Jelemiia 31 - O Mikanda Ikola

O ku di tenda a ku bilula kusanguluka

¹ Jihova uixi: Mu izuuʼomo nganda ku kala eme ngi Nzambi ia miji ioso ia Izalaiele, ene a kà kala kifuxi kiami.

² Jihova uambe kiki: O kifuxi kia bhulaka ku xibhata, kia bongo kuzediua mʼoxi ia kisekele; muene Izalaiele, kioso eme ki nga-nda ku mu nhohesa.

³ Kithangana kiá kia bhiti-bhu tundé kia ngi tukulukila Jihova, uixi: Tala, nga ku zolo ni henda ki i moneka dizubhilu, nga ku sungu ue ni jihenda ja kulenduka, kokuami.

⁴ Hanji nga-nda ku ku tunga dingi, ua kà kala ua tungiua, eie u muzeletete ua Izalaiele! Hanji ua-nda ku kemba ni isaka ié, ua kà tunda kumoxi ni iá a mu kuimba ni kukina.

⁵ Ku milundu ia Samádia hanji ua-nda kua kà kuna-ku o mivide; akua ku kuna a kà kuna hé a dia muene ku ibundu iê ni kusanguluka.

⁶ Mbata hádia kua kà kala kizuua kia-nda kudikola akua kulanga ku thandu dia mulundu ua Ifalaimi. Balumukenu tu bande ku Ziione kua Jihova, Nzambi ietu.

⁷ Mbata Jihova uixi: Imbenu ni ngalasa kua Jakobo; tanenu mukonda dia Kitoto kia ifuẋi; tenu nzongo, imbenu diximanu, zuelenu muexi: Bhulula, Jihova, o mundu ué iá, a subhuka kua Izalaiele.

⁸ Tala, kuma ngʼiza-nâ tundé ku ixi ia ku suku, nga-nda kua bhongolola muene tundé kua suku oxi; ngʼiza-nâ kumoxi ni ifofo ni inema, ni ahatu emita, kumoxi ni iá a mu bhanduluka a kala kifuxi kia dikota, kia-nda kuvutuka bhabha.

⁹ À keza ni kudila, nga kà ambata ni kudionda; ngà kʼendesa ku tungiji tua menha, ngiia-nâ mu njila ia iuka, mua bhingi, kà ka dibhukana dingi; kuma eme nga di bhange ngi tata phala Izalaiele, O Ifalaíme muene phande-kumbi iami.

¹⁰ Ivuenu kizuelu kia Jihova, enu mu miji iʼathu, mu ki tangele ku ikolo ia takuka ku makanga, muexi: Ió ua tena kumuanga Izalaiele, ua-nda ku muʼongeka dingi hé u mu langa kala mubidi kia langa kilunga kiê kia jimbudi.

¹¹ Mukonda Jihova ua kula Jakobo, iú ua mu bhulula bhu lukuaku lua iú ua mu tundu mu kusuina.

¹² Kienhiki-phe, a kèza hé a kà sanguluka bhu ditala dia Ziione, a kà lengela ku mbote ia Jihova, ku tidiku ni ku makúnua, ni ku maji, ni ku tumbudi, ni tungombe; anga muenhu uâ ua kèla kala jindombe jʼòtekele, ki mungu dingi enda ni mukondo.

¹³ Kuabhu-phe, muhetu ua muzeletete ua kà sanguluka mu ku kina, ni minzangala ia mala ue, ni iá a kuka kiá; o kudila kuâ nga kà ku bilula kusanguluka, hé nga kà a konda malamba, o dilamba diâ nga kà di bilula kutana

¹⁴ Anga ngà kʼekutisa muenhu ua jinganga ni ima ia nete, o mundu uami, mbote jami ja-nda kua kà a kuma muene, Jihova ua ki tange.

¹⁵ Jihova ua zuela kiki: Mu Lama, evu-mu mbimbi, jingololo ni kudila lujiji; Lakele ua mu dila tuana tuê, nguê ku mu di xibhisa ku tuana tuê, mukonda ki tua moneka dingi.

¹⁶ Jihova-phe uambe kiki: Mbimbi ié ia kudila suikika na-iu, kumoxi ni masoxi ma mesu mé; kuma o kikalakalu kié kiala ni futu iê, Jihova ua ki tange, mukonda ku ixi ia nguma iâ ene a-nda kutunda-ku mu kuvutuka.

¹⁷ Hanji sai kia kudielela ku disukilu dia xala-ku phala luvualu lué, Jihova ua ki zuela, kuma hádia anʼé a kà vutuka mu jimbambe jâ jʼokulu.

¹⁸ Nga kʼivu muene kiambote kuila Ifalaíme ua kexi mu ku di tenda, uixi: Eie ua ngi bhe jingongo, eme nga mono ngongo, mukuâ ni kamona ka ngombe kiluua hanji kʼejidila; ngi bilule mu kudiela, phala eme ngi diele, mukonda eiʼeie u Ngana dia Nzambi iami.

¹⁹ Mukonda, ni kidi kiene, kioso ki nga biluka, nga diela muene; o kioso ki nga zubha ku dʼijiia, nga beta ku ditabela diami; nga tandanganha muene; xi, sonhi ja ngi kuata, mukonda o lusebu lua unzangala uami nga luʼehela muene kiavulu.

²⁰ Manhi Ifalaíme ki monʼami ua hate? Kamona kami ka makembu? Mukonda kioso ki ngi zubha ku mu zuela ima ia ku mu bhanga kia ibha, hanji ngi mu xinganeka ni muẋima uoso; kienhiki miẋima moxi i ngi bhuá-mu mukonda dia muene, hanji nga-nda ku mu kuatela henda ia vulu, Jihova ua ki tange.

²¹ Uixi: Eʼmuene di tele imaku, di kubile eʼmuene jiphiladi, u te muẋima ué mu hoka, mu njila mu uende; vutuka, eʼmuzeletete ua Izalaiele, vutuka mumu, mu jimbanza jé.

²² Ua kà suka bhebhi ni kubungana, ki ua ẋinukʼokio, monʼa kilumba? Kuma Jihova ua bhange kima kia ubhe mu ngongo Muhatu umoxi ua-nda ku ta iala dimoxi mu lukumbi.

²³ Jihova dia ifuẋi, Nzambi ia Izalaiele, uambe kiki: Kizuelu kiki a-nda ku ki tanga hanji mʼoxi ia Juda ni mu mabhata mê, kioso ki nga-nda kuzubhaku o ubhika ua uhutile uê, kuila: Jihova a ku zediuise, eie dibhata dia kubatula o milonga mu kidi, eie u mulundu uê ukola!

²⁴ Mua muene, muene mua kà tunga Juda ni mabhata mê moso kumoxi; ni iá kiá ue oso idimakaji, ni akua kuenda ni ilunga.

²⁵ Mukonda o muenhu ua iokojoka nga uʼikutisa, o mienhu ioso iala ni malamba nga i disa í iekuta.

²⁶ Ku iene iosuʼiii-phe, ngi phaphumuka hé ngi tala; kakilu kami ngevu kedile muene: Nzué!

Jihova u ta kikutu kia ubhe ni Izalaiele

²⁷ Tala, izuua í iza, Jihova ua ki tange, ki nga-nda ku kuna dibhata dia Izalaiele ni dibhata dia Juda ni mbutu ia athu ni mbutu ia iama.

²⁸ Hé kia kà kala phe kiki: Mukua ni ki nga fulu kilu ku thandu diâ, phala kuvuza, phala kubula, ni kuvutula kuema, phala kumuanga, phala kutatesa, kiene ue ki nga-nda kufula o kilu ku thandu diâ, phala kutunga ni ku kuna, Jihova ua ki tange.

²⁹ Mu izuua muenhomo, ki mungu dingi a ki tanga, kuila: jitata a di jiúva ja uisu, o mazu ma tuana mʼezala uengenge.

³⁰ Maji muthu ua kà fuila kikuma kiê-muène; muthu uoso u dia jiúva ja uisu, muene u kala ni uengenge ku mazu.

³¹ Kuma Jihova, uixi: Kua-nda kuiza izuua, i nga-nda ku ta kikutu kia ubhe ni dibhata dia Izalaiele, ni dibhata dia Juda,

³² ki ki kala dingi kala o kikutu ki nga tele ni jitata jâ, mu kizuua ki nga a kuata mu lukuaku, phala ku a katula mʼoxi ia Ijitu; mbata o kikutu kiamiʼokio ki nga tele-nâ, ene a ki buakulula, kia tumbuluka muene, sumbale eme ngi Jihova hanji nga sakana-nâ, Jihova ua ki tange.

³³ Maji o kiki kiene o kikutu ki nga-nda kuta ni bhata dia Izalaiele, kia-nda kúbhua o izuuʼoio, Jihova ua ki tange: Nga kà ta o kitumu kiami mu thulu iâ, nga kà ki soneka muene ku muẋima uâ; eme nga kà kala ngi Nzambi iâ ene a kà kala mundu uami.

³⁴ Ki kua kà kala dingi muthu u longa mukuá, mba muthu uambela phangiʼé, kuila: Ijiia Jihova; mukonda ene oso a-nda kua kà ngʼijiia, tundé ku monʼa-ndenge mudiʼâ katé ku muadiakimi, Jihova ua ki tange. Mukonda nga-nda kuloloka o ikuma iâ, o ituxi iâ ki nga kà i xinganeka dingi.

³⁵ Kienhiki kia tange Jihova mukua kubhana o dikumbi phala mukengeji mu muanha, ni itumu ia mbeji ni jithéthembua phala mukengeji mu usuku, Io u jikula makungu mu kalunga anga u bhangesa mabhuku mê kuzuma; Jihova dia Ilombo Ieta diene o dijina diê.

³⁶ Se o itumu iii i nga xindi i tunda bhu pholo iami, eme ngi Jihova, o mbutu ia Izalaiele ue ki ia-nda ku kala dingi muiji bhu pholo iami katé ku hádia ni hádia.

³⁷ Maji Jihova uambe kiki: Se maúlu a tena ku ma zonga katé ku thandu, o maxikamenu maʼxi nʼa ma zongo katé bhoxʼèlele, eme ue mbutu ioso ia Izalaiele ngi di tuna na-iu mukonda dia ima iâ ioso ia bhange, Jihova ua ki tange.

³⁸ Jihova uixi: Tala, kua-nda kuiza izuua, o mbanza iii a kà i tunga dingi phala Jihova, tundé bhu inzu-ia-matala mu Hanamiiele katé bhu dibhitu dia thungi.

³⁹ Mukunga ua kuzongela a-nda ku u tandeleka ku pholo katé bhu kamulundu ka Ngalebe, anga u kondolokela mu ku lunga ku Ngoua.

⁴⁰ Dikolo dioso dia imbi ni uthôka, mikáu ioso katé ku honga ia Sedolone, katé bhu thungi ia dibhitu dia Jikabalu, kua lungila ku thunda, ioso a kà i lumbila Jihova; ka kà i vuza dingi, ka kà i bula dingi katé ku hádia ni hádia.