Jelemiia 26 - O Mikanda Ikola

Jelemiia u zambula kubudika kua Tembulu ni kibuika kia Jeluzaleme. Muene u bhulaka ku mu jibha

¹ O ku dimatekenu dia utuminu ua Nzuakí, monʼa Joziia, sobha ia Juda, kueza kizuelu kiki kia Jihova, kuila:

² Jihova uambe kiki: Imana mu kimbaka kia inzu ia Jihova, u tangele mabhata oso a Juda a mu kuiza mu kubheza kʼonzo ia Jihova, maka oso u nga ku tumu ku a tangela; kujimbe-ku, né kizuelu kimoxi ngó.

³ Bhu kala ni bhabha sumba a tena kuívua, nʼa bhane dikunda kala muthu ku njila iê ia ibha; nda eme ngi diele ku phulu i nga mu sota ku a bhanga mukonda dia ku ibha kua ibhangelu iâ.

⁴ Tangela-u-phe, kuma: Jihova uambe kiki: Se mu kamba ku ngi bhana mátui, ni mu i ni kuenda mu ngonge iami, i nga mi tela ku pholo dienu,

⁵ phala muende ni kuívua maka ma abhikʼami, jipolofeta, ji ngala ku mi tumikisa, mu ku ji tumikisa ngi di meneka muene, maji enu hanji nguenu kuívua;

⁶ kuabhu-phe, nga-nda kubhangesa kuila inzu iii i kituka kala Silu, o mbonge iii i di bhanga ia mázui phala jixi joso mu ngongo.

⁷ Ni jinganga, ni jipolofeta, ni mundu uoso evu kioso Jelemiia kia zuela maka mosoʼama mʼonzo ia Jihova.

⁸ Anga ki bhita kuila kioso-phe Jelemiia kia zubha kuzuela ima ioso ia muʼambelele Jihova kuila tangela-iu mundu uoso, ni jinganga, ni jipolofeta ni mundu uoso, a mu kuata, exi: Ni kidi kiene eie u fua.

⁹ Mukonda ua zambula mu dijina dia Jihova, uixi: Mukua ni Silu, kiene kia kà kituka inzu iii, o mbonge iii a kà i sengulula ia kà di bhanga ngundu, hé ia kà xala ngó ki ia kà mona muthu u tunga-mu. Ene oso mʼonzo ia Jihova anga a di bhongolola phala kuzoka ni Jelemiia.

¹⁰ Adiakime-phe mua Juda, kioso kievu makʼama, a tunda mʼonzo ia sobha hé a banda kʼonzo ia Jihova hé a xikama bhu Muelu Uobhe ua inzu ia Jihova.

¹¹ Bhenhobho jinganga ni jipolofeta a tangela adiakime a Juda ni mundu uoso, exi: Muthu iú, muedi ua kúfua, mukonda enuʼenu mua dʼivila-kiu ni mátui menu kioso muene kia zambula o mbungula ku mbonge iii.

¹² Jelemiia hé u zuelela adiakime oso ni kifuxi kioso kuila: Jihova muene ua ngi tumu kuzambuila mbungula ku dibhata didi ni ku mbonge iii kala o izuelu ioso i muevu.

¹³ Kindala-phe iukisenu njila jenu ni ibhangelu ienu, nda muivue dízui dia Jihova, Nzambi ienu, Jihova muene a diele ku phulu ia tange ku mi bhanga enu.

¹⁴ O ku mbandu iami, eme-phe, ngala bhu makuʼenu, ioso i muʼambe ku ngi bhanga ia uabha, ia mi zelela ku miẋima, iene i mu ngi bhanga.

¹⁵ Maji ijienu-kiu-phe ni kidi kioso, kuila se mu ngi jibha eme muanda ku di bhekela manhinga ma muthu ua iuka ku thandu dienu, ni ku thandu dia mbonge iii ni ku thandu dia oso a tungu-mu; mbata ni kidi kiene, Jihova muene ua ngi tumikisa kokuenu, phala ku ngʼivua ni mátui menu o maka mosoʼama.

¹⁶ Bhenhobho-phe, adiakime, ni kifuxi kioso, ambela jinganga, ni jipolofeta, exi: Muthu iú ki muedi ua kalunga, kuma mu dijina dia Jihova, Nzambi ietu muene-muène mua tu zuelela.

¹⁷ Mu kaxi kâ hé mu balumuka amoxi-mu ku ikulakaji mʼoxi ienhoio hé a zuelela kionge kioso kia athu, exi:

¹⁸ Mikeia dia mukua Molaxita ua zambuile mu izuua ia Ezekiia, sobha ia Juda, anga u tangela mundu uoso ua Juda, uixi: Jihova dia Ifuẋi uambe kiki: Ziione a kà mu dima kala mukáu, Jeluzaleme ua kà kituka ndunji ja matadi, o ditala dia inzu iii dia kà di bhanga kala dilundu mu ditutu.

¹⁹ Mbebhu, Ezekiia, sobha ia Juda, ni akua Juda oso, a mu jibha? Manhi ene uoma ki ua a kuatele ua Jihova, anga a dionda jihenda ja Jihova? Jihova anga u diela ku phulu ioso ia tange ku a bhanga ene? Etu manhi tu di bhekela ku ibha kua vulu kiosuʼiki ku mienhu ietu?

²⁰ Kua kexile ue muthu ua kexile mu ku zambula upolofeta mu dijina dia Jihova: Udiia, monʼa Semaia, mukua Kidiate-Jadimi, ua zambuile ue kia ibha ku mbonge ienhiʼii ni ku ixi iii kala maka moso ma zambula ue Jelemiia.

²¹ Sobha Nzuakí, ni mazonda é oso, ni adiakimi oso, kioso kievu maka mê, sobha ua sota ku mu jibha; Udiia kievu kiki, uoma ua mu kuata hé u lenga, uia ku Ijitu.

²² Maji sobha Nzuakí, ua tumikisine athu ku Ijitu, ene a Elenatane monʼa Akebolo ni athu a mukuá dingi ai-nê ku Ijitu;

²³ ene hé a katula Udiia ku Ijitu anga a mu bhekela sobha Nzuakí, muene hé u mu jibha ni xibhata, kimbi kiê hé a ki takuila mu jimbila ja athu ngó a kambe majina.

²⁴ Maji-phe kijingu kia Haikane monʼa Safane kia kuatekesa Jelemiia phala ka mu bhakule bhu maku a kifuxi phala ku mu jibha.