Jelemiia 34 - O Mikanda Ikola

A zambula kia-nda kubhita ni Zedekiia

¹ Kizuelu kia tundu kua Jihova kí kia tula kua Jelemiia, kioso Nabukodonozolo, sobha ia Babilonha ni masoladi mê moso, ni mautuminu moso mu ngongo, a kexile mu ku a tumina kuala muene, ni ifuẋi ioso kia mu lu ita ni Jeluzaleme ni jimbonge jê joso, kiexi:

² Jihova, Nzambi ia Izalaiele, uambe kiki; Ndé u tangele Zedekiia, sobha ia Juda, u muʼambele: Jihova uambe kiki: Talesa, mbonge iii nga-nda ku i bhana bhu lukuaku lua sobha ia Babilonha, o muene ua-nda ku ioha mu túbhia.

³ Eie-phe, kua-nda kusubhuka bhu lukuaku lua muene; inda a-nda ku ku kuta muene anga a ku bhakula bhu lukuaku luê; o mesu mé a-nda kumona muene mesu ma sobha ia Babilonha, o muene ue ua-nda ku ku zuelela muene kanu ni kanu, hé ua kà bokona mu Babilonha.

⁴ Né kieneʼokio, kizuelu-phe kia Jihova ivua-kiu eie Zedekiia, sobha ia Juda; Jihova-phe uambe kiki kokué, uexi: Kua-nda kúfua ku xibhata.

⁵ Uanda kufuʼé muene ni kutululuka, kala kia bhanga jinga kiohele kia jitata jè, o jisobha ja ku diangelelè-ku, kiene ue kia kà kuʼoha eie, anga a kà ku dila muene, exi: Auá! Jihova, tata! Mukonda o kizuelu eme nga ki tange, eme ngi Jihova.

⁶ Anga Jelemiia, dia polofeta, u tudila Zedekiia, sobha ia Juda, o maka mosoʼama, mu Jeluzaleme.

⁷ Kioso masoladi ma sobha ia Babilonha kia mu lua ita ni Jeluzaleme, kumoxi ni jimbonge joso ja Juda ja subhuka-ku: O mbonge ia Lakiji ni ia Azeka; mukonda, ku jimbonge ja di fikidila ja Juda, jiji jene ngó ja subhuka-ku.

Jindumu ja Nzambi mukonda dia ubhika

⁸ Kizuelu kia Jihova kieza kua Jelemiia, kioso sobha Zedekiia kia te kikutu ni mundu uoso ua kexile mu Jeluzaleme, phala ku kola o ufolo.

⁹ Kuila kala muthu ambuidise mubhikʼé ua diiala ni mubhikʼé ua muhatu, uoso hebeleu nʼa tambule ufolo; phala ki bhu kale muthu uenda ni ku a bhikisa, kuma ene uâ jijudé, phange jâ.

¹⁰ Ilamba ioso anga a kʼivua, ni mundu uoso a bokona mu kikutu, kuila kala muthu ehe mubhikʼé ua diiala kala muthu ehe mubhikʼé ua muhatu, a kale jifolo nda ki bhu kale dingi muthu uia ni ku a bhikisa; ene oso a kʼivu-phe anga a eha muene.

¹¹ Maji-phe mu kubhanga kathangana a diela dingi, anga a vutula abhikʼâ a mala ni abhikʼâ a ahatu, ehele kiá anga a a ta dingi ku ubhika ua ku a tumina, mala ni ahetu.

¹² Kizuelu kia Jihova-phe anga kiza kua Jelemiia, ku mbandu ia Jihova, kuila:

¹³ Jihova, Nzambi ia Izalaiele, uambe kiki: Eme nga ta kikutu ni jitata jenu, mu kizuua ki nga a katula mu ixi ia Ijitu, mʼonzo ia ubhika, ngixi:

¹⁴ Kʼibhua sambuadi dia mivu, kala muthu a jitune uoso phangʼiê, hebeleu, a mu sumbisa kokué, iú ua ku bhikila kiá eie mu mivu isamanu, u mu ambudisa ni ufolo kokué; maji phe jitata jenu nguâ ku ngʼivua, mba ku ngi bhetekela mátui.

¹⁵ Leluʼidi-phe enu mua diela, ku ima iambote i mua bhange bhu mesuʼami, mu ku kola o ufolo muthu ni mukuá; enuʼenu phe mua tele ue kikutu bhu pholo iami, mu dibhata diexana mu dijina diami.

¹⁶ Mua biluka-phe, enu mua sebulula o dijina diami, enu mua bhangesa kuila muthu ni muthu u vutukila mubhikʼê ua diiala, o iú u vutukila mubhikʼê ua muhatu, u mua tambuixile kiá ufolo mu vondadi ienuʼanuenu muene; enu mua tona ku a ta dingi bhoxi dia ubhika ni a mi kale abhikʼenu a mala ni a ahatu.

¹⁷ Uila kiki, Jihova uambe, uixi: Enu nguenu ku ngʼivua eme, phala kukola ufolo, muthu u kolela kua phangʼiê, muthu u kolela kua mukuá; kiki-phe, talenu, eme nga-nda ku mi kolela ufolo, Jihova ua kiambe, muia ku xibhata, muia ku dibhebhu, muia ku nzala, anga nga-nda ku mi bhana kala kima ki sasumukisa mautuminu moso mu ngongo.

¹⁸ Athu a bulu kikutu kiami nga-nda ku a bhakula, ió a kambe ku kuatesa kizuelu kia kikutu kia te bhu pholo iami ni monʼa ngombe, a mu uane mu mbandu jiiadi ni ku mu sesa muene mu kaxi ni kaxi.

¹⁹ O ilamba ia Juda, ni ilamba ia Jeluzaleme, ni jingolambole, ni jinganga, ni mundu uoso mu ixi, ua bhiti mu kaxi ka mbandu jiiadi ja monʼa ngombe;

²⁰ ngi ki tanga muene, kuila nga-nda ku a bhakula bhu maku ma jinguma, ni bhu maku ma iá a mu a sotela kalunga kâ, o imbi iâ ia kà kituka kúdia kua njila ja diulu ni iama ia mukáu.

²¹ Katé ni sobha Zedekiia, sobha ia Juda, ni ilamba iê, nga-nda ku a bhakula bhu lukuaku lua nguma jâ ni bhu lukuaku lua iá a mu a sotela kalunga kâ; bhu lukuaku lua kifuxi kia masoladi ma sobha ia Babilonha, a mi lengele kiá enu.

²² O kiki-phe nga-nda kutumina, eme ngi Jihova, anga ngi bhangesa kuila ene a vutukila dingi mu kúlua ni mbonge iii, a lua na-iu muene, hé a i tolola nʼa ioha mu túbhia; o jimbonge ja Juda nga-nda ku ji bhanga jingundu, katé ki ji mono dingi muthu u tungamu.