Jelemiia 35 - O Mikanda Ikola

O kutumaka kua Jilekabita a ku kita phangu phala Juda

¹ O kizuelu kia Jihova kieza kua Jelemiia, mu izuua ia Jehoiakí, monʼa Joziia, sobha ia Juda, kiexi:

² Ndé ku bhata dia Jilekabita, nda u zuele-nâ, ua ambate kʼonzo ia Jihova, uie-nâ mu xilu dimoxi, nda u a nuise vinhu.

³ Hé ngi kuata Jahazaniia, monʼa Jelemiia, monʼa Habaziniia, ni jiphange jê, ni anʼê oso, ni bhata dioso dia Jilekabita;

⁴ anga ngiia-nâ mʼonzo ia Jihova, mu xilu dia anʼa Hanane, monʼa Jingidaliia, muthu ua Nzambi, ualèla bhu xilu dia ilamba, uala ku pholo dia dixilu dia Mahaseia, monʼa Salume, mulangia-dibokuenu.

⁵ Anʼa akua bhata dia Jilekabita, anga ngʼa tudila jinganza jezala vinhu, ni jikopho, ngixi; Nuenu vinhu.

⁶ Maji ene exi: Ki tua-nda kúnua vinhu; mukonda Jonadabe, monʼa Lekabe, tatʼetu, ua tuʼambela, uixi: Ki mungu dingi mu nua vinhu, kixi enu, kixi anʼenu.

⁷ Ki mua kà tunga inzu, mba mu kuna mbutu, mba mu phapha miẋi, mba mu kala ni dibhia dioso-dioso dia mivide; maji izuua ienu ioso mua kâ tunga mu jifundu ja jibalaka, mbé mu kole muenhu mu ndumba dia izuua kulu-dia-mundu, ku muala kuenda ni kunhunganena.

⁸ Tua tumaka-phe o dízui dia Jonadabe, monʼa Lekabe, tatʼetu, mu iene ioso ia tuʼambela; kí kia tu bhekela kuila mu izuua ietu ioso ki tu tena kúnua vinhu, kixi etu, kixi ahetuʼetu, kixi anʼetu a mala, kixi anʼetu a ahatu.

⁹ Ki tua tena ue kutunga jinzu phala ni ji kale dibhata dietu; ki tu moneka ue díbhia dia mivide, mba mukáu, mba mbutu.

¹⁰ Maji tuà tunga mu jifundu ja jibalaka, kienhiki-phe tuevu etu tua bhange kala kioso kia tu tendelela Jonadabe dia tatʼetu.

¹¹ O kioso-phe Nabukodonozolo, sobha ia Babilonha kia bande mu ixi iii, etu tuambe, tuexi: Zenu, tuienu mu Jeluzaleme, mukonda dia ifuẋi, ia masoladi ma akua Kaldeia, ni mukonda dia ifuẋi ia masoladi ma akua Sídia; kuabhu-phe etu tua xalela kiá mu Jeluzaleme.

¹² Bheneʼobho-phe, kizuelu kia Jihova, anga kiza kua Jelemiia kuila:

¹³ Jihova dia Ifuẋi, Nzambi ia Izalaiele, uambe kiki: Ndé, ka tangele mala a Juda ni iá a tungu mu Jeluzaleme: Manhi ki mungu dingi mu xikina ku mi longa, phala ni muivue o maka mami? Jihova ua ki tange.

¹⁴ Maka ma Jonadabe, monʼa Lekabe, a tendelela ku anʼê kuila ka nue vinhu, a a bhake, mbata kanu muene katé mu kizuuʼiki, kia a kala kota evu muene o kijila kia tatʼâ; eme-phe ngène mu mi zuelela enu, ngi di meneka mu ku mi zuelela, enu nguenu ku ngʼivua.

¹⁵ Abhikʼami, jipolofeta, ene oso nga mi tumikisa-nâ, ngi di meneka ni ku a tumikisa, ngixi: Dielenu-phe kindala, muthu a biluke ku njila jé ja ibha, ibhangelu ienu mu i bhange ia iuka, ki mu kaiele jinzambi jengi phala ku ji bhikila; kienhokio mua-ndu kala mu ixi i nga mi bhana enu ni jitata jenu; maji enu nguenu ku ngi bhetekela dítui mba ku ngi tumaka eme.

¹⁶ Mukonda dia kuila anʼa Jonadabe, monʼa Lekabe, a bhake kijila kia tatʼâ, muene kia a tendelela, maji athu iá ka ngi tumaka.

¹⁷ Kienhiki-phe Jihova, Nzambi ia Ifuẋi, o Nzambi ia Izalaiele, uambe kiki: Nga-nda ku bheka ku thandu dia Juda ni ku thandu dia oso kiá a tungu mu Jeluzaleme, ku ibha kuoso ku nga tange ku thandu diâ, mbata eme ngène mu zuela, ene nguâ kuivua; nga kolo kokuâ, ene ka ngʼitaia.

¹⁸ O ku dibhata dia Jelekabita, Jelemiia uixi; Jihova dia Huxi, Nzambi ia Izalaiele, uambe kiki: Mukonda mua tumaka kijila kia Jonadabe, tatʼenu, enu mua bhake ijila iê ioso, enu mua bhange muene kala kia mi tendelesa muene,

¹⁹ kala kiki, Jihova dia Huxi, Nzambi ia Izalaiele, uambe kiki: Kua Jonadabe, monʼa Lekabe, nuka kua kà kamba mona ua diiala, u ngʼimanena jinga bhu pholo iami mu ku ngi talela izuua ioso.