Jelemiia 19 - O Mikanda Ikola

O botija i budika. Jeluzaleme u sebhuluka

¹ Jehova ua ngambela, kiki: Katuka, kà sumbe botija ia utuma kua ngumbi, bhitula ue adiakime ku mundu ni ikulakaji ku jinganga;

² u di tele ku dikolo dia monʼa Hinome, dia lungila ku muelu ua kumbi, u boke kuenhoko maka moso nga-nda ku kuambela.

³ U zuele, uixi: Ivenu kizuelu kia Jihova, enu mu jisobha ja Juda, ni akua bhata mu Jeluzaleme: Jihova dia Ilombo Ieta, Nzambi ia Izalaiele, uambe kiki: Talenu, nga-nda kubheka hadi ia dikota bhu kididi kiki, o uoso-uoso uanda ku ivua, mu mátui mu-ia ni ku mu diʼtaiela.

⁴ Mbata eme a ngi xi, o kididi kiki a ki kasanesa, muene muohela uasu ua dizumba phala jinzambi jengi, jene nuka a jiʼjidile, né ene, mba o jitata jâ, né o jisobha jene ja Juda; ia edi o kididi a kiʼzalesa ni manhinga ma athu a iuka.

⁵ Mbata a tungu matala ma Bale, mbé o kuoha anʼâ mu túbhia, uene mubhaku ua kuohela Bale; kima eme nuka nga a lekelelè-kiu, mba ku ki tanga, mba ngi ki banza ngó mu kilunji kiami.

⁶ Kienhiki Jihova ua tange uixi, talenu hinu kuiza izuua, kididi kiki ka kʼixana dingi Tofete, mba dikolo dia monʼa a Hinome, maji dikôlo dia kijibha.

⁷ Kuma o kaiula ka Juda ni ka Jeluzaleme hinu ngi ka bhuisa-ku bhu kididi kiki; anga ngi a laukisa ku xibhata bhu pholo ia jinguma jâ, ni bhu lukuaku lua ió oso a mu sota ku a katula o mienhu iâ; anga iimbi iâ ngi i bhakuila jinjila ji bhita bhulu ni iama ienda bhoxi.

⁸ Ni mbonge iii nga kà i bhanga kidiuanu, anga i xalela bhu ditala dia kusebhuluka; uoso u bhita-mu anga u di uana, hé u xika muphióphio, mukonda dia mabhebhu mê ma bhitimu.

⁹ Nga-nda ku a disa ue o xitu ia anʼâ a mala ni a ahatu, hé muthu ni muthu udia xitu ia mukuá, kioso kia kà kala bhu kibhidi, ni kia kà a kondela kuala o jinguma jâ, ni iá oso a mu sota o ku a katula o mienhu iâ.

¹⁰ Bhenhobho-phe ka bule botija; u i budila muene bhu pholo ia athu oso u uia-nâ.

¹¹ Anga u ambela: Uixi Jihova dia Ilombo Ieta uambe kiki: mundu iú nga-nda ku u bula kienhiki, ni mbonge ienhiʼii, kala kia bula o kitutu kia utuma, o ku ki banda ki ki xikina dingi, anga a kà a funda mu Tofete, mbata o kididi kiengi ki kia kà moneka phala ku a funda.

¹² Kididi kiki hinu ngi ki bhanga kienhiki, eme ngi Jihova, ni akua bhata ene-mu; kiene muene, phala mbonge iii ngi i bhange kala Tofete.

¹³ Jinzu ja Jeluzaleme, ni jinzu ja jisobha mu Juda, ja-nda kukasana, kala o kididi kia Tofete: kiene kimoxi ue ni jinzu josololo, jedi o ku hongo iâ kuene kuohela o uasu ua dizumba phala ilombo ioso ia maúlu, ia a bhela-bhu mibhaku ia kúnua ku jinzambi jengi.

¹⁴ Kuila Jelemiia ua tundu kiá ku Tofete, kuoso kua mu tumine Jihova mu kuzambula mu upolofeta, uimana mu lumbu lua Inzu ia Jihova, iú uambela o mundu uoso, uixi:

¹⁵ Jihova dia Ilombo leta, Nzambi ia Izalaiele, uambe kiki: Tala-ze, mbanza iii ni jimbonge jê joso nga-nda ku a bhekela o hadi ioso muene i nga a kanenʼoio, kuma a hinanesa o jixingu jâ phala a lémbue kuívua o maka mami.