Jelemiia 36 - O Mikanda Ikola

Dilanda dia Jelemiia a di tangela mu thembulu

¹ Anga ki bhita kuila mu muvu ua kauana ua Jehoiakí, monʼa Joziia, sobha ia Juda, kiene kieza kizuelu kiki kia Jihova kua Jelemiia, kuila:

² Katula dilanda dia divulu nda u soneke muenhomo o maka oso u ngène ku ku zuelela, a tokala Izalaiele, ni a Juda, ni a jixi joso tunde mu kizuua ki nga kuzuelela eie, tundé mu izuua ia Joziia ndú mu lelu.

³ Nga fika, kuila, akua dibhata dia Juda, a-nda kuivua ku ibha kuoso ku ngʼandala ku a bhanga, phala muthu ni muthu a diele ku njila jê ja ibha, eme nda ngi loloke kikuma kiâ ni kituxi kiâ.

⁴ Kienhókio Jelemiia anga uixana Mbaluke, monʼa Nediia; Mbaluke anga u soneka maka moso ma Jihova ku dikanu dia Jelemiia, mu dilanda dia divulu, oso a mu tukulukilile na-u muene.

⁵ Jelemiia anga u tendelela Mbaluke, uexi: Eme a ngi kuika; ki ngi tena kubokona mʼonzo ia Jihova.

⁶ Bokona-phe eie, u tange mu dilanda di ua sonekena ku dikanu diami, o maka moso ma Jihova, mu mátui ma mundu, mʼonzo ia Jihova, mu kizuua kia ku jila kúdia; u a tangela ue mu mátui ma akua Juda oso a tunda mu jimbonge jâ, muene mu ua a tangela.

⁷ Amoxi o kudionda kuâ ku sonokena bhu pholo ia Jihova, kala muthu a bhane dikunda ku njila jê ja ibha mukonda njinda ia Jihova ia dikota ni kutema kuê kuene mu ku di londekeza na-ku mu ku bilukila o athu iá.

⁸ Mbaluke, monʼa Nediia, anga u bhanga muene kala kioso kia muʼambela Jelemiia, dia polofeta, anga u tanga mu divuluʼomo maka oso a Jihova, mʼonzo ia Jihova.

⁹ Hé ki bhita, mu muvu ua katanu ua Jehoiakí, monʼa Joziia, sobha ia Juda, bhu mbeji ia kavua, kia kola o ku jila kúdia, bhu pholo ia Jihova, ku mundu uoso mu Jeluzaleme ni ku mundu uoso ua kexile mu ku tunda mu jimbanza joso ja Juda ni kuiza mu Jeluzaleme.

¹⁰ Mbaluke-phe anga u tanga mu divuluʼomo maka oso a Jelemiia, mʼonzo ia Jihova, mu xilu dia Jemadiia, monʼa Safane, o musoneki, mu lumbu lua dikota, bhu muelu ua dibhitu dia inzu ia Jihova, mu mátui ma athu oso.

Dilanda dia Jelemiia a di tangela bhu pholo ia adiakime

¹¹ Mikeia, monʼa Jemadiia, monʼa Safane, kioso kievu maka oso a Jihova mu divulu dieneʼodio,

¹² u kulumuka kʼonzo ia sobha, uia mu xilu dia musoneki; u sanga-mu adiakime oso a xikama mueneʼomo, ene a ngana Elixama, musoneki, ni Delaia, monʼa Semaia, ni Elenatane, monʼa Akebolo, ni Jemadiia, monʼa Safane, ni Zedekiia, monʼa Hananiia ni eneʼoso adiakime a kamukuá.

¹³ Mikeia anga u a tudila maka oso evu kua Mbaluke ku a tanga mu divulu, mu mátui ma kifuxi kioso.

¹⁴ Adiakime oso bheneʼobho, a tuma Jehudi, monʼa Netaniia, monʼa Selemiia, monʼa Kuzahi, ku tangela Mbaluke, kuila: O dilanda di ua tangela mu mátui a Kifuxi, kuata-diu bhu maku, uize kunu. Mbaluke, monʼa Nediia hé u katula o dilanda, u di kuata bhu maku, anga uiza kuala ene.

¹⁵ Anga a mu ambela, exi: xikama, kindala, u di tangele mu mátui etu. Mbaluke anga u di tangela muene mu mátui ma ene.

¹⁶ Anga ki bhita kuila, kia zubha kuivua maka oso enhó, uoma ua a kuata, anga a di lungulukila mudiâ ni ku di iala-iala, hé ambela Mbaluke exi: Ni kidi muene, maka oso iá, sobha tua-nda ku mu tangela-nâ.

¹⁷ Anga ebhula Mbaluke, exi: Kindala tu tangele kioso ki ua soneka maka mosoʼama ku dikanu diêmuène.

¹⁸ Mbaluke anga u a ambela, uixi: Ua ngi tangela muene maka osoʼá ni dikanu diê, eme-ème nga a soneka mu divulu ni tinda.

¹⁹ Bheneʼobho adiakime a tangela Mbaluke, exi: Ndé, ka suame, nʼeie ni Jelemiia; ki bhu kale muthu uijiia bhuoso bhu muala.

Sobha u vubula o dilanda mu túbhia

²⁰ Ene anga aia mu kutangela sobha mu lumbu; maji o dilanda a di bhake mu xilu dia Elixama, o musoneki, sobha iá a mu tangela muene maka oso enhó mu mátui mê.

²¹ Sobha anga u tuma Jehudi nʼa mu bhekele o dilanda, Jehudi anga u di katula mu xilu dia Elixama, o musoneki, anga u di tangela mu mátui a sobha ni mu mátui a ilamba ioso a kexile mu jimbandu ja sobha.

²² (Kieneʼokio-phe, o sobha ua kexile mʼonzo iê ia mbambi, bhu mbeji ia kavua, ua xikama mu kuota bhu túbhia tua mu tudila ku pholo bhu kienga kiala ni makala a uama).

²³ Anga ki bhita kuila Jehudi kia tange-ku kiá mafe a tatu mba a uana a malanda, sobha u katula nivete ia musoneki anga u batula na-iu o dilanda anga u di vubula mu túbhia tuala bhu kienga kia makala katé ʼIanda dioso ki dia jokota mu túbhia tua kexile bhu kienga.

²⁴ O sobha ni abhikʼê oso evu maka enhó, uoma ki ua a kuatele ngó mba a tandula ue izuatu iâ.

²⁵ Sumbala Elenatane ni Delaia ni Jemadiia, a bhingi sobha kuila dilanda ka diohe mu túbhia, maji muene nguê ku a bha mátui.

²⁶ Kiala-bhu kota phala muene, o kutuma dingi Jelamiiele, monʼa Hameleke, ni Selaia, monʼa Azediiele, ni Selemiia, monʼa Abidele, kuila a kute Mbaluke, o musoneki, ni Jelemiia dia polofeta; maji-phe Jihova ua a suekʼâ.

²⁷ Bheneʼobho kizuelu kia Jihova kieza kua Jelemiia, kioso sobha kiʼoha o dila: nda kumoxi ni maka ma sonekena Mbaluke ku dikanu dia Jelemiia, kuila

²⁸ Katula dingi dilanda diengi, u sonekeku o maka oso a kexile ku diodio dia dianga, dioha Jehoiakí, sobha ia Juda.

²⁹ O Jehoiakí, sobha ia Juda, u muʼambela, uexi; Jihova uambe kiki: Eie uoha dilanda didi, uixi: Mukonda dia kuila eie ua soneka-ku mu kubhana jimene, uixi: Ni kidi kiene, sobha ia Babilonha ua-nda kuiza anga u muanga ixi iii nʼa bhangesa kuila ni athu ni iama i batuka-mu?

³⁰ Kala kiki, Jihova uambe kiki kua Jehoiakí, sobha ia Juda: Jehoiakí ka kà kala ni iú u xikama bhu kiandu kia Davidi, o kimbi kiê a kà ki takuila bhu muanha ua dikumbi ni ku mbambi ia kiaúla kia usuku.

³¹ Kikuma kiê-muène ngi ki zungila ku thandu diê ni ku thandu dia mbutu iê ni ku thandu dia abhikʼê; nga-nda kubheka ku thandu diê-muène ni ku thandu dia iá a tungu mu Jeluzaleme ni ku thandu dia athu mu Juda, o ku ibha kuosuʼoko ku ngene mu ku a tangela, ene iá a di tunuʼâ ku ngʼivua.

³² Jelemiia hé u katula dilanda diengi, u di bhana kua Mbaluke, monʼa Nediia, o musoneki, iú ua sonekena-ku, ku dikanu dia Jelemiia, maka oso a divulu dioha Nzuakí, sobha ia Juda, mu túbhia; o kuene hanji kua di tele dingi maka a mukuá a di fu ni enhó.