Jelemiia 15 - O Mikanda Ikola

O kusenguluka Kua Mundu

¹ Jihova-phe ua ngambela, uixi: Né-mbe hanji Mozé ni Samuele emanene bhu pholo iami, o muenhu uami ki ueje ku di bunda ni mundu iú; a kaie, bhu pholo iami a tunde-bhu.

² Kienhokio-phe, ene kioso kia kuambela kuila: Tu di tela phe kuebhi? Eie u a tangela: Jihova uambe kiki: a tokala kufua, afue; o a tokala ku bhita ku xibhata, ku xibhata; a tokala ku nzala, ku nzala; a tokala kuia ku ubhika, ku ubhika.

³ Kuma nga-nda ku a endela ni mavuua ma uana, eme ngi Jihova, ngiia ni xibhata phala ku jibha, ni jimbua phala ku a koka, ni jinjila ja bhulu ni iama ia bhoxi, phala ku a zokonona ni ku a jikinisa.

⁴ Nga-nda ku a balakesa ku mautuminu moso ma ixi; mukonda dia Manasa, monʼa Ezekiia; sobha ia Juda, ku ima ioso ia bhange mu Jeluzaleme.

⁵ Kuma mukuahi u ku kala ni henda, eie Jeluzaleme, tata! Nanhi u kala ni dilamba mukonda dié-eie? Mba mukuahi u xikina kubhambuka na kuile: Kiebhi-ze mukuetu? Uala kiambote?

⁶ Jihova uambe, eie ua ngi-xi, ua vutuka ku dima; kiene ki nga-nda kusununuina o lukuaku luami ku thandu dié hé ngi ku jikinisa; o kudielesa ue kua ngi kumu kiá.

⁷ Nga-nda ku a bhiata ni mbangu bhu mielu ia oxi; o mundu uami nga u buba, o ana nga a katula-nâ; maji ene o kuvutuka ku jinjila jâ ja iibha, nguâ.

⁸ O atudiʼâ a ahatu a beta ku di vualulula o museke ua kizanga kia kalunga ndenge; ku mediia nga takana-ku mubuikixi phala kubuikisa mama ia minzangala: nga mu tumu ku mu tukumuisa, ni kuizalesa o mbonge ni kimbuua.

⁹ Kivuadi ua vualele sambuadi, ua zondo; muenhu uê ua mu-bhu; kumbi diê dia mu fuila kiá, sumbala mu muanha hanji; muene ua tandanganha, sonhi ja mu kuata; oso anê a mu subhuka-bhu, nga-nda ku a bhakula ku xibhata, bhu pholo ia jinguma jâ, Jihova ua ki tange.

Jelemiia u di tenda kua Nzambi

¹⁰ Kokolo diami, mamʼetu, tata! ua ngi vualela-hi ku kala iala dia ngongo, ngi muthu ua jinzaia, ngi muthu nga xikamena jimvunda mu ngongo ioso? Eme nuka ngʼa sobhesa ni kuvualesa dikongo, ene ue nuka a ngi sobhesa ni kuvualesa dikongo, hanji-phe a kuata kala muthu ni muthu o ku ngi bhubhidila.

¹¹ Jihova uixi: nga tange kidi, kuma eme nga-nda ku ku suinisa phala ku ku bhanga mbote, anga ngi bhangesa kuila mu ithangana ia phaxi ni ngongo, o nguma i ku kana ni kudionda.

¹² O felu, o felu ia ku suku, mba o asu, bhuala muthu u tena ku i bukula?

¹³ O jimbongo jé, ni mabhakelu mé, nga-nda ku a bhakula phala ku ku bhunda-u, mu ngoho; kia ki bheka-phe o ituxi ié ioso, ki bhita muene mu jimbambe jé joso.

¹⁴ Anga ngi ku ambata ni jinguma jé, muie ku ixi ki muejiia-ku; mbata njinda iami ia uama, túbhia mukuá, enu-enu-phe ia-nda ku mi uamena.

¹⁵ Eie-phe, u Jihova, ua kʼijiia; ngi lembalale Ngana, u ngi zungile, u ngi bhangele mvunda kua iá a ngi zuididika; mu ku xididika kué kana ku ngi bhitula; Eie ua kʼijiia kuila ngalu bonga malebhu mukonda dia ku ku zola eie.

¹⁶ Maka mé kioso ki nga ma sange, nga ma di lusolo, kuma maka mé ma ngi kala kutana ni kusanguluka mu muẋima uami; kuma a ngi luku dijina dié, eie u Jihova, Nzambi ia Ilombo Ieta.

¹⁷ Ki ngene ku xikama bhu nangu dia jisemenhi, né ngó kuila ngi tana-nâ; mukonda dia lukuaku lué, ngene ku di xikamena ubheka uami, kuma eie ua ngiʼzalesa ni njinda.

¹⁸ O misusu iami i jijilaʼhi kiki, fidila iami iia ni kutuza, ki i xikina kuiluka? Kifua eie kokuami uila kala ka honga ka makutu ngó, mukua ni menha ma lémbua ku kunguluka?

¹⁹ Uila kiki: Jihova uambe kuma: Sʼeie ua toloka, eme-phe ngi ku takana dingi, anga u kala jinga bhu pholo iami: eie se u tungula kima kia ujitu, o kia lusebu anga u ki texi, ua-nda ku kala-phe mukuâ ni dikanu diami; ndoko, eha-u ene a ku tolokele eie, eie ku ki sèse ku a tolokela ene.

²⁰ Nʼeme nganda ku ku bhanga kala kimbaka kia ngondo kia di jikidila, mu mvunda ni mundu iú; ene-phe a-nda ku bhânga nʼeie maji ka-nda ku ku tolola; mbata eme ngala bhuamoxi nʼeie phala ku ku langa, ni ku ku kudila kua ene, Jihova ua ki tange.

²¹ Nga-nda ku ku nhangumuna bhu lukuaku lua isuéia, nganda—ku ku bhulula ue bhu lukuaku lua mazonda.