Jelemiia 21 - O Mikanda Ikola

Ngolokela ia kibuika kia Jeluzaleme kua Nabukodonozolo

¹ Kizuelu kia tundu kua Jihova kieza kua Jelemiia, kioso sobha Zedekiia kia mu tumikisa Paxulu monʼa Malekiia, ni Zefaniia monʼa Mahaseia, dia nganga, uixi:

² Nga ku diondo, tu zuelesele Jihova u mu ibhule kiambote, kuma Nabukodonozolo, sobha ia Babilonha ua mu lua ita ni etu, sumba-phe, Jihova u tu fikidila, kala kia tokala ukalakelu uê ua madiuanu, nʼa tu sondoluele-nê.

³ Bhenhobho Jelemiia ua ambela, uixi: Zedekiia mu ambedienu kiki:

⁴ Jihova Nzambi ia Izalaiele, uambe kiki: Talesenu, eme nga-nda ku lungulula ikumba ienu ia ita i mua kuata bhu maku menu phala ku di lua ni sobha ia Babilonha, ni akua Kaldeia, oso a mi jinguluka kuema dia imbaka, anga nga a bhongoluela muʼaxaxi ka mbonge ienhiʼii.

⁵ Eme-muène ue nga-nda ku lua ita nʼenu ni lukuaku luami lua nguzu, nga lu oleka ni undanda ni njinda, ni nganji ni mualala ua dikota.

⁶ Akua bhata mu mbongeʼumu anga ngʼa kuama, ni athu ni ibhaku, ene a-nda kufua ku dibhebhu dionéne.

⁷ O ki ki zubha kubhita, eme Jihova, ngiia Zedekiia, sobha ia Juda, ni jiselevende jê, ni mundu, oso a subhuka mu mbongeʼumu ku dibhebhu, ni ku xibhata ni ku nzala, nga a bhakula bhu lukuaku lua Nabukodonozolo, sobha ia Babilonha ni bhu lukuaku lua jinguma jâ, ni bhu lukuaku lua ió oso a mu sota o muenhu uâ; muene ua-nda ku a leleka ku mazu a xibhata; ka-nda ku a fikixila, né ngó ku a lendukila, mba kuila u a kuatela henda.

⁸ Mundu iá-phe tangela-u: Jihova uambe kiki: Talenu eme nga mi tudila njila ia muenhu ni njila ia kúfua bhu pholo ienu.

⁹ Uoso uambe kuxala mu mbongeʼumu, ua xikamena kúfua ku xibhata, mba ku nzala mba ku dibhebhu; maji uoso u katuka anga uia ku di bhakula ku akua Kaldeia, oso a mi te mukonda, u kala ni muenhu, o muenhu ue iene o mbole iê i a bongo.

¹⁰ Mukonda Jihova, uixi: Mbata eme mbonge iii nga i futulukila muene, ki i mono mbote, a kà i bhakula bhu lukuaku lua sobha ia Babilonha, anga muene ua kà i ta mu tuia.

O kufundisa mu Mbanza ia Juda

¹¹ O dibhata ue dia sobha ia Juda ambela-diu, uixi: Ivenu kizuelu kia Jihova:

¹² Eie u dibhata dia Davidi, Jihova uambe kiki: Mu imene endenu ni kubatula milonga mu kidi, nda uoso a mu bhundu mu mu sukunune bhu lukuaku lua kingumba; phala o njinda iami ki i tunde kala tuia, ni i uame hé i kamba uoso u i jima mukonda dia kuiibha kua ibhangelu ienu.

¹³ Jihova uambe kiki: Talesa, eme nga ku futulukila eie, ua tunga mu dikolo, eie u ndanji mu dinhana, nga mi luualela enu muala kuila: Mukuahi u kulumuka kunu ku tu lua? Mba mukuahi u bokona mu mabhata metuʼô?

¹⁴ Eme nga-nda ku mi zungila ni futu ia soko ni ibundu ia ibhangelu ienu, kiene kiambe Jihova; nga-nda ku bambula túbhia ku kitumba kiâ, tua-nda kujidisa ima ioso iala mu jimbandu jê.