Jelemiia 23 - O Mikanda Ikola

O kudielela ima ià kʼeza-ku

¹ Jihova uixi: Kokolo dia abidi ala ku buikisa ni ku muanga o jimbudi ja dikela diami.

² Uila kiki, Jihova Nzambi ia Izalaiele, uambe kiki ku abidi ala kuinga o mundu uami: Enu mua muanganesa jimbudi jami, enu mua ji kaie, o jene ki mua ji zungila; Jihova-phe uambe: Talesenu, o phekalu ienu iii nga-nda ku mi betela-iu.

³ Anga eme-muène ngi bhongolola joso ja subhuka ku jimbudi jami, ngi ji takana ku jixi joso kua ji kaielele anga ngi ji vutula dingi mu ibhanga iê, hé ja kà di vuala anga ji sokoloka muene.

⁴ Hé nga kà ji bhana abidi a tokala o ku jinga, o jene ki mungu dingi jà kala ni uoma, mba jiia ni kusasumuka, mba bhu kala ngó imoxi i kamba-ku, Jihova ua ki tange.

⁵ Jihova uixi: Talesenu, kua-nda kuiza izuua, Davidi nga kà mu balumuina Mbutu ia Iuka; kuma muene sobha, ua kà tumina hé u bhanduluka kiavulu, anga u bhanga ima ia tokala ubatuilu ua kidi ni uiukilu mu ngongo

⁶ O mu izuua iê Juda ua kà bhuluka, o Izalaiele uà kà tunga ni kukondama; didi-phe diene o dijina dia-nda ku mu luka: Jihova Dilungilu Dietu.

⁷ Uila kiki, kua-nda kuiza izuua, eme Jihova, nuka dingi a kèla: Jihova a nangenene, ua katula anʼa Izalaiele mʼoxi ia Ijitu:

⁸ maji: Jihova a nangenene, uedi muiji ua dibhata dia Izalaiele ua u takana kʼoxi ia kusuku ni ku jixi joso kua a tandele; anga a kà tunga kiá mʼoxi iâ.

Jipolofeta ja makutu

⁹ Muẋima ua ngi budika moxi, mukonda dia jipolofeta; ifuba iami iosololo ia diambatesa; ngedi kala muthu ua kodiua, mukua ni muthu a mu iokola kuala o vinhu, mukonda dia Jihova, ni mukonda ue dia ukolelu ua maka mê,

¹⁰ Kuma oxi iezala akua jiphanda, oxi ue i idila mukonda ia tambula kiá mázui: o makela ku tutu ia kukuta; kaxi o uendelu uâ ua ibha, o kusuina kuâ ki kua uabha.

¹¹ Mbata kixi o polofeta, uixi o nganga, a di kasanesa; katé ni monzo iami phulu iâ muene mu nga i sange, eme ngi Jihova.

¹² Uila kiki njila iâ ia-nda ku a kala muene mukuâ ni ididi ia ẋanana mua vundu: a-nda ku a lundujula anga a di-bhalela muenhomo, mbata nga-nda kua bhekela divuua ku thandu diâ, mu muvu muene ua ku a zungila, kiene kiambe Jihova.

¹³ Mu jipolofeta ja Samádia nga di uana-mu lusebu; a kuata ku zambuila kua Bahale ia a luezesa o mundu uami ua Izalaiele o njila.

¹⁴ Maji mu jipolofeta ja Jeluzaleme nga di uana-mu kisunji kionéne: èhé, a kuata ku-ta o jiphanda, a di-ambatesa ni kádia, o maku ma ingumba ene dingi a ma suinisa, mbé a lémbue kudiela o ikuma iâ; o ki nga ela suí, edi kala Sodoma, akua-bhata momo, mukua ni Ngomola.

¹⁵ Uila kiki Jihova dia Ilombo Ieta uambe kiki ku jipolofeta: Talesenu o jipolofeta jiji nga-nda ku ji disa lojina, anga nga a nuisa menha ma ndululu; Kuma lufuku lua jipolofeta ja Jeluzaleme lua sambukila oxi ioso.

¹⁶ Jihova dia Ilombo Ieta uambe kiki: Maka ma jipolofeta ki mu ma bhane mátui, oso ala ku zambula muʼaxaxi kenu, ala ku mi longa makutu; ala ku tanga kisuma maji kia tundu ku muẋima uâ-ene, ki kia tunduʼé mu kanu dia Jihova.

¹⁷ Thembu joso a kuata kuambela iá a ngi zembe eme, exi: Jihova uambe kiki: Kua mi xikamena paze; o uoso ua mu kuenda kioso kia mu tumu o muẋima uê a mu ambela, exi: Kʼilahize. Ki kuizé kima!

¹⁸ Abha mukuahi-phe ua nange mu kikutu kia Jihova, iu ua mono, iu uevu kizuelu kiê? Mukuahi uevidila kizuelu kiê, iu ua kivu muene?

¹⁹ Kiki-phe, kibhungu kia Jihova kia tundu ni kutema kuoso; ku mítue ia akua ituxi, kibhungu muene kia nguzu kia-ndu laukila-ku ni phulu ioso.

²⁰ Njinda ia Jihova ki ia kà somboka, katé muene ia kà bhanga ni ku kumbidila ioso ia mu tumu muẋima uê; ku izuua ia kà sukaku, ima iii ia kà mi lombolokela kiambote.

²¹ Jipolofeta jiji kʼeme nga ji tumu, maji jene jaii ni lusolo; ki ene u nga zuelela, maji né kienhokio, ene a zambula muene mu konda iâ.

²² Maji-phe, se a kexile mu kikutu kiami, hinu mundu uami eji ku uivisa maka mami, anga a u bhangesa ku bhana dikunda ku njila iâ ia ibha ni mu ku ibha kua ibhangelu iâ.

²³ Jihova ua kiʼambe, uixi: Manhi ngi Nzambi ngó bhua butu, ki ngi Nzambi ue ia dikanga?

²⁴ Jihova uixi: Saiku muthu u suama muene mu masuamenu, eme hé ngi lémbua ku mu mona? Manhi eme ki ngiʼzala mu diulu ni mu ngongo? Jihova ua ki tange.

²⁵ Ngène mu kuívua ima i zuela jipolofeta jojo, ni kuzambula makutu mu dijina diami, exi: Nganjiua, nganjiua.

²⁶ Kia kà suka bhebhi ni kubhita kienhiki ku miẋima ia jipolofeta ji zambula makutu, kuma ala ngó jipolofeta ja ku di nganala kua miẋima iâ ene?

²⁷ A fika kuila mundu uami a u jimbisa dijina diami mukonda dia jinzoji jâ jala mu kuia ni ku di tangela mudiâ, kala jitata jâ ki ja jimbi dijina diami mukonda dia Bahale.

²⁸ Uoso polofeta uala ni nzoji, a tange o nzoji iene. O ió uoso uala ni maka mami momué, a zuele maka mami ni kidi. Kuma Jihova uixi: Ibhiate iala ni kima kiahi ni tiliku?

²⁹ Jihova ua ki tange, uixi: O maka mami manhi kasoko ni túbhia, kʼedi kala malatelu i sasujula ditadi?

³⁰ Uila kiki-phe, eme Jihova, nga bilukila jipolofeta jenhiji ja muʼia ni ku di nhana izuelu iami mudiâ, iú u nhana mukuá, iú u nhana mukuá.

³¹ Jihova uambe, uixi: Eme nga bilukila muene jipolofeta jenhiji ja mu kuila, a zuela ima iâ ene, exi: Muene uambe uixi.

³² Jihova uambe, uixi: Eme nga bilukila muene a tanga uanji ua upolofeta mu nzoji ja makutu, anga a ji tanga, anga a bhangesa athu ami ku tondala ni makutu mâ ni udianzunga uâ; kuma eme ki nga a tumu mba ngʼa a bhana ngonge; ene ue o mundu iú ka u bhekela mbote ia kima, Jihova ua ki tange.

³³ Kioso-phe athu iá kia kuibhula, mba polofeta ioso-ioso, mba nganga, kuila: O kunema, kua Jihova, kuebhi? Eie-phe u mu vutuila, uexi: Kunema kuahi? Nga-nda ku miʼxa. Jihova ua ki tange.

³⁴ Se polofeta, mba nganga, mba kifuxi, kila: Kinemenu kia Jihova, eme muthu ió nga-nda ku mu talesa hadi ni dibhata diê.

³⁵ Kienhiki-phe, mua-nda kuila o iú uambela mukuá, o iú uambela phangʼiê, muexi: Jihova ua vutula kiebhi? Jihova muene ua zuela kiebhi?

³⁶ Maji nuka dingi mua-ndu xinganeka kunema kua Jihova; mukonda muthu ni muthu, kia-ndu mu nemena o kizuelu kié-muène-muene; mbata maka ma Nzambi ia muenhu muala ku a bhengeleka, ma Jihova dia Ifuẋi, o Nzambi ietu.

³⁷ Polofeta-phe, eie ua kà muambela kiki: Jihova ua ku vutuila kiebhi? Jihova ua zuela kiebhi?

³⁸ Maji enu-phe mua mu kiʼambelaʼhi muexi: kimbamba kia Jihova; Jihova phe uambe kiki: Mukonda enu mua mu zuela kizuelu kiki: Kimbamba kia Jihova, enuʼenu nga mi tendelela kiá, ngixi: Ki mu zuele muexi: Kimbamba kia Jihova;

³⁹ Kienhiki-phe, eme ue nga-nda ku mi jimba muene xatababá, ni enu ni mbanza i nga mi bhana enu ni jitata jenu, nga-nda ku mi katula bhu pholo iami.

⁴⁰ Ku thandu dienu nga-nda ku ta-ku ubhika uà kalelà-ku ni sonhi ki ibhu, ia bhingi ka tena dingi ku i jimba.