Jelemiia 24 - O Mikanda Ikola

Kisukila kia inda i iadi ia jifiku

¹ Jihova anga u ngi bhangesa kutala; hé ngi mona inda i iadi ia jifiku, a i tula bhu kanga dia tembulu ia Jihova, kioso Nabukodonozolo, sobha ia Babilonha, kiʼambata Jekoniia, monʼa Nzuakí sobha ia Juda, ku uhutile, ni ilamba ia Juda, ni asongi-a-mabaia ni asudi-a-thumba mu Jeluzaleme anga uiza-nâ mu Babilonha.

² Kinda kimoxi, kia kexile ni jifiku ja uabha muene, kala jifiku ja kisonaxi; maji o kinda kia kamukuá kia kexile ni jifiku ja ibha kia vulu, ki ji xikina ku ji dia, mukonda dia ku ibha kuê ku ja ibha.

³ Jihova anga u ngʼambela, uixi: Ihi i ua mu mona, Jelemiia? Eme-phe, ngixi: Jifiku. Jifiku ja uabha, ja uabha kiavulu, ni ja ibha, ja ibha ue kinéne, ki ji xikina ku ji dia, mukonda dia ku ibha kuê ku ja ibha.

⁴ Kizuelu kia Jihova-phe anga kiza kokuami, kuila:

⁵ Jihova, Nzambi ia Izalaiele, uambe kiki: Mukua ni jifiku jiji ja mbote, kiene ue ki nga-nda kuijiia akua Juda, a ambata ku uhutile, u nga katula eme-muène bhu kididi kiki, eme nga a bheka ku ixi ia akua Kaldeia, phala mbote iâ.

⁶ Nga-nda ku ta mesu mami ku thandu diâ, phala mbote iâ, anga hadia ngʼa vutula dingi mu ixi mumu, hé ngʼa tungisa ki nga kà a muanga dingi; ngʼa kà a kuna ki nganda ku a vuza.

⁷ Anga ngʼa bhana muẋima phala nʼa ngʼijiia, mbata eme ngi Jihova; ene a kà kala mundu uami, eme nga kà kala ngi Nzambi iâ; mbata a kà bilukila kokuami ni muẋima uâ uoso ua muvimba.

⁸ Mukua ni kia ẋimbuka jifiku ja ibha, kuma, mukonda dia ku ibha kuê ki ji xikina ku ji dia, kiene ue ki nganda kubhakula Zedekiia, sobha ia Juda, ni ilamba iê, ni iá a subhuka mu Jeluzaleme, a xala ku iá a subhuka mʼoxi mumu, ni iá a tungu mʼoxi ia Ijitu.

⁹ Anga ngʼa bhakula phala nʼa kituke kima ki kuatesa uoma, kuxixima kua mautuminu moso mu ngongo, lusebu ni Sabhu, môndo ni mázui mu ididi ioso mu nga-nda ku a takuila.

¹⁰ Nga-nda ku a tumikisa mu kaxi kâ, xibhata, ni nzala, ni kipheku katé kia jima o mbutu mu ixi i nga a bhana ene ni jitata jâ.