Jelemiia 27 - O Mikanda Ikola

Jelemiia u bhana kaiula ka kutumaka sobha ia Babilonha

¹ Ku dimatekenu dia utuminu ua Nzuakí, monʼa Joziia, sobha ia Juda, kizuelu kiki kia tundu kua Jihova kuila:

² Jihova ua ngʼambela kiki: Iudika malubhambu ni jungu nda u ji te mu xingu ié.

³ U ji tumikise kua sobha ia Idomo, ni kua sobha ia Mouabhe, ni kua sobha ia anʼa Amone, ni kua sobha ia Tilu, ni kua sobha ia Sidone, i ila bhu lukuaku lua jiphunga jala mu kuiza mu Jeluzaleme kua Zedekiia, sobha ia Juda.

⁴ Ua-nda kua kà a tudila njimbu nʼa kà tangela jingana jâ, kuila: Jihova dia Ifuẋi, Nzambi ia Izalaiele, uambe kiki: Jingana jenu mua kà a tangela kiki:

⁵ Eme nga bhange oxi, ni muthu, ni iama iala ku thanduʼa mavu mu ngongo, ni kutena kuami eme-muène, ni lukuaku luami lua nguzu, hé ngi i bhana ue uoso ua ngi uabhela ku mesuʼami.

⁶ Kiki-phe jixi joso jiji nga ji bhakula bhu makuʼa Nabukodonozolo, sobha ia Babilonha, mubhikʼami; katé ue ni iama ku mukáu nga mu bhe-iu phala iende ni ku mu bhikila.

⁷ Jixi joso ja kà mu bhikila muene, ni monʼê, ni monʼa monʼê, katé ue kia kà bhixila kizuua kia ixi iê-muène-muene ku di uanena-iu kuala jixi ja vulu ni jisobha ja makota.

⁸ Kia kà kala-phe kiki, se bhu kala ixi mba utuminu u kamba ku bhikila muene Nabukodonozolo, sobha ia Babilonha, anga a kamba ku ta xingu iâ moxʼia jungu ia sobha ia Babilonha, ixi ioio nga kà i zungila ni xibhata, ni nzala, ni kipheku, katé ki ngi i jikinisa muene ku lukuaku luê-muene, Jihova ua ki tange.

⁹ Kana-phe ku bhana mátui ku jipolofeta jenu, ni akua iphata, kia mi zuelela, kuamba: ki mua-ndu bhikila sobha ia Babilonha.

¹⁰ Mbata a mi zambuila makutu, phala ku mi balakala dikanga dia ixi ienu, nda eme ngi mi kaiese mʼoxi ienu, enu nda mu jime o mbutu.

¹¹ Maji o muiji uoso u ta xingu iê moxiʼa jungu ia sobha ia Babilonha, anga u mu bhikila, eme nga kà u xa mʼoxi iê, ua kà i dima, ua kà tunga muenhomo, Jihova ua ki tange.

¹² Anga ngi zuela ni Zedekiia, sobha ia Juda, kala kiambe o maka osoʼá, kuila: Jixingu jenu, te-nu-ju mu jungu ia sobha ia Babilonha, mu mu bhikile muene ni mundu uê nda mu laie.

¹³ Eie-phe u fuilaʼhi nʼeie ni mundu ué, ku xibhata, ni ku nzala, ni ku kipheku, kala kiambe Jihova ku athu a kamba kubhikila sobha ia Babilonha?

¹⁴ Ki mu bhane-ze mátui ku izuelu ia jipolofeta kia mi tangela, exi: Sobha ia Babilonha ki mua-nda ku mu bhikila. Ala-phe ku mi zambuila makutu.

¹⁵ Mukonda kʼeme nga a tumikisa, anga aia ni kuzambula ngó makutu mu dijina diami, phala eme ngi mi kaiele kuengi; enu ni mu jime o mbutu ni enu ni jipolofeta jene ala ku mi zambuila makutu; Jihova ua ki tange.

¹⁶ Jinganga ue nga a zuelela ni mundu uoso uenhú, ngixi: Jihova uambe kiki; Kana kubhana mátui ku izuelu ia jipolofeta jenu, kia mi zambuila, exi; Talenu, itutu ia inzu ia Jihova ia-nda kuvutuka kindala muene mu ku tunda ku Babilonha; maji makutu ngó ala ku mi zambuila.

¹⁷ Kana ku a bhana mátui, inda bhikilenu sobha ia Babilonha nda mu kole muenhu; kuma phalaʼhi ki bhangesa mbonge iii i xala ngundu?

¹⁸ Mbata se ene ala jipolofeta muene, se kizuelu kia Jihova kiʼala ni ene, a sambe-phe hanji kindala kua Jihova dia Ilombo Ieta, phala o itutu ia subhuka mʼonzo ia sobha ia Juda mu Jeluzaleme, ki íie dingi ku Babilonha.

¹⁹ Mukonda Jihova dia Ifuẋi ua zuela ku mbandu ia jiphiladi, ni musanza, ni maxikikilu, ni itutu ia mukuá dingi ia subhuka mu mbonge,

²⁰ Ioio, Nabukodonozolo, sobha ia Babilonha, ka iʼambatele kioso kia balakala Jekoniia monʼa Nzuakí, sobha ia Juda, kumoxi ni ilamba ioso ia Juda ni ia Jeluzaleme, kia a katula mu Jeluzaleme iú ua a bheka ku Babilonha.

²¹ Xi, kiene muenʼiki kia tange Jihova dia Ifuẋi, Nzambi ia Izalaiele, ku mbandu ia itutu ia subhuka mʼonzo ia Jihova ni mʼonzo ia sobha ia Juda mu Jeluzaleme, kuila:

²² Hádia a kà iʼambata ku Babilonha hé ia kà kala kuenhoko katé bhu kizuua ki nga-nda ku i zungila dingi, kiene kia tange Jihova—Kienhokio-phe, nga kà i bandesa dingi hé nga kà tona dingi ku i bheka bhu kididi kiki.