Jelemiia 18 - O Mikanda Ikola

Kitutu kia Ngumbi: O kuẋinuka kua mundu

¹ O kizuelu kia Jihova, kieza kua Jelemiia kuila:

² Balumuka, u kulumuke kʼonzo ia ngumbi, o kuenhoko, kuene ku nga-nda ku kuivisila o maka mami.

³ Eme nga kulumuka ku bhata dia ngumbi, nga mu sange iu iudika kikalakalu kiê ku thanduʼa malola.

⁴ O kitutu-phe, muene ngumbi, kia kexi mu kumba ni utuma, kia mu budikila bhu lukuaku, hé u vutukila kiá ku ki umba kitutu kiengi, kala kioso muene kia mono kia mu uabhela ku mesu mê o kubhanga.

⁵ Bhenhobho-phe, o kizuelu kia Jihova kia ngi sange, uixi:

⁶ Mbé eme ue ki nga soko-bho o ku mi bhanga kala kia bhange o ngumbi iú, enu mu dibhata dia Izalaiele? Jihova ua ki tange. Talaze, mukua ni utuma bhu maku ma ngumbi, kiene ue ki muala enu bhu maku mami, enu mu dibhata dia Izalaiele.

⁷ Bhu kithangana kioso ki ngi kanena o kifuxi mba utuminu, phala ku u vuza, ni ku u lundumuna, ni ku u buikisa.

⁸ O ki kala o kifuẋiʼokio ki nga kanena, ki biluka kuxa o kuiibha kuâ, kua ngi bhekesa o ku a kanena, eme uami ngi tolola o thulu iami, divuua di nga banzele o ku a bhanga ene, ki ngi di bhange dingi.

⁹ O bhu kithangana ue kioso ki ngi kanena muiji, mba utuminu, phala ku tunga ni ku soma;

¹⁰ o ki kala ene a bhanga kima kiaiibha bhu pholo iami, hé a kamba kuivua o dízui diami, kuabhu-phe, eme ue ngi dielesa ku mbote i nga tangele ku a bhanga.

¹¹ Kala kikiphe, ka tangele akua Juda kindala, ni akua bhata mu Jeluzaleme, uila: Eme Jihova uambe kiki: Talenu, nga mu funha divuua phala enu, eme ngala ku mi ta kikutu kia ufe; bilukenu-ze, kindala, kala muthu a xe njila iê ia iibha, mu iukise o jinjila jenu ni ibhangelu ienu.

¹² Maji ene-phe exi: Ku tale hadi, mbata etu tu kana kuenda kia tu tumu o ixinganeku ietu; kala muthu ua-nda kubhanga kioso kia mu tumu o muẋima uê ua bhumu.

¹³ Uila kiki, Jihova uambe; ibhulenu kindala muʼaxaxi ka matumbu mba mukuahi uevile kima kala kiki? monʼa kilumba mu Izalaiele-ze ua bhange kima ki kuatesa uoma!

¹⁴ Manhi muthu u di fulʼé o neve ia Libanu anga u sola mukáu ua di zale ndanji? inga o menha ma talala ma tunda makanga ni ku kunguluka ene ku ma landuka?

¹⁵ Kienhiki o mundu uami ene ku ngi jimba muene, hé a kuata kuohela uasu ua dizumba ku lusebu; ia a tu bhangesa ku di bhukana mu jinjila jâ ni mu ikoka ia xahulu, phala nʼendele mu ikoka iengi ki iòsengulule;

¹⁶ phala kubhangesa kuila oxi iâ i biluke kima kia kisunji ki kuatesa uoma ni kasekelu ki kʼabhu dingi; uoso u bhita-mu u diuana anga u bhuka ku mútue!

¹⁷ Eme nga-nda ku a muanga ni kitembu kia thunda bhu pholo ia nguma iâ; nga-nda kua edikiza dikunda, pholo kana, bhu kizuua kiâ kia kibuika.

Jelemiia a mu ta kikutu kia ufe

¹⁸ Bhenhobho ene exi; Izenu tu di kunde kioso ki tu bhanga mu kununguna Jelemiia; kuma-phe o ngonge ia nganga mba kaiula ka ngambi, mba kizuelu kia musesedi ki iene kufula: izenu tu mu kuame ni dimi, maka mê oso-oso, kana dingi kua evua.

¹⁹ Ngi tale diesu Jihova, nda uívue o dízui dia iá ala ku zoka ni eme.

²⁰ Manhi mbote a i futa ni phulu? Oko a kande o diela phala o muenhu uami! Lembalala kuma eme ngemana bhu pholo ié-eie, phala ku a zuela mbote ia ene, phala njinda ié ki ia a tule, i ile kuengi.

²¹ Kienhiki-phe, anʼâ a bhakule ku nzala, u a bhakule ue ku nguzu ia xibhata, akajʼâ a a nhane o tuana, ene uâ a xale atudi; a muadi uâ a bhituke ku phoko ia kalunga, o anʼâ a mala a a kuame ku xibhata mu kubhânga mvunda.

²² Kioso eie ki ua-nda ku a tukumuisa ni kibuka kia masoladi, uívua nzongo ia kudikola i tunda mu jinzu jâ! Mbata a kande diela phala ku ngi kuata, o inama iami a i tela mabhebhe mu njila.

²³ Maji eie-phe, Jihova, tata, uejiia kikutu kiâ kioso kia ngi te phala ku ngi jibha; kikuma kiâ ku ki loloke, o kituxi kiâ ki xale muene bhu pholo ié, ku ki jimune, maji a di bhukane muene bhu pholo ié; u a bhanga kienhiki bhu thembu ia njinda ié.