Jelemiia 20 - O Mikanda Ikola

Paxulu u beta Jelemiia anga u mu ta bhu ditolongo

¹ Anga Paxulu monʼa Imele, o nganga, a mu tele ku pholo mu ku tambula konda iaʼnzo ia Jihova, uevu Jelemiia kuzambula ima iii.

² Anga Paxulu u beta polofeta Jelemiia, iu ua mu te bhu ditolongo diala bhu muelu ua dikota ua Bejamí moʼnzo ia Jihova.

³ Anga ki bhita kuila o kuma ki kuakie Paxulu u jituna Jelemiia bhuʼtolongo. Jelemiia bhenhobho uixi: Jihova ka kuixana kuila eie Paxulu; maji Mangolomisabibi.

⁴ Mbata Jihova uambe kiki: Talesa nga-nda ku ku bhanga u kikote phala eie muene ni makamba mê ene oso; ene a-nda ku laúka ku xibhata ia jinguma jâ, o mesu mé ma kà di muena-kiu: O Juda ioso nga-nda ku i bhakula bhu lukuaku lua sobha ia Babilonha; muene ua-nda ku a kuta anga uia-nâ ku Babilonha, hé ua kà a jibha ni xibhata.

⁵ Luamukuá ue, o jimbongo joso ja mbonge iii, ni soua ioso, ni ima iâ ioso ia matunda; euá, maumvuama moso ma jingana mu Juda ngi ma bhakula muene bhu lukuaku lua jinguma jâ, ene a-nda ku a bhunda, a a tambula, anga aia-nâ ku Babilonha.

⁶ Eie ue Paxulu, ni oso kiá a tunga mu dibhata dié, mua xikamena kuia ku ubhika; eie ua-nda kuiza ku Babilonha, kuene ku ua-nda ku fuila, kuene kua kà ku funda, nʼeie ni makamba é oso, oso u ua kexi ku zambuila mangonha.

O ku di tenda kua polofeta

⁷ Jihova, tata, eie ua ngi tobhesa, eme nga xala ni kutobha; kuma eie ua beta o nguzu eme ndenge, eie ua tolola; o kienhiki-phe kumbi dioso dia kambamba ala ku ngi bhanga kasekélelu; kala muthu mudiâ u ngi tobhesa.

⁸ Kuma ngala kuila o ki ngi zuela, ngi di kola; ngi ta nzongo: Usuéia ni kibuika; mbata maka ma Jihova, ma di bhange dilebhu phala eme, ala ku ngi tela-nâ muondo kumbi dioso dia kambamba.

⁹ Bhenhobho-phe, eme ngixi: Kuabhu nga te maka, nguami dingi ku tanga kima mu dijina dié. Maji-phe o maka mé mu muẋima uami medi kala túbhia, tua uama, tuʼojikile mu ifuba iami; nga bhuila ni kutala hadi, nga lémbua kiá.

¹⁰ Mukonda nga mu kuívua ki ala kulongolola o mundu, o ku mbandu joso ku kuata uoma, exi: Tu ambelienu-kiu etu tua kà mu tungunune; katé ni iá u nga di bhana-nâ ala ku kinga o kubhendujuka kuami, exi sumba u kala ni bhua tolokela; bhene-phe kiá bhu tua-nda ku mu kuatela, tu mu bhuile mabhukubhuku.

¹¹ Maji-phe o Jihova uala ni eme, mukua ni dizonda dia manekena ita; kienhiki, o ió a ngi langata, a-nda ku di bhukana, ka-nda kutena kutolola; sonhi ja-nda ku a kuata kinéne; mukonda ka bhange ima ia kubhanduluka, a xikamena jisonhi ji nagenena ki ji xikina ku ji jimba.

¹² Eie-phe, Jihova dia Ilombo Ieta, o muthu ua iuka uene ku mu lola, hé u mona o ilunji ni muẋima: tamanu ngi mona o phonzo ié, i ua-nda ku a vutuila, ku thandu diâ; nga ku bhakuila-phe o mulonga uami.

¹³ Imbilenu Jihova, Jihova mu ximanienu; mukonda o muthu uala bhu kibhidi muene u mu bhulula o muenhu bhu lukuaku lua ingumba.

¹⁴ Kokolo dia kizuua kia ngi vuala; o kizuua mamʼetu kia ngi vuala ki lémbue kuzediua!

¹⁵ Muenhó mukua phekalu, o muthu uoso ua tudila tatʼetu o jinjimbu, uexi: A ku vualela mona ua diiala; iú ua mu sangulukisile kiosuʼokio!

¹⁶ Muthu muenhó a kale mukua ni madiembu ianhá a buikisa kuala Jihova, sè ngó kuila ki mu kata ku muẋima; muenhó uila, o ku kimene uívua nzôngo, o ku mediia uívua kibulukutu.

¹⁷ Nzambi, ka ngi jibhilaʼhi tundé mu vumu dia mamʼetu? mba-phe o vumu dia mamʼetu dia kambelaʼhi ku di bhanga iene o mbila iami? mba-phe kemitinaʼhi hebhu i bhinga ka tena ku i vuala?

¹⁸ Phalaʼhi ngó nga tundu mu divumu, eme ngeza ngó ku tala hadi ni lamba, o izuua iami anga iia ngó ni kujidila mu lusebu?