Jelemiia 16 - O Mikanda Ikola

O ubhika ua-nda kuiza kua Izalaiele, a u tanga ni ubhulukilu uê

¹ O kizuelu kia Jihova anga ki ngi sanga, kixi:

² Eie kana ku sakana muhatu, né ana a mala mba anʼa ahatu, ku a vualela bhu kididi kiki.

³ Mbata Jihova uambe kiki: Ku mbandu ia ana a mala ni anʼa ahatu oso a-nda ku a vualela bhu kididi kiki, ni ku mbandu ia jimama jâ a a bhanduluka, ni jitata jâ ja a vuala mu ixi iii.

⁴ Kuma a-nda kúfua ni mahaxi ma xixima, ki bhuanda kuẋikina ku a dila mba ku a funda; a-nda ku kituka kala ditobe ku mukáu; a ka jikinina ku nzala ni ku xibhata, o imbi iâ ia kà kala kudia kua jinjila ja bhulu ni kua iama bhoxi.

⁵ Mbata kienhiki kiambe Jihova, uixi: Kana ku bokona monzo ia thambi, né ngó kuila uia mu dila, mba u a kuatela henda; mbata o mundu iú, o kutululuka kuami ni kulenduka kuami ni henda nga kà a katula-iu, Jihova ua ki tange.

⁶ Ni makota ni jindenge hinu à kʼafua, moxʼumu, o ku a funda ki kuanda ku xikina; ki bhua-nda kukala ku a dila thambi mba ku di sema ku mikutu, mba ku di kolola jindemba ku mútue.

⁷ Né-mbe ku a bhana kima bhu lamba, kia ku a konda malamba bhua bhiti o kalunga: mba ngó ku a nuisa ku nganza ia ku bhuisa mukondo kua tata mba kua mama ia uoso-uoso.

⁸ Eie ue kana kubokona monzo ia kizokola, mba ku xikama mu kudia-nâ ni kunua-nâ.

⁹ Mbata Jihova dia Ilombo Ieta, uambe kiki: O Nzambi ia Izalaiele, uixi: Talenu mu izuua ienu muenhumu, nga-nda ku bhuisa-ku, bhu kididi bhabha, o dízue dia kutana ni dia kutonoka, ni dízui dia ngaiala ni dia dibhanga, ku mesu menu.

¹⁰ Kia kà kala-phe kiki: O ki uà kèla ua zubha ku a jimbuila maka mosoʼ ama, ene anga a ku ibhula kuamba: Phalahi-phe Jihova u tu xindila divuua dionéne didi? Kikuma kietu kiahi ni kituxi ki tua te kiahi kua Jihova Nzambi ietu?

¹¹ Eie-phe ua kà a tangela uixi: Mukonda jitata jenu a ngi xisa, eme ngi Jihova, ia a kaiela jinzambi jengi, ia a ji bheza, ia a ji diundila, eme ia a ngixi, o kitumu kiami ku kiaiuka, nguâ.

¹² Enu-phe mua beta ku zanga, o jitata jenu ndenge; mbata, talesa hanji muthu ni muthu mudienu kia kuata ku kaiela kia mu tumu o muẋima uê ua kubhukumuka, mbé o kufula ku ngi bhana eme o mátui.

¹³ Kala kiki-phe, nga-nda ku mi kaia moxʼumu, muia ku ixi ki mua ijiia nʼenu ni jitata jenu; o kuenhoko kuene ku mua kà bhikila o jinzambi jengi mu muanha ni mu usuku; kuma o koko ki nga-nda ku mi kuatela dingi henda.

¹⁴ Uila kiki, Jihova uambe, talesa, kua-nda kuiza izuua, o kiki kà ki tanga dingi, kia kuila: Jihova u kola; Ua bandesa ana a Izalaiele koxi ia Ijitu.

¹⁵ Maji ela: Jihova u kola! ua tombola ana a Izalaiele koxi ia kusuku ni ku jixi joso ku a a takuile; mbata eme nga-nda ku a vutula ku ixi iâ i nga bhele ku jitata jâ.

¹⁶ Talesa nga-nda ku tuma atona a nzungule, eme Jihova, ene a-nda ku a tamba; anga ngi kasa kiua nzungule ia manhanga ene a-nda ku a tomba ku milundu ioso, ni ku tu-thuthulundu tuoso katé ni mu mabanda ku jindanji.

¹⁷ Mbata mesu mami ma lungu muene ku jinjila jâ joso; ene ka suama bhu pholo iami, mba o ikuma iâ i di sueka ku mesu mami, lémbue!

¹⁸ Kima kia dianga nga-nda kua bhana futu luiadi mu kuiibha kuâ ni kituxi kiâ, mukonda oxi iami a i kasanesa ni imbi ia ima iâ iaiibha kinéne i kuatesa fuokoso, ni undundu uami a uizalesa ni isunji iâ.

¹⁹ Jihova tata, u kimbaka kiami, u nguzu iami, u disuamu diami mu kizuua kia phaxi! Matumbu-ze a-nda kuiza kokué, tundé ku maẋokololo ma ixi, anga ela: Mbé jitata jetu a lunduile ngó makutu, ni kingoho ki kuala kubhanduluka kua kima.

²⁰ Mbé o muthu u di iudikila muene o jinzambi jê, o jene sumbala ki jinzambi?

²¹ Kala kiki, talesa-ze, nga-nda ku a ejidisa muene, kiki kiá nga-nda ku a ejidisa o lukuaku luami ni kutena kuami; anga à kejiia kuamba dijina diami eme Jihova.