Jelemiia 22 - O Mikanda Ikola

Muzambu ua kibhidi kia tokala dizemba dia usobha ua Juda

¹ Jihova uambe kiki: kulumuka ku dizemba dia sobha ia Juda u kunde-ku kizuelu kiki:

² Uila uixi: Ívua kizuelu kia Jihova: Eie u sobha ia Juda ua di nenge bhu kiandu kia Davidi: nʼeie ni jiselevende jé, ni mundu ué, enu muene kubokuena bhu mielu iii.

³ Jihova uambe kiki: Kumbidila ubatuilu ua mbote ni uiukilu, muende ni kusukununa uoso a mu bhundu kuala kingumba; o nzuángiza ki mu mu tatese, mba monʼa difundu, mba mutudi, ki mu mu bhange kusuína, ki mu bhubhise manhinga ma muthu ua bene, bhu kididiʼabha.

⁴ Kuma se mu kidi kiene, mu tumaka kizuelu kiki, o jisobha ji tulama bhu kiandu kia Davidi a-nda ku bokuena jinga bhu mielu ia dizemba didi, mu makalu ni ku jikabalu, ni ene ni jiselevende jâ, ni mundu uâ.

⁵ O ki mu fula ku bhana o mátui ku maka iá, nga di lokela muene eme ngi Jihova, dizemba didi di kituka ngundu.

⁶ Mbata Jihova uambe kiki ku dizemba dia sobha ia Juda: Eie ua ngi kala u Ngiliiade, u mútue ua Libanu; maji kidi muene-ze hinu ngi ku bhanga u kikangalakata, u jimbanza ja biluka jingundu.

⁷ Mbata nga-nda ku ku kasela abuikixi, kala mubuikixi ni mata mê: ene, o misedro ié ia di tungulʼoio, a-nda ku i kokela bhoxi, anga a i ta mu túbhia.

⁸ Anga o ifuẋi ia ndumba ia kà ku bhita mu mbongeʼumu, hé kala muthu ua kʼambela mukuá uixi: O Jihova ua bhangelaʼhi kiki ku kimbonge kiosuʼiki?

⁹ Bhenhobho a kà kumbulula, exi, mukonda ene o kikutu kia tele ni Jihova Nzambi iâ a ki xisa, ia a diundila jinzambi jengi, ni ku ji bhikila.

Muzambu ua kubilukila Salume, sobha ia Juda

¹⁰ O uafu ki mu mu dile, mba mu mu tenda: dilenu kiavulu ió ua mu-ia mbata ki mungu dingi a kà vutuka, né ngó kuila oxi mua mu vualela hádia u mona-mu dingi.

¹¹ Kuma kiene kiambe Jihova kua Salume, monʼa Joziia, Sobha ia Juda, ua hingi ungana bhu kididi kia tatʼâ Joziia, ua tundu bhu kididʼiki, kuma: Nuka dingi a kà vutukila-bhu.

¹² Maji ua-nda kuà fuila kuene kua mu-ia-nê ku ubhikʼoko, oxi iii ki mungu dingi a i mona.

¹³ Lamba dia ió uoso u tunga dibhata diê, ni mangonha! uedi jinzu jê u ji tungila muʼngumba, ukalakesa mukuá se ngó ku mu futa, o ua kalakala kia mu-ié ngó.

¹⁴ Anga uila: ngi di tungila kinzu kia dixala, ni maxilu ma zanze; anga u i ta ni jinjanena; u folala kidibhata kioso ni mabaia ma musédulu, hé u ki teka ni husu.

¹⁵ U kala muene ku ungana, mukonda ua di jikila mʼonzo ia musédulu, kuambe? Mbe tatʼenu ka dile, ka nuine, ka kumbidile ubatuilu ua mbote ni uiukisilu? Bhene-phe bhua muena ujituʼobho.

¹⁶ Kia kexi, o hukunhu ni phulungu u a zokela o mvunda; ua bongele-phe ujitu; abha ki kuene o ku ngijiiʼoko? Eme ngi Jihova.

¹⁷ Maji o mesu mé-eie-phe ni muẋima ué, ua lungu ngó ku unjenje ué, ni ku manhinga ma muthu ua bene, phala ku ma bhubhisa, ni mu kubhondeleka, ni mu ku suina phala ku di bhanga.

¹⁸ Kienhiki Jihova uambe kiki kua Nzuakí monʼa Joziia sobha ia Juda, uixi: Ka-nda ku mu dila, ni kuila: Uaué phange iami ia diialʼé! mba Uaué, phange iami ia muhatuʼé! Né-mbe bhu kala ngó Uaué muenexiʼé! Mba Uaué kutendiʼé!

¹⁹ A-nda ku mu funda ufundilu ua bulu, a mu koka nʼa mu texi dikanga muene, kuema dia mielu ia Jeluzaleme.

²⁰ Banda ku Libanu, nda u dikole, suina dízui mu Basane, u handekele tundé mu Abadimi mbata o jimbuẋila jê ja iokojoka.

²¹ Muʼaxaxi ka jimbonge jê eme nga kexi ku ku dimuna, eie-phe, uixi: Nguami kuivua. Kienhiki kiene o kifua kié tundiʼé mu undenge ué, kuene kuẋikina ku bhana mátui ku dízui diami.

²² O abidiʼé a-nda kua enga kuala o kitembu, o jimbuẋila jê, ja-nda kuia ku ubhika. Nga tange kidi, kiene kiua kia-nda ku ku kuata o sonhi, anga pholo i ku sonoka, mukonda dia kuiibha kué.

²³ Eie ua tunga mu Libanu, eie ua-te kikalanga mu misédulu! O kia-nda ku ku kuata o mika, ni misusu kala ia muhatu uala ku isenda, ua-nda ku di uana!

²⁴ Kala ki ngala ku muenhu eme ngi Jihova, Jekoniia mona a Nzuakí, sobha ia Juda, né hanji se ua kexile kadimbu ka nela ia lukuaku luami lua dilu, ngeji ku ku thathumuna-ku muene.

²⁵ Hé ngi ku bhakula bhu lukuaku lua ió abhindamena o muenhu ué, ni bhu lukuaku lua ió a ku kuata o uoma, ngʼambe, bhu lukuaku lua Nabukodonozolo, sobha ia Babilonha, ni bhu lukuaku lua akua Kaldeia.

²⁶ Hé ngi mi takula nʼeie ni mamʼenu uà ku vuala, ku ixi iengi, ka ku vualela-ku, kuene ku mua kà fuilʼoko.

²⁷ Maji oxi ia mu kuinda eneʼoio phala kualukila-mu, ka-nda ku vutukilamu.

²⁸ Kifua Jekoniia iú muthu ua di bhange kitutu kia ufusa kia budika? inga kitutu kia ibhila athuʼoso? a a texila-he-phe kiki, ni muene ni muiji uê, ia a a tande ku ixi ene ka ijiia?

²⁹ Eie ngongo, ngongo ia kime, ngongo ia kime, tata! Ivua o kizuelu kia Jihova!

³⁰ Jihova uambe kiki: Sonekenu kuma muthu iú o anʼê a mu tambula-nâ, muthu u kala kiki, o mu izuua iê kubhanduluka ka ku mono; mba ku muiji uê ku tunda muthu ua bhanduluka, phala a tulame bhu kiandu kia Davidi anga u tumina dingi mu Juda.