Jelemiia 29 - O Mikanda Ikola

Jelemiia u sonekena Jihutile jala mu Babilonha

¹ Enhá ene o maka a mukanda ua Jelemiia, polofeta, ua tundu mu Jeluzaleme iu ua u tumikisa ku iá a subhuka ku ikulakaji ku ubhika, ni ku jinganga ni ku jipolofeta ue ni ku kifuxi kioso kiá kia balakala Nabukodonozolo kia tundu mu Jeluzaleme ki kiai ku Babilonha.

² (Kioso kia tundu sobha Jekoniia ni mvuale diê mu Jeluzaleme, kumoxi ni jingolambole, ni ilamba ia Juda ni ia Jeluzaleme ni asongi-amabaia ni asudi-a-thumba).

³ Mukanda anga u ila bhu lukuaku lua Elasa, monʼa Safane, ni Jemadiia, monʼa Hilikiia (kuma Zedekiia, sobha ia Juda ua a tumine kuia ku Babilonha, kua Nabukodonozolo, sobha ia Babilonha), ni mukanda uambe, kiki:

⁴ Jihova dia Ifuẋi, Nzambi ia Izalaiele ua tange kiki, kua ene oso a a balakala, u nga balakalesa eme-muène mu Jeluzaleme ia ai ku Babilonha:

⁵ Tungenu jinzu mu kale momo; kunenu miẋi mu-die ku ibundu iê.

⁶ Sakanenu ahatu mu vuale anʼa mala ni anʼa ahatu; bhengenu ahatu phala anʼenu a mala, o anʼenu a ahatu bhanenu-u ku maiala mbé a vuale anʼa mala ni anʼa ahatu; kuene ku mualʼoko, di sokolodienu, ki muʼie ni kutunuka.

⁷ Sotenu kutululuka kua mbonge mu nga mi balakala, sambelenu-iu kua Jihova; mbata mu ku tululuka kuê, enu ue mu kala ni kutululuka.

⁸ Mukonda Jihova dia Ifuẋi, Nzambi ia Izalaiele, uambe kiki: O jipolofeta jenu, ala mu kaxi kenu, ka mi tobhese, mba azambuidi enu, mba ue kubhana mátui ku jinzoji ji mua mu kuanjiua.

⁹ Mukonda ene a mu mi zambuila makutu mu dijina diami—eme ngi Jihova, kʼeme nga a tumu.

¹⁰ Mukonda Jihova uambe kiki: Ni kidi kiene, hádia ki mu zubha kutenesa makuinhi sambuadi a mivu mu Babilonha, nga-nda ku mi zungila, o kizuelu kiami kiambote kokuenu, nga-nda ku ki kumbidila muene, hé ngi tona ku mi bheka dingi bhu kididi kiki.

¹¹ Kuma ixinganeku ioso i ngala ku mi xinganeka na-iu, nga ijiia kiambote muene, eme ngi Jihova, ixinganeku ia uembu, ki ia phulu, kana, nda ngi mi bhane dizubhilu di muene ku kinga.

¹² Kienhokio mua-nda kuà di kola kokuami, anga muia, mu ngi sambela, eme ue ngà kà mʼivua.

¹³ Mua-nda ku ngi sota, anga mu ngi sanga, kioso ki mu ngi sota ni muẋima uenu uoso ua muvimba.

¹⁴ Enu-phe mua-nda kuà ngi bonga muene, Jihova ua ki tange, nga kà bhangesa kuila jihutile jenu ja kà vutuka, anga ngi mi bhongolola mu miji ioso ni mu ididi ioso mu nga mi takuile, eme ngi Jihova, anga ngi tona dingi ku mi bheka bhu kididi kioso bhu nga mi katuile mu ku mi bheka ku jixi jengi.

¹⁵ Mbata enu mua mu kuila, muexi: Jihova ua tu balumuina jipolofeta ku Babilonha.

¹⁶ Maji-phe Jihova ua tange kiki ku mbandu ia sobha ua xikama bhu kiandu kia Davidi ni kifuxi kioso kia tungu mu mbonge iii, jiphange jenu, a fulu kuia nʼenu ku ubhika ua uhutile;

¹⁷ Jihova dia Ifuẋi-phe uambe, kiki: Tala, nga-nda ku tumikisa mu kaxi kâ xibhata, ni nzala, ni kipheku, hé ngʼa bhanga kala bhu jifiku ja bolo, ki ji xikina ku ji dia, mukonda dia kubola kuê.

¹⁸ Nga-nda ku a zuididika ni xibhata, ni nzala, ni kipheku; nga-nda ku a bhakula nʼai ni kusengana, lelu kuku, mungu koko, mu kaxi ka jixi joso mu ngongo, nda a kale akua mázui, a di bhange kisunji, mukua ni muphióphio, kífua dilebhu mu kaxi ka miji ioso mu nga-nda ku a takuila.

¹⁹ Mbata a lémbua ku bhana mátui ku maka mami eme ngi Jihova, kioso ki ngala ku a tumikisa abhikʼami, jipolofeta; ngi di meneka muene mu ku a tumikisa maji enu-phe mua tokoka o kuívua, kiene kia zuela Jihova.

²⁰ Enu-phe ivuenu kizuelu kia Jihova, enu mu jihutile muala ku ubhika nga mi katula mu Jeluzaleme, eme nga mi tumikisa ku Babilonha.

²¹ Jihova dia Ifuẋi, Nzambi ia Izalaiele, uambe kiki, ku mbandu ia Ahabe, monʼa Kolaia, ni Zedekiia, monʼa Mahaseia, ala ku mi zambuila upolofeta ua makutu mu dijina diami: Tala, nganda ku a bhakula bhu maku ma Nabukodonozolo, sobha ia Babilonha, phala muene nʼa a kuamena bhu mesuʼenu muene.

²² Phala enhoso ai ku ubhika a tundu mua Juda iá ai ku Babilonha, a katuile-ku mázui, kiela: Jihova a ku bhange kala kia Zedekiia ni kia Ahabe a a zuzile ku túbhia kuala sobha ia Babilonha.

²³ Mukonda a bhange ulaji mua Izalaiele, iá a te jiphanda ni ahatu a akuâ, anga a tanga makutu mu dijina diami, maka eme ki nga a tumu ku a zuela. Eme-phe nga kʼijiia muene kiambote, kuma ngi mbangi ia ima ienhiʼii—eme ngi Jihova.

²⁴ O Semaia, Nehelamita, u mu tangela, uixi:

²⁵ Jihova dia Ifuẋi, Nzambi ia Izalaiele, uambe kiki: Mukonda mu dijina dié ua tumikisa mikanda ku mundu, uoso uala mu Jeluzaleme ni kua Sofoniia, monʼa Mahaseia, o nganga, ni ku jinganga joso, uixi:

²⁶ Jihova ua ku lumbu unganga bhu kididi kia nganga Joiada, phala ni u kale u katúmua ka inzu ia Jihova ku muthu uoso u sota ku ki tundisa, ni ku di bhanga polofeta, eie u mu te muʼaleia ni bhu ditaka.

²⁷ O kiki-phe Jelemiia, ua tokala mu Anathothe, uala ku mi zambuila mu upolofeta, eie ku mu bazelelaʼhi?

²⁸ Mukonda kiene kia tumina ku tu tangela ku Babilonha kuila: Uhutile ua-nda kunakina muene kiavulu; tungenu jinzu mu kalemu; kunenu mábhia mu-die ku ibundu iê.

²⁹ Sofoniia, nganga, anga mukanda uenhú u u tangela mu mátui ma Jelemiia, polofeta.

³⁰ Kizuelu kia Jihova anga ki tula kua Jelemiia, kuila:

³¹ Tuma kutangela enhoso ala ku ubhika, uexi: Jihova uambe kiki ku mbandu ia Semaia, nehelamita, kuila: Mukonda Semaia ua mi zambuila upolofeta, o eme ki ngi mu tumu, iú ua mi bhangesa kuila mudielela ku makutu,

³² kala kiki. Jihova uambe kiki, uixi: Tala, Semaia, nehelamita, nga-nda ku mu zungila, ni muene ni muiji uê, muene ka kà kala ni muthu u tunga mu kaxi ka kifuxi kiki, o mbote i nga-nda kubhanga ku kifuxi kiami, muene ka kà i mona mesu, Jihova ua ki tange, mukonda muene ua zuela ni kubhumina Jihova.