Jelemiia 33 - O Mikanda Ikola

Ikanenu ia uembu ni kuzediua

¹ Kizuelu kia Jihova anga kiza kua Jelemiia, lua kaiadi, kioso hanji muene kiala a mu jikila mu lumbu lua kilangidilu, kiexi:

² Jihova ua mu bhanga o ima iii, Jihova uala ku i iudika phala o ku i kuatesa, uambe kuila, Jihova diene o dijina diê.

³ Dikole kokuami, nda eme ngi ku vutuile ni ngi ku tudile jimene ja ima ionéne, ia kuata ia kolo, i ua kambiʼeie kuijiia.

⁴ Mukonda Jihova, Nzambi ia Izalaiele, uambe kiki, ku jinzu ja mbonge iii, ni ku jinzu ja sobha ia Juda ja bulu ni matalabuku ni ku xibhata

⁵ Ene anga a di lukula mu kubhânga ni akua Kaldeia, maji-phe phala ngoho ku a ezalesa ni imbi ia athu, u nga kuama mu njinda iami ni mu kutema kuami; mbata mbonge iii nga i suekela o pholo iami mukonda dia ku ibha kuâ kuoso.

⁶ Maji tala-ze, nganda ku bheka ku thandu diâ, kudisanza ni kuiluka anga ngʼa saka muene, anga ngʼa tukuluila jinzungule ja kutululuka ni ja kidi.

⁷ Nga kà songolola uhutile ua Juda ni uhutile ua Izalaiele, anga nga kà a tunga dingi kala ku dimatekenu.

⁸ Nga-nda kua kà a sukula o kuiibha kuâ kuoso, kua ta jinga na-ku ituxi kokuami; nga kà a loloka o ikuma iâ ioso ia ta jinga na-iu ituxi kokuami, ia a bhekesa o ku ngi tondalela.

⁹ Mbonge iii ia kà kituka dijina diami dia kusanguluka, ni diximanu, ni fuma, mu kaxi ka miji ioso kulu-dia-mundu, oso evua mbote ioso ni kutululuka kuoso ku nganda ku mu bhana.

¹⁰ Jihova uambe kiki, uixi: Bhu kididi kiki (ki muala kutanga muexi: Kia di bhange kikangalakata, ki bhu moneka athu mba iama) mu jimbonge ja Juda ni mu jinzunga ja Jeluzaleme, ja biluka jingundu, ki mu moneka athu, ki mu moneka akua bhata, ki mu moneka iama,

¹¹ Hanji a-nda kuívua-mu o mbimbi ia kukemba, ni mbimbi ia kusanguluka; mbimbi ia ngaiala, ni mbimbi ia dibhanga; ni mbimbi ia iá a mu tanga, exi: Ximanenu Jihova dia Ifuẋi, kuma Jihova mukua mbote, mukonda o kulenduka kuê ki kuene kúbhua; ni mbimbi ia iá a mu kuiza mu ku bheka diximanu monzo ia Jihova; mbata o kikexilu kia ixi nga-nda ku ki lungulula uila ku dimatekenu, kiene kia tange Jihova.

¹² Jihova-phe dia Ifuẋi uambe kiki: Hanji bhu kididi kiki, kia di bhange ngundu, bhua kambe athu, mba iama, ni mu jimbonge jê joso, hádia mua-nda kukala dibhata dia tubhila a nhohesa ibhaku iâ.

¹³ Mu jimbonge jala ku milundu, ni mu jimbonge jala mu iphenza, ni mu jimbonge ja Sulu, ni mu ixi ia Bejamí, ni mu jimbandu ja Jeluzaleme ni mu jimbonge ja Juda, hanji mua-nda ku kala ibhaku i bhita bhu maku ma akua kualula, Jihova ua ki tange.

¹⁴ Tala, izuua í iza, eme ngi Jihova, ki nga-nda kutenesa kizuelu kia iuka ki nga zuela ku mbandu ia dibhata dia Izalaiele ni dibhata dia Juda.

¹⁵ Mu izuua ienhoio ni mu kithangana kienhokio ngi bhangesa kuila kua Davidi kusabhuka Luthangu lua Ubhe lua kulunga, muene anga ua kà fundisa mu kidi ni kuiuka mu ngongo.

¹⁶ Mu izuuʼomo, Juda ua kà bhuluka, o Jeluzaleme u tunga u soma; o didi diene o dijina dia ká muʼixana: Jihova Muene Kulunga Kuetu.

¹⁷ Mbata Jihova uambe kiki, uixi: Davidi ki mungu dingi ku mu kamba mona ua diiala u xikama bhu kiandu kia dibhata dia Izalaiele.

¹⁸ Ni ku jinganga ue o jilevita, ki kuà kamba monʼa diiala uimana bhu pholo iami mu ku bhakula sata ia kuoha, nʼende ni kuoha mibhaku ia makúdia ni kubhakula ilumbu izuua ioso.

¹⁹ Kizuelu kia Jihova anga kiza kua Jelemiia, kuila:

²⁰ Jihova ua tange kiki: Se mu tena kunumununa kikutu kiami kia muanha ni kikutu kiami kia usuku, katé ki mu tena muene o kubhuisa-ku muanha ni usuku bhu kithangana kiâ,

²¹ kuabhu-phe, ni kikutu ki nga te ni Davidi, dia mubhikʼami mu tena ue ku ki tumbulula, phala ka kale ni mona ua diiala u tumina bhu kiandu kiê; kiene kimoxi ue ni jilevita, o jinganga, akunji ami.

²² Kala kiene kulémbua o kutanga kifuxi kioso kia diulu, ni kisekele ku ndundu ia kalunga, a lémbua ku kizonga, kiene ue ki nga-nda kusokolola o luvualu lua Davidi mubhikʼami ni jilevita ala ni ukunji bhu pholo iami.

²³ Kizuelu kia Jihova anga kiza dingi kua Jelemiia kuila:

²⁴ Eie kuene mu mona kiene mu zuela mundu iú, exi: Miji i iadi ia solele Jihova, kiki ua iehelela? Anga a sebulula athuʼami kala nuka a kexile athu bhu pholo iâ.

²⁵ Jihova dia Ifuẋi phe, uambe kiki: Se kikutu kiami kia muanha ni usuku kia lémbua kunangenena, eme hé ngi lémbua kuta-ku jingonge ji tumina diulu ni ixi,

²⁶ kiene ue, eme nga-nda ku di tuna luvualu lua Jakobo, ni lua Davidi, mubhikʼami, mu kikexilu kia kuila o ku mbutu iâ, ki ngi katula-ku dingi uoso u tumina ku mbutu ia Mbalahamu, ni Izake, ni Jakobo; mukonda ubhika uâ nga-nda ku u bhuisa-ku muene anga ngʼa kuatela henda.