhanga enu kia ibha.

⁶ Bheneʼobho, Jelemiia a mu kuata, a mu takuila mu kiboiongo kia Malkiia, monʼa sobha, kia kexile mu lumbu lua kilangidilu; Jelemiia hé a mu zezesa ni mikolo; maji mu kiboiongo ki mua kexile menha, inda maloua ngó; Jelemiia hé u kuzuka mu malôua.

⁷ Ebede-Meleke, mukua Itiiopia, o ngolambole, ua kexile mʼonzo ia sobha, anga u kʼivua kuila Jelemiia a mu te mu kiboiongo (kieneʼokio-phe sobha ua xikama bhu muelu ua Bejamí);

⁸ kithanganʼokio, Ebede-Meleke u tunda mʼonzo ia sobha uia mu kutangela sobha, uixi:

⁹ Sobha, tata! Ngana iami! Athu iá a bhange kia ibha muene ku ioso ia bhange kua Jelemiia dia polofeta, o ku mu ta mu kiboiongo; ku tanga o kidi, bhu kididi bhua mu teʼobho, ua-nda kufua ni nzala, mukonda mu mbonge kana-mu dingi jimbolo.

¹⁰ Bheneʼobho-phe, sobha u tendelela Ebede-Meleke, mukua Itiiopia, uexi: Katula-ku makuinhi a tatu a muthu bhabha, nda u katule Jelemiia, dia polofeta, mu kiboiongo, kiosuʼiki kiluua a fua ni nzala.

¹¹ Anga Ebede-Meleke u katula athu, uia mʼonzo ia sobha, bhoxi dia dilundilu dia jimbongo ja sobha, anga u katula-mu itetele ia makoza, okulu kiá, a kuka, ni izuatu muene ia tandujuka, hé u i zezesa ni mikolo kua Jelemiia, uala mu kiboiongo.

¹² Ebede-Meleke, mukua Itiiopia, anga uambela Jelemiia, uixi: Ta kindala o makoza iá, a kuka, a tandujuka, a bolo kiá, mu jihábia ja maku mé, mikolo i bhite ku thandu dia makoza. Jelemiia kiene kia bhange.

¹³ Jelemiia anga a mu sunga ni mikolo, a mu katula mu kiboiongo; hé u kala mu lumbu lua kilangidilu.

Zedekiia u bhinga kaiula kua Jelemiia

¹⁴ Kieneʼokio sobha Zedekiia u tuma ku muʼixana, o Jelemiia, polofeta, anga uiza bhu pholo iê, bhu muelu ua katatu, ua kexile kʼonzo ia Jihova; o sobha anga uambela Jelemiia, uixi: Nga kuʼibhula kima kimoxi, kana ku ngi suekela kima.

¹⁵ Jelemiia hé uambela Zedekiia, uixi: Eme ki ngi ku jimbuila-kiu, ni kidi kiene, eie kua-nda ku ngi jibha? O ki ngi ku bhana kaiula, eie uanda ku ngʼivua?

¹⁶ Bheneʼobho, mu kasuekele, Zedekiia ua lokela muene Jelemiia, uixi: Ki kola! Jihova a nangenene, ua tu bhange o muenhu iú, kuila eme ki nga-nda ku ku jibha, kana, mba ngi ku bhakula ue bhu maku ma iá a mu kenga ku ku jibha.

¹⁷ Jelemiia-phe uambela Zedekiia, uixi: Jihova, Nzambi ia Ilombo Ieta, Nzambi ia Izalaiele, uambe kiki: Se uia mu ku di bhakulʼé é-muene kiluelu ku ilamba ia sobha ia Babilonha, kuabhu-phe, eie ua-nda ku kola muenhu, o mbonge iii ka-nda ku ioha mu túbhia, enu mua-nda kulaia nʼeie ni dibhata dié.

¹⁸ O ki uila nguami kuia ku makota a sobha ia Babilonha, kuabhu-phe, o mbonge iii a-nda ku i bhakula bhu lukuaku lua akua Kaldeia, ene anga a i oha mu túbhia, eie-phe kua-nda kusubhuka bhu makuʼâ.

¹⁹ Sobha Zedekiia hé uambela Jelemiia, uixi: Ngala ni hele ia jijudé a lengela ku mbandu ia akua Kaldeia; a soko-bho ku ngi bhakula bhu maku mâ nʼa ngi bhange kasekelu.

²⁰ Jelemiia uixi: Ka-nda ku ku bhakula. Nga ku diondo, ivua dízui dia Jihova, kala ki ngala ku ku tangela na-diu; se u dʼivua, ua-nda ku kala kiambote, o muenhu ué ua-nda kulaia muene.

²¹ Maji eie ki uila nguami ku tunda, kizuelu-phe kienhiki, kia ngi londekeza Jihova.

²² Kuma ahetu oso a xala mʼonzo ia sobha ia Juda a-nda ku ambata ku makota ma sobha ia Babilonha; ene uâ, ahetu, a-nda ku ki tanga, exi: Athuʼé ene ku ku tululukisa a ku funhisa ia a ku lende; o kiki kia ku mono inama ia ku kuzuka kiá mu maloua, ene a vutuka kuema.

²³ Kienhiki ahetuʼé oso ni tuana tué a-nda ku ambata kuala Jikaldeu, eiemuène kua-nda kusubhuka bhu maku mâ, inda o lukuaku lua sobha ia Babilonha luene muene lua-nda ku ku kuta, o mbonge iii muene ua-nda ku ioha mu túbhia.

²⁴ Bheneʼobho Zedekiia uambela Jelemiia uixi: Maka iá ki bhu kale muthu u a ejiia, phala eie kufue.

²⁵ Kioso makota kia-nda ku kʼivua, kuila nga zuela ni eie, hé a kuendela, exi: Tu tangele ioso i uambela sobha, kana ku tu suekela-iu, phala etu ki tu ku jibhe; o sobha ua kuambela kima kiahi?

²⁶ Eie-phe u a tangela, uixi: Eme ngʼejile bhu pholo ia sobha mu ku mu dionda, phala ka ngi vutuile mʼonzo ia Jonatane, ni ngi fuile momo.

²⁷ O makota oso kioso kieza kua Jelemiia mu ku muʼibhula, muene ua a vutuila kala kia mu longesa sobha; ene iá a mu xi, mukonda o kikutu ki ki tungunuka.

²⁸ Jelemiia anga u kala mu lumbu lua kilangidilu katé bhu kizuua mbonge ia Jeluzaleme kia i tambuile, kia tambula o mbonge ia Jeluzaleme muene iú hanji mueneʼomo.