Jelemiia 28 - O Mikanda Ikola

Jelemiia u zoka mvunda ni Hananiia polofeta ia makutu

¹ Anga ki bhita mu muvu uene umoxi, ku dimatekenu dia utuminu ua Zedekiia, sobha ia Juda, mu muvu ua kauana ku mbeji ia katanu, kuila Hananiia, monʼa Azule, polofeta mu Ngibiione, ua ngi zuelela mʼonzo ia Jihova bhu mesuʼa jinganga ni a kifuxi kioso, uixi:

² Jihova dia Ifuẋi, Nzambi ia Izalaiele ua zuela kiki, kuila: O jungu ia sobha ia Babilonha nga i bukujula.

³ Kia-nda kutenena muene mivu i iadi, eme nga-nda ku tona dingi ku bheka itutu ioso ia inzu ia Jihova bhu kididi kiki, iene ioso iʼambatele Nabukodonozolo, sobha ia Babilonha bhu kididi kiki, hé uia na-iu ku Babilonha.

⁴ Jekoniia ue, monʼa Nzuakí, sobha ia Juda, ni enhoso jihutile mua Juda, ia a bokona mu Babilonha, eme nga-nda ku tona kuiza-nâ bhu kididi kiki, eme ngi Jihova, mukonda jungu ia sobha ia Babilonha nga i bukujula.

⁵ Bhenhobho-phe, polofeta Jelemiia, u vutuila polofeta Hananiia, bhu mesuʼa jinganga ni bhu mesuʼa kifuxi kioso kia kexile mʼonzo ia Jihova.

⁶ Jelemiia, polofeta, anga uʼamba kiki, uixi: Amén! Jihova a bhange kienhokio! Jihova a kuatese o maka mê u ua tange eie, mu upolofeta, a tone dingi kubheka itutu ioso ia inzu ia Jihova, ni jihutile joso jʼendele ku ubhika mu Babilonha, nʼeze dingi bhu kididi kiki:

⁷ Maji kindala-phe, ívua hanji maka iá u nga-nda kuzuelela mu mátui mé ni mu mátui ma kifuxi kioso.

⁸ Jipolofeta ja tu diangelelè-ku, ni eme ni eie, tundé mʼukulu-kulu a zambula jinga ima ia kukanena jixi ja vulu ni mautuminu a makota, ita ni mavuua ni kipheku.

⁹ O polofeta uanda kuzambula o paze, anga kizuelu kia polofetʼoio ki di bhanga muene, polofetʼoio a kà muʼijiia kuila muenhó a mu tumu mu kidi kuala Jihova.

¹⁰ Bhenhobho Hananiia, polofeta, u katula jungu mu xingu ia polofeta Jelemiia anga u i bukula.

¹¹ Hananiia anga u zuela bhu mesuʼa kifuxi kioso, uixi: Jihova uambe kiki: Kiene muenʼiki, ki nga-nda kubukula o jungu ia Nabukodonozolo, sobha ia Babilonha, ki bhuanda kubhita mivu i iadi ia muvimba, mu xingu ia akua jixi joso. Jelemiia-phe dia polofeta, uʼzanguka, uenda njila iê.

¹² Maji kioso Hananiia, polofeta, kia bukula jungu mu xingu ia polofeta Jelemiia kizuela kia Jihova kieza kua polofeta Jelemiia, kuamba:

¹³ Ndé, u tangele Hananiia, kuila: Jihova uambe kiki: Eie ua bukula jungu ia muẋi, maji bhu kididi kiê, ua-nda kuiudika ia utadi ua felu.

¹⁴ Mbata Jihova dia Ifuẋi, Nzambi ia Izalaiele, uambe kiki, uixi: Bhu xingu ia akua jixi joso jiji nga te-bhu jungu ia felu, phala kubhikila Nabukodonozolo, sobha ia Babilonha; a-nda ku mu bhikila muene; katé ni iama ku mukáu nga mu bhana na-iu.

¹⁵ Jelemiia dia polofeta, anga uambela Hananiia dia polofeta, uexi: Kindala ívua, hanji, Hananiia: Jihova ki muene ua ku tumu, maji eie ua bhangesa kuila kifuxi kiki ki dielela ku makutu.

¹⁶ Mukonda dia kienhiki, Jihova uambe, kiki: Tala, kulu-dia-mundu nganda ku ku katula-ku; ua-nda kúfua muvu uenhú, mukonda eie ua zuela ni kubhumina Jihova.

¹⁷ Polofeta Hananiia-phe uafu muene mu muvu uenhó, ku mbeji ia kasambuadi.