Jelemiia 32 - O Mikanda Ikola

Jelemiia u sumba mukáu mu Anatote

¹ O kizuelu kieza kua Jelemiia kia tundu kua Jihova, mu muvu ua kakuinhi ua Zedekiia, sobha ia Juda, iú uene o muvu ua kakuinhi ni nake ua Nabukodonozolo.

² Thembuʼoio-phe, ifuẋi ia masoladi ia tokala sobha ia Babilonha, ia kondoloka Jeluzaleme; o Jelemiia dia polofeta a mu kuikila mu lumbu lua kilangidilu, lua kexile kʼonzo ia sobha ia Juda;

³ mbata Zedekiia, sobha ia Juda, ua mu kuikile, uexi; Mukonda eie ua mu zambuilaʼhi upolofeta, kuila: Jihova uambe, kiki: O mbanza iii, nga-nda ku i bhakula bhu maku a sobha ia Babilonha, muene ua-nda ku i tolola.

⁴ O Zedekiia, sobha ia Juda, ka-nda kubhuluka bhu maku ma akua Kaldeia; maji a-nda ku mu bhakula muene ni kidi bhu maku ma sobha ia Babilonha, anga u zuela-nê muene ʼkanu ni kanu, o mesu mê a-nda kumona o mesu ma muene.

⁵ O muene anga ua kʼàmbata Zedekiia, uia-nê ku Babilonha, hé ua kà kala koko, katé eme ki nga-nda ku mu zungila, Jihova ua ki tange; né-mbe hanji mu luâ ni akua Kaldeia, lémbue, ki mua-nda ku tolola?

⁶ Jelemiia-phe, hé u zuela, uixi: Kizuelu kia Jihova kieza kokuami, kuila:

⁷ Tala, Hanamiiele, monʼa Salume, sekuluʼé, ua-nda ku ku sanga, uixi: Mukáu uami uala mu Anathothe sumbʼé na-u, kuma eie ua fuama o ku u kula phala ku u sumba.

⁸ Hanamiiele, monʼa sekuluʼami hé uiza muene kokuami kala kia tange kizuelu kia Jihova, mu lumbu lua kilangidilu hé u ngʼambela, uixi: Sumba kindala, mukáu uami uala mu Anathothe, mu ixi ia Bejamí; mukonda é-muene ua fuama o undundu, eie uala ni kidikulu; sumba-u u kale mukáu ué. Anga ngi tetuluka ngixi: kiki kizuelu kia Jihova.

⁹ Mukáu anga ngi u sumba muene kua Hanamiiele, monʼa sekuluʼami, uala mu Anathothe, anga ngi mu pezalela kitadi, kuinhi dia xíkulu ia phalata ni sambuadi.

¹⁰ Hé ngi soneka dijina diami ku mukanda ua uenji, anga ngi ta-ku o kidimbu mu ku u jika, hé bhu kala ni jimbangi; anga ngi mu pezalela o kitadi kiê ku pezu.

¹¹ Hé ngi katula o kisoneku kia uenji, kutale kia mukanda uʼojike ni kidimbu kala kia tumu o kitumu ni jingonge, uixi iú ua kambele kujika,

¹² anga kisoneku kia uenji ngi ki bhana kua Mbaluke, monʼa Nediia, monʼa Mahaseia, bhu mesuʼa Hanamiiele, monʼa sekuluʼami, ni bhu mesuʼa jimbangi a di te majinʼâ mu kisoneku kia uenji ni bhu mesuʼa jijudé joso a kexile mu ku xikama mu lumbu lua kilangidilu.

¹³ Anga ngʼambela Mbaluke bhu mesuʼa eneʼoso, ngixi:

¹⁴ Jihova dia Ifuẋi, Nzambi ia Izalaiele, uambe kiki: Tambula mikanda iii, ni í kisoneku kiki kia uenji, kutale mukanda uʼojike ni kidimbu, uixi iú uʼojikule, u i te mu kitutu kia utuma, phala a tene ku i bhaka mu izuua ia vulu muene.

¹⁵ Mukonda Jihova dia Ifuẋi, Nzambi ia Izalaiele, uambe kiki: Hádia hanji anda kusumba jinzu, ni mikáu ni mábhia a mivide mu ixi mumu.

Jelemiia u bhinga Nzambi nʼa mu-tetulule

¹⁶ O ki nga zubha kubhana o kisoneku kia uenji kua Mbaluke, monʼa Nediia, nga sambe kua Jihova, ngexi:

¹⁷ Auá! Jihova, tata! Eie ua iudika o maúlu ni ixi, ni kutena kuoso kua nguzu ié, ni lukuaku lué lua sununuka; kanaku kima ki u mona kuila kisunji ku mesu mé.

¹⁸ Eie jihenda jé uene muji kuatela jimidi ja vulu, anga u vutuila phonzo ia jitata bhu nzemba ia anʼâ anda ku a bhingana ene; Kutende! Nzambi ia kutena! Ua bhingi dijina diê muene Jihova dia Ilombo Ieta.

¹⁹ Ukola mu kaiula, Munéne mu ima ia bhanga! mukonda o mesu mé ma jikuka ni ku kengelela ku thandu dia jinjila joso ja anʼathu, phala kubhana muthu ni muthu kala kia fuama o jinjila jê ni kioso kiala o ibundu ia ibhangelu iê.

²⁰ Eie ua ta ijimbuete ni isunji mu ixi ia Ijitu katé mu kizuua kia lelu, ku tale mua Izalaiele, uixi mu athu engi a mukuá, eie ua di iudikila dijina, diene-phe di uala na-diu ni mu leluʼmu.

²¹ Eie ua katula mundu ué ua Izalaiele mʼoxi ia Ijitu ni kubhanga isunji ni madiuanu ni lukuaku lué lua nguzu, ni lukuaku lué lu ua tandeleka ni kimbuua kionéne.

²² Eie ua a bhana o ixi iii, i ua lokela o jitata jâ kuila ua-nda ku a bhana-na-iu; ixi i kunguluka lete ni uemba.

²³ Iá a bokona-mu muene, í ia kituka iâ-ene, maji a kambe kutumaka dízui dié, iá a fulu kuenda mu kitumu kié; iene ioso i ua a tumu kubhanga, ene ka i bhange; kiene-phe ki ua tumina, phala kua eze divuua dioso dienhidi.

²⁴ Tala-ze, Ngana, o milombo! Eza kiá mu kúlua o mbonge phala ku i tambula, ni mbonge iene iʼòbhane kià bhu maku ma akua Kaldeia a mu i zokela ni xibhata, ni ku nzala, ni ku dibhebhu; o ki ua zuela kia di bhange muene, tala, kiene-ze kiá ki tua mu monʼiki.

²⁵ Sumbala kiene, maji-phe eie u Jihova Nzambi, ua ngi tangela kuma: Mukáu sumba-u mu kitadi phalʼeie, u kuate ue jimbangi ji ki mona, sumbale o mbonge iò-bhane kiá bhu lukuaku lua akua Kaldeia.

²⁶ Bheneʼobho-phe kizuelu kia Jihova kiza kua Jelemiia kuila;

²⁷ Tala-ze, eme Jihova, Nzambi ia Xitu ioso; mbé sai-ku kima kioso-kioso ki ngi bhekela ku diuana?

²⁸ Kala kiki, Jihova uambe kiki: Tala, mbonge iii eme ngi i bhakula bhu lukuaku lua akua Kaldeia ni bhu lukuaku lua Nabukodonozolo, sobha ia Babilonha, ua-nda ku i tambula muene.

²⁹ O akua Kaldeia, a mu bhângela kutolola o mbonge iii, a-nda kubokona muene moxi diê, anga mbonge a kà i ta túbhia, nʼa kʼoha jinzu jala ni matala a kuoha uasu ua dizumba kua Bahale ni ku bhana makúnua ku jinzambi jengi, mbé o ku ngi lokalala eme o njinda.

³⁰ Mukonda anʼa Izalaiele ni anʼa Juda ka bhange ngó kima kioso-kioso, kikale ngó o ku ibha mu ku ibha bhu mesu mami, tundé mu unzangala uâ. Mbata anʼa Izalaiele kene dingi mu ku bhanga kima kiengi, kikale o ku ngi lokalala o njinda iene ni ibhangelu ia maku mâ; Jihova ua ki tange.

³¹ Mukonda o mbonge iii tundé kia i tunga, ienhé ngó phala njinda iami ni kutema kuami katé mu kizuua kia lelu, nda eme ngi i katulé-ku ku mesuʼ ʼami.

³² Ku ima ioso ia ibha ia bhange anʼ Izalaiele ni anʼ Juda, phala ku ngi lokalala o kutema, ene ni jisobha jâ, ni ilamba iâ, ni jinganga jâ, ni jipolofeta jâ, kumoxi kiá ni athu oso mua Juda ni iá a tungu mu Jeluzaleme.

³³ Eme iá a ngi bhana dikunda, pholo kana; sumbala eme nga a longo hanji, o mu ku a longa ngi di meneka muene, ene-phe nguâ kubhana mátui, phala kuividila kioso ki ngala ku a longa.

³⁴ Inda o kia bhange ene, o ku-ta ima iâ ia isunji, ni ufusa mu inzu iexana mu dijina diami, phala ku i sebulula.

³⁵ Iá a tunga matala ma Bahale, ala mu honga ia monʼa Hinome, phala kubhangesa anʼâ a mala ni anʼâ a ahatu kubhita mu túbhia tua Muloko; o kima eme nuka nga ambelelè-kiu ku ki bhanga, mba ki ngi bhita ngó ku muẋima uami, kuila a bhange ufusa uenhó; phala ene a bhangese Juda kuta kituxi.

³⁶ Kiene-phe, kindala, kiambela Jihova, Nzambi ia Izalaiele, ku mbandu ia mbonge iii, i mua mu tanga, muexi: A i bhana kiá bhu lukuaku lua sobha ia Babilonha, ku xibhata, ni ku nzala ni ku dibhebhu.

³⁷ Tala-ze, eme nga-nda ku a bhongolola ku jixi joso ku nga a takuile mu njinda iami, ni mu kutema kuami, ni mu kuthathamana kuami kua vulu kinéne; nga-nda kutona dingi ku a bheka bhu kididi kienhiki anga ngi bhangesa kuila a tunga muenhomo, ni kudondama kuoso.

³⁸ Ene a kà kala athuʼami, eme ngi kala ngi Nzambi iâ.

³⁹ Anga ngʼa bhana ene oso muẋima umoxi, ni njila imoxi, nʼa ngi kuatela uoma izuua ioso, phala mbote iâ ene ni mbote ia anʼâ, a-nda ku a bhingana.

⁴⁰ Hé nga kà ta-nâ kikutu ki nangenena, ki kia kà a sondoloka dingi, mbé o ku a bhanga mbote, anga nga kà ta uoma uami ku muẋima uâ, phala eme ki mungu dingi a ngʼixa.

⁴¹ Anga ngʼenda ni ku sanguluka muene mukonda dia ene, kioso ki ngiia ni ku a bhanga o mbote, hé ngʼa kuna muene mu ixi muenhumu, ku kidi kiene, ni muẋima uami uoso ni muenhu uami uoso.

⁴² Mukonda Jihova uambe kiki: Kala eme ki nga bheka o ku ibha kuosʼuku ku thandu dia mundu uenhú, kiene ue ki nga-nda kubheka ku thandu diâ, o mbote ioso i ngene mu kana ku a bhanga.

⁴³ A-nda ku sumba muene mikáu mu ixi ienhiʼii, i muala ku tanga enu, muixi: Ia di bhange kikangalakata, ki mu moneka athu mba iama; a i bhakula kiá bhu lukuaku lua akua Kaldeia!

⁴⁴ Mikáu muene a-nda ku i sumba mu kitadi, ni ku di bhangela mikanda ia uenji, anga a i ta idimbu muene, hé a bhangesa jimbangi ku ki kalela ku pholo mu ixi ia Bejamí, ni mu ikanzu ia Jeluzaleme, ni mu jimbonge ja Juda, ni mu jimbonge ku milundu, ni mu jimbonge mu iphenza, ni mu jimbonge ku mbandu ia Sulu; mukonda eme hádia nga-nda kubhangesa kuila a vutuka dingi mu ixi mumu, a tunda ku uhutile uâ, kiene kia tange Jihova.