Jelemiia 2 - O Mikanda Ikola

Jelemiia a mu tuma ku Jeluzaleme phala kubazela o mundu mukonda dia kuẋinuka kuâ

¹ Kizuelu kia Jihova anga ki ngi sanga,

² kixi: Nde, ua kà handekele mu mátui ma Jeluzaleme, uixi: Jihova uambe, kiki: Nga ku lembalala, ni mbote ja unzangala ué, ni jihenda jé ja ubhanga, ni kioso ki ua ngi kaiejela jinga mu kikangalakata, mu ixi ki i xikina ku i kuna.

³ Bhenhobho-phe Izalaiele a mu lumbilile Jihova, kifua ibundu ia mutomo ia mabhia mê: oso a mu minha-minha jinga, a a kitile akua mulonga; kua a tulukila jinga divuua, Jihova ua ki tange.

⁴ Ivenu kizuelu kia Jihova, enu dibhata dia Jakobo, nʼenu mu madiembu moso ma dibhata dia Izalaiele.

⁵ Jihova uambe, kiki: Jitata jenu ja ngi muene ni mangonha ahi mu kufundisa, kia a bhekesa o ku ngi sondoloka kala kiokio, nʼa di te mu kaiela o lusebu katé kia kituka jisemenhi ja hatu?

⁶ Alembua kuila: Jihova uala kuebhi, ua tu tundisa kʼoxi ia Ijitu? Iú ua tuʼendesa mu ixi ia kisekele, ixi ia manhana ni makungu, mu ixi ia kukuta ia kitombe kia kalunga, oxi kana muthu ua kexi kubhita-mu, mua bhingi monʼa muthu ka tena kutunga-mu?

⁷ Emiʼeme nga mi bokuesa mu ixi ia idima nda mudie o kibundu kiê ni mbote iê: maji enu-phe ki mua zubha kubokona-mu, oxi iami mua i kasanesa, o undundu uami mua u bhange kima kia ufusa.

⁸ O jinganga a lembua kuila: Jihova uala kuebhi? O jimesene ja kitumu a lembua ku ngʼijiia; o alongi a ngi tondalela ijila; o jipolofeta a zambuila Bahale ni ku landukila ima ki i bhandulula kima!

⁹ Kala kiki nga-nda ku-zoka nʼenu, eme ngi Jihova; katé ni ana a anʼenu hadia ngi zoka-nâ.

¹⁰ Kala kiki, bhitenu ku ikola ia Kitimi, mu tale; tumenu ue ku Kedale, mu tongolole kiambote, ni mu mone se kua bhitile kiá kia di-fu kala kiki.

¹¹ Kua kexi kiá kifuxi, ki tolokala jinzambi jê, kia di kalela kiua jene ki jinzambi? Maji-phe o mundu uami a tolokala o fuma iâ (o kimuenhu kiâ), iá a tambula kima ki ki bhandulula kima.

¹² Diuanienu-kiu kienhiki, enu mu madiulu, ki mi kale kisunji! di kuatienu mukondo ni kidi muene, Jihova ua ki tange.

¹³ Mukonda mundu uami abhange ima iiadi iaiibha: edi eme a ngi-xi, ngi otho ia menha ma muenhu, ia a kande ixima, ixima iene ia budika, ia kuata o kubhubha ki ia tena kuxikika menha.

¹⁴ Manhi Izalaiele mubhika? inga mamvala? a mu kutila-hi-phe kiki?

¹⁵ (Kia bhingi) anʼa jihoji a zumina ku thandu diê, a ta muzonga; oxi iê a mu sekalesa-iu; o mabhata mê a mu jikatesa-u, utunga-mu ka moneka.

¹⁶ Katé ni anʼa Nofe ni anʼa Tafane, a ku bulu katutu ka uongo.

¹⁷ Mbé o kiki kʼeie muene ua di sotelè-kiu, o kuxa Jihova Nzambi ié, bhu kithangana kia muene ku kuendesa mu njila?

¹⁸ O ki tualʼiki-phe njila ia Ijitu uala na-iu ni kima kia-hi, phala kunua menha ma Sihole? ni njila ia Asídia uala na-iu ni kima kia-hi, phala kunua menha ma ngiji?

¹⁹ O usuéia ué ua-nda ku ku bhana njumbu, mauendelu mé ma kuselumuka ene a-nda ku ku bazela: tuma-phe ku kʼijiia u di muene-kiu kuila o kuxa Jihova Nzambi ié, kima kiaiibha, ki ludisa mu kanu, ni ku kamba eie o uoma uami-eme, kiene kiambe Jihova dia Ilombo Ieta.

²⁰ Mʼukulu munhá kioso eme ki nga kexile mu kubukujula ophi ié ni kubatujula o mikolo ié, eie uambele, uixi: Ki mungu dingi ngi tondala; sumbala kiene maji leluʼidi ku tuthuthulundu tuoso ni bhu ixina ioso ia mixi ia uisu, ua mu-ia ni ku kotajana mu kubhanga undumbu.

²¹ Eme muène nga ku phaphele kala muvide ua mbutu ia uabha, mbutu ia mbote ia kitongola; ua kituka kiebhi-phe u mbutu ia seluka, kala muvide ua muxitu?

²² O ki ualʼiki-phe né-mbe u di sukula ni Salitre, mba u vudisa nzabá, kikuma kié kia di bhange muxinda ku ndanji bhu pholo iami eme, Jihova Nzambi ua ki tange.

²³ Eie uala kuila kiebhi: Eme kana ki nga di kasanesa ki nga xingidisa mahamba a Bale? Talesa o njila ié mu dikolo muná, uijiie kioso ki ua bhange, tongolola-kiu kuma uala u kamelu ka sakalala, ni kuenda jihonda mu njila jê.

²⁴ Mukete ua mukaji uejidila mikáu ia kukuta ia ditutu, kuoso kua mu tumu o muẋima uê, ufuenha kitembu; bhu kumbi diê mukuahi u mu fudisa o ku di bonga ni jindumbe? joso ji mu sota muene, ki ji bhinga ku di huha; kabasa mbeji iê ieza-bhu a di bonga-nê.

²⁵ Inda ditune kuenda kinama kié mu kanga sé sabhatu, o dikelengu dié ki di kale ni dinhota: eie-phe uixi: ku dielele-ku; lémbue! eme ngedi o jinzuangiza nga di uabhela na-ju, ngiia-nâ muene o kajiki-jiki.

²⁶ Kala ki tandanganha o muiii kuila a mu kuata, kiene ue ki tandanganha akua bhata dia Izalaiele; ni ene ni jisobha jâ, ni ilamba iê; ni jinganga jâ ni jipolofeta jê.

²⁷ Athu ala kuila o muẋi exi; Eie-eie u tatʼetu; ambela ditadi, exi: Eie ua ngi vuala; mukonda a ngi te makunda, ka ngi bhana pholo: maji bhu kumbi dia ku toka kuâ a-nda kuila: Balumuka u tu kudile.

²⁸ O jinzambi jé-phe ji ua di iudikila jala kuebhi? ji balumuke se ji tena ku ku kudila bhu kithangana kia ku bhondalala kué: Mbata jinzambi jé, u Juda, ja soka ni ji sanzala jé mu kuvula.

²⁹ Mu luilʼahi phata nʼeme? Enu oso muene mua ngi tondalela, eme ngi Jihova.

³⁰ Anʼenu nga tale ngó hadi ia ku a beta; ene ka xikina ku a bazela: o xibhata ienu ia jikinisa jipolofeta jenu mukua ni hoji i sanujuna.

³¹ Enu muiji ua kime! Suuenu maka ma Jihova: mbé ki ngalʼeki nga di bhange ngi kikangalakata kiahatu kua Izalaiele? inga nga di bhange ngi mukáu ua kitombe kiedi bui? Phalahi phe mundu uami, uila: Etu tua batuka kokué; kokué ki mungu dingi tuiza-ku?

³² Manhi monʼa kilumba u jimba makembu mê, inga dibhanga u landuka izuatu iê ia ubhanga? Eme phe o mundu uami a ngi jimbi muene, mu ndumba dia izuua ki i xikina ku i tanga.

³³ Kifua kiene ki ukembesa o njila iéʼokio mu sota o henda? Ki kia bhingi katé-phe ni ahatu a idianzunga, eie ua a longo o jinjila jé.

³⁴ Katé ni ku mixiku ia izuatu ié kuala ue manhinga a mienhu ia athu a kambele kikuma, ni a bhindama: ki ngi bhingile-phe ku kanda phala ku i sanga, kuma kia di monekena muene ku ima ioso iii.

³⁵ Eie-phe hanji ua mu kuila: Nga di zele, kia kidi muene, o njinda ié ia ngi kungu. Talesa nga-nda kufunda nʼeie, kuma eie uambe: ki ngatʼiami kituxi.

³⁶ Eie ua tutumbilahi kiosuʼokio ni ku lungulula njila iê? Ni ku Ijitu kuenhoko a-nda kua ku kuatesa jisonhi, kala kia ku kuatesele-ju ku Asídia.

³⁷ Ni kua muenhó hinu eie u tunda-ku ni maku mu mútue; kuma o idielelu ié Jihova ua i tende, kua-nda kuzediua na-iu.