Jelemiia 14 - O Mikanda Ikola

Jelemiia ka muehela ku diondela o mundu

¹ Kizuelu kia Jihova kieza kua Jelemiia kia tumbula hàmba ia dikota.

² Juda iú dila, o mabhitu mê ma zoza: ene a zakela ndombe katé bhoxi, nzongo-phe ia Jeluzaleme ii banda.

³ Jingana jâ ja beta ukota, ja mu tuma o jindenge kuteka menha; ene eza ku ixima menha né-ku; a vutuka ni masanga ma hatu; sonhi jʼa kuata, mu thulu mua a xiti, ia a vunga milele mu mítue.

⁴ Kuma mavu ma jikujuka, mukonda dia kukamba mvula mu ngongo, o idimakaji a kala ni sonhi, hé aia ni kuvunga milele mu mítue.

⁵ Jimbambi ue ku tutu ji vuala hé ji takuila ana bhobho, mukonda kana-ku iangu ia kudia.

⁶ Ni mikete ia mikáu i sambela ku ididi ia di leka, nʼa kuata ku fenha mulenge, mbambe ni mabheku; mesu mâ ma kengelela ma lembua, kuma iangu ki ia moneka.

⁷ Kia di kalela kiua kuma o ikuma ietu iene ia tu kundula, Jihova tata, bhanga kima, mu henda ia dijina dié; kuma umbalu uetu ua di sokolola; Eie muene tua ku te muene kituxi.

⁸ Eie u Kidielelu kia Izalaiele, eie u Mukudidi uê mu kithangana kia jiphaxi! u di bhangela-hi kala u nzuangiza moxiʼumu? mba u ngenji-a-thumba u bhambukila kuzekela usuku?

⁹ Kima kiahi ki uidila kala muthu a mu tukumuisa, kala dizonda dia lembua ku kudila? Hanji-phe eie Jihova, o muʼaxaxi kʼetu muene mu uala, etu phe a tu ixanena mu dijina dié: kana ku tu ehelela.

¹⁰ Jihova uambe kiki, ku mundu iú; kuma ene a uabhela kinéne o kubaluka, inama iâ ka i ximbakatesa dingi, kienhiki Jihova ua di kumu-nâ, maji o kindala ua-nda ku xinganeka dingi o kuiibha kuâ, anga u bhana njumbu ku ituxi iâ.

¹¹ Jihova ua ngambela dingi, uixi; Mundu iú ku a diondele mbote ia kima.

¹² Kioso kia jila, eme nzôngo iâ ki nganda ku ivua, o kia bhakula mubhaku ua kuoha, ni mubhaku ua kudia, eme ienhoio ki ia-nda ku ngi uabhela; o kiala-bhu eme nga-nda ku a jikinisa ku xibhata, ni ku nzala ni ku dibhebhu.

¹³ Eme-phe ngixi; Uá! Jihova, Nzambi, tata! Talesa o jipolofeta jala ku a ambela kuma: Kana, ki mua-nda ku mona-ku xibhata, ki mua-nda kala ue ni nzala; o kiala-bhu nga-nda ku mi bhana kutululuka kua kidi bhu kididi kiki.

¹⁴ Jihova ua ngambela: O Jipolofeta a zambula makutu mu dijina diami; nuka nga a tumine; né ngó kuila nga a bhana ngonge, mba ku a zuelesa; a zambula kisuma kia makutu, muzambu ua kusuma kua ngó, ni ukumbu, ni mangonha ma funha ngó mu muẋima uâ, iene ima iala ku mi zambuila ene.

¹⁵ Uila kiki, o jipolofeta ja ku tanga ima mu dijina diami, sè eme ku a tuma, eme ngi Jihova, ngambe kiki, ene ala kuila exi: kana-ku xibhata, kana-ku nzala ianda kuiza moxiʼumu; jipolofeta jenhojo ja-nda kubuika ku xibhata ni ku nzala kuene.

¹⁶ O mundu ua mu zambuila ene, a-nda ku a takuila mu jinzunga ja Jeluzaleme, mukonda dia nzala, ni dia xibhata; ki bhua-nda kumoneka muthu u tena kufunda akajiʼâ, ni anʼâ a mala ni a ahatu; ikuma iâ hinu nga a lunduluila-iu kienhiki ku thandu diâ.

¹⁷ Uila kiki a tangele maka iâ: Muanha ni usuku mesu mami ma kuate kienhiki o ku lundulula kisoxi, ki ma zumbuke; mbata kilumba kia muzeletete, monʼa mundu uami, a mu kuama kiavulu, kilonda kiê kia xixima kinéne.

¹⁸ O ki ngiia ngiie ku mukáu, talesa athu afu ku xibhata, iá; o ki ngiia ngi bokone mu mbonge, a benguka ni nzala, iá; katé-ze ni misesedi ni jinganga, a kondoloka ixi ni kubungana, ni kua di tela kejiia-ku.

¹⁹ Kifua Juda ua mu dituninʼaku kiá muene? Inga muenhu ué ua di kumu kiá ni Ziione? Ua tu kuamena-hi, nʼukambe o ku tu saka? Tua kingile kutululuka, mbote-phe ki ia moneka; tuedile tuexi kithangana kia kuiluka kieza, kiki-phe kueza kavuanzá!

²⁰ Uaué, Jihova, tata! Tua di xikina usuéia uetu, ni kubhuma kua jitata jetu; kuma tua te ituxi kokué.

²¹ Mukonda dia henda ia dijina dié, kana ku tu di tuna; o kiandu kia ulamba ué, kana ku ki diotela bhoxi; xinganeka, kana ku sangununa o kikutu ki ua ta nʼetu.

²² Manhi ku ima ia kingoho ia jijila o matumbu, kuala ki tena kunokesa o mvula? inga maúlu ma tena ku di bhela mvula? Kʼeie muene ngó, u Jihova, Nzambi ietu? Kala kiki tua kinga kokué, mbata eie uene ku bhanga ima iosuʼiii.