Jelemiia 37 - O Mikanda Ikola

Jelemiia a mu ta mu Kaleia

¹ Anga sobha Zedekiia, monʼa Joziia, u hinga ungana bhu kididi kia Jekoniia, monʼa Nzuakí, a mu tele ku usobha ua ixi ia Juda, kuala Nabukodonozolo, sobha ia Babilonha.

² Maji-phe kutale muene, uixi abhikʼê, ni mundu uoso akuaʼxi, ki bhuala ua bhana mátui ku maka a Jihova, a zuelela ku ukunji ua polofeta Jelemiia.

³ Sumbale kiene, maji sobha Zedekiia ua tumikisa Jukale, monʼa Selemiia, ni Sofoniia, monʼa Mahaseia, o nganga, kua polofeta Jelemiia, phala a muʼ ambele, kuila: A tu diondele kindala kua Jihova, Nzambi ietu.

⁴ Kieneʼokio, Jelemiia ua kexi mu kuila u tunda u bokona mu kifuẋi kia mundu, mukonda ka mu jikilile luua mu Kaleia.

⁵ O kifuẋi kia masoladi a Falaó, anga ki tunda mu Ijitu; o kioso akua Kaldeia a kondolokele Jeluzaleme ni ku mu xita mu jimbandu, kievu njimbu iii, a lenga hé Juluzaleme a mu xa.

⁶ Bheneʼobho-phe, kizuelu kia Jihova kiza kua polofeta Jelemiia, kuamba:

⁷ Jihova, Nzambi ia Izalaiele uambe kiki: Sobha ia Juda ua mi tumikisa kokuami, phala ku mu jimbuluila, mua kà mu tangela kiki, muexi: Tala, kifuẋi kia masoladi a Falaó, a tundu mu Ijitu phala kuiza ku mi banda, kia-nda ku vutukʼé mu ixi iâ mu Ijitu.

⁸ Anga akua Kaldeia a kà vutuka mu kúlua ni mbonge iii, hé a i tambula nʼa kà ioha muene mu túbhia.

⁹ Jihova phe uambe kiki: Ki mu tobhese mienhu ienu, ni kuila: Amá! Ki bhuala phata muene! Akua Kaldeia a-nda ku tu xa muene! Mbata ka-nda ku mi xa-phe.

¹⁰ Mukonda, né kiá mu jibha o kifuẋi kioso kia masoladi ma akua Kaldeia, a mu lua ni enu, anga kokuâ ku subhuka ngó òkuame, hanji enhó kala muthu u balumuka mu balaka iê anga uoha o mbonge iii mu túbhia.

Jelemiia a mu kuta hè a mu ta mu ʼaleia

¹¹ Anga ki bhita kiki: Kioso kia mu bhanda o kifuẋi kia masoladi ma akua Kaldeia a mu tunda mu Jeluzaleme, mukonda dia kifuẋi kia masoladi ma Falaó,

¹² Jelemiia u tunda mu Jeluzaleme phala kuia mu ixi ia Bejamí, mu kutambula dikanda diê mu kaxi ka mundu uê.

¹³ Kioso muene kiala bhu dibhitu dia Bejamí, bhua kexile ue kabhitangu ka kilangidilu, dijina diê a muʼixana Jediia, monʼa Selemiia, monʼa Hananiia; muenhú hé u kuta Jelemiia dia polofeta, uexi: Eie ua mu lengela ku akua Kaldeia.

¹⁴ Jelemiia-phe, uixi: Makutu. Ki nga mu lengela ku akua Kaldeia. Maji muene phe nguê ku muʼivua; kienhiki Jediia u kuta Jelemiia, hé uia-nê ku adiakimi.

¹⁵ O adiakimi anga a thathamena kiavulu Jelemiia, hé a mu beta; a mu ta mu kaleia, mʼonzo ia Jonatane, o musoneki; mbata a i bhangele kiá dikuikilu.

¹⁶ Jelemiia kia bokona monzo ia dikuikilu, mu maxilu mê, Jelemiia ua bhange-mu muene ndumba dia izuua.

¹⁷ Sobha Zedekiia anga u tuma ku mueha; sobha hé u muʼibhula, ku kasuekele, mʼonzo iê, uixi: Sai-ku kizuelu kia Jihova? Jelemiia, uixi: Sai. Hé u muʼambela dingi, uixi: Anda ku ku bhakula bhu lukuaku lua sobha ia Babilonha.

¹⁸ Jelemiia hé uambela dingi soba Zedekiia, uixi: Nga te kituxi kiahi kokuʼé, ni ku abhikʼé, ni ku kifuẋi kiki, ki kia mi bhekesa ku ngi ta mu kaleia?

¹⁹ O jipolofeta jenu, ji kuebhi, ja kexi mu ku mi zambuila, kuila: Sobha ia Babilonha ka-nda kuizaku mu kúlua nʼenu mba kúlua ni ixi iii?

²⁰ Kiki-phe eie sobha, ngana iami, ivua ngi kuʼambele: O kudionda kuami ku sonokene bhu mesuʼé ku ngʼehele ku vutukila mʼonzo ia Jonatane, o musoneki, phala ki ngʼize mu ku fuila momo.

²¹ Sobha Zedekiia anga u tendelela kuila Jelemiia a mu tule mu lumbu lua kilangidilu; hé aia ni ku mu bhana mbolo imoxi ku kizuua, ku nzunga ia akua kubhanga jimbolo, katé kiabhu mbolo joso mu mbonge; kienhiki Jelemiia anga u kala jinga mu lumbu lua kilangidilu.