Jelemiia 3 - O Mikanda Ikola

¹ Ala kuila zuele-zuele, exi: se bhu kala diiala di senga mukajiʼé, muene anga uia kuengi hé u sakana ni diiala diengi, kifua u mu vutukila dingi? Oxi ioso ioio ki ia-nda ku tambula lufuku? Eie-phe ua di kasanesa ni jisaii ja nzungule; né-mbe-phe kiene, vutukila dingi kokuami, Jihova ua ki tange.

² Bhetula mesu mé ku matala u mone: kuebhi ku bhangela-ku undumbu? O mu ikoka ua a xikamena jinga, kala mukua Alábia u batuila mʼoxi ia kisekele: mu kubhanga kiki ua kasanesa oxi ni undumbu ué ni usuéia ué.

³ Kiene kia bhangesa ku katula-ku o mvula, kasamanu ki ka noko-ku dingi, maji eie-phe ua kununuka o pholo kala kidia-nzunga, ngué ku kala ni sonhi.

⁴ Ki ualʼiki, ua lembua ngó katé bhu ueza-bha, o ku di tenda kokuami, kuamba: Tata iami! Eie u musonguedi uami, tua tunduʼdi undenge?

⁵ Manhi njinda ié ua-nda ku ijijila katé ku hadia ni hadia? Inga ua-nda ku i bhaka izuua ioso? Talesa-ze eie uene kuzuela ni ku bhanga ima iaiibha, o mu ima iaiibha ienhiʼii muene-muène mu u xalela.

Izalaiele ni Juda a a tendelela kudiela a a bhana polomesa ia kidikulu

⁶ Jihova uambe dingi mu izuua ia sobha Joziia, uixi: Eie ua mono kia bhange Izalaiele dia kuẋinuka? ua bhita-bhita ku milundu ioso ia di-leka ni bhu ikota ia mixi ioso ia uisu kuenhoko kuene kua bhangela jinga undumbu.

⁷ Eme, o kia zubha kubhanga ima ioso iii, ngixi-phe: Vutuka kokuami; muene phe ka vutuka: o phèke-phèke-phe ia phangiʼé na Juda ua ki mono.

⁸ Kioso-phe ki ngedi suí, mukonda dia ima ioso iii, Izalaiele dia kuẋinuka nga mu senge, kuma ua te jiphanda, eme nga mu bhana lubongo luê lua ku mu senga, maji ki lua kuatesa uoma kua phangiʼé ia muhatu na Juda, o phèke-phèke ioio; maji muene ue uaii, iú ua di te-mu ue ni kubhanga undumbu.

⁹ Anga ki bhita kuma o kia sambuka fenge ia undumbu uê, oxi-phe ua i kasanesa; kuma ua te jiphanda ni matadi ni miẋi.

¹⁰ Hanji-phe, o phèke-phèke ia phangiʼé na Juda, o muʼaxaxi ka ima ioso iii, ngué kuvutuka kokuami ni muẋima ua kidi, maji ua vutuka ngó makutu, Jihova ua ki tange.

¹¹ O Jihova iú ua ngambela, uixi: Izalaiele-phe dia kuẋinuka ua beta kia kuiukisa o muenhu uê, o phèke-phèke ia phangiʼé Juda, ndenge.

¹² Katuka-phe, nda u boke o makʼama ku mbandu ia kusuku, uixi: Eie Izalaiele, mbaluke iakime, vutuka! Jihova ua ki tange; o njinda iami ki nganda ku i lunduluila dingi ku thandu dienu; mbata eme ngi mukua Mbote, Jihova ua ki tange, o njinda iami ki nga-nda ku i jijila, katé ku hadia ni hadia, kana.

¹³ Hé kima diẋikine ngó kikuma kié: ki ua tondalela Jihova Nzambi ié, eie ua lebhesa o jinjila jé katé kua akua jixi jengi, bhu makota a mixi ioso ia uisu; eie ua kambe ku bhana matui ku dizui diami, kiene kiambe Jihova.

¹⁴ Bilukenu, enu mu ana a ẋinuka, Jihova ua ki tange; mbata eme nga-nda ku mi sakana, anga ngi mi katula iú ku mbonge iii, kiiadi ku muiji ua mukuá; hé nga kà mi ambata ku Ziione.

¹⁵ Anga ngi mi bhana alangi kala kiendi o muẋima uami, a mʼinga ni kuijiia ni unjimu.

¹⁶ Anga kia kà bhita, kioso ki mua-nda ku di sokolola, hé muʼima ibundu mu ngongo mu izuuʼomo, kiambe Jihova, ki mungu dingi akʼela: O Alaka ia kikutu kia Jihova, ku miẋima iâ ki ià kʼeza-ku dingi, iene ue ka kà i lembalala dingi, mba ngó ku i kana; kiki ka kà ki bhanga dingi.

¹⁷ Mu thembuʼomo Jeluzaleme a kà mu luka Kiandu kia Jihova, ni miji ioso ia kà di bhongoluela kua muene, ku Dijina dia Jihova, mu Jeluzaleme; ki mungu dingi enda kala kioso kia tumu o muẋima uâ ua usuéia.

¹⁸ Mu izuua momo dibhata dia Juda ni dibhata dia Izalaiele a-nda kuendela bhuamoxi; hadia a kʼèjila bhuamoxi mu tunda kuʼoxi ia kusuku nʼeza mu ixi i nga bhanene jitata jâ mu ubhinganu.

¹⁹ Maji eme ngedile, ngixi: Eme nga-nda ku ku tula kiebhi muʼaxaxe ka ana, anga ngi ku bhana o ixi i tena ku ku uabhela, o ubhinganu ua beta ujitu, ua ifuẋi ia miji? Eme-phe, ngixi: U ngiia Tata, kana dingi ku ngi baluka.

²⁰ Mukuâ ni phèke-phèke ia muhatu u di-ambudisa ni munumʼiê, kiene ue ki ua di-bhange uphèke-phèke phalʼeme, eie u dibhata dia Izalaiele, Jihova ua ki tange.

²¹ Mu ididi ia di-leka evu-mu dizui, evu-mu ngololo ni kudionda kua vulu kua anʼa Izalaiele; mukonda njila iâ a i lungulula, o Jihova Nzambi iâ a mu jimbi.

²² Vutukenu, mbaluke ja ana, eme nga-nda ku mi saka o makuẋinuka menu. Etuʼetú, tueza kokué, mbata eʼmuène u Jihova Nzambi ietu.

²³ Kia kidi kiene, kingoho o kudielela o tuthuthulundu ni ku nzungule ia i-milundu; kuma o kubhuluka kua Izalaiele kuala mua Jihova Nzambi ietu.

²⁴ Mukonda o kutandanganha kuene kuadi o ikalakalu ia jitata jetu tundé mu undenge uetu: ni jimbudi jâ, ni jingombe jâ, ni anʼâ a mala, ni anʼâ ahatu.

²⁵ Tua xalela mu jisonhi jetu; a tu vungina kuala o kavuanza ketu, mbata Jihova Nzambi ietu tua mu te kituxi, nʼetu ni adietu, tundé mu undenge uetu katé mu kizuua kia lelu; etu tua fulu ku bhana matui ku dízui dia Jihova Nzambi ietu.