Jelemiia 13 - O Mikanda Ikola

Phonda ia linhu iedikiza ubhika

¹ Jihova ua ngʼambela kiki: Ndé, ka sumbe phonda ia linhu, u dikute-iu mu mbunda, maji kana ku i ta mu menha.

² Eme nga sumbu o phonda, kala kiambe o kizuelu kia Jihova, eme nga i zuata mu mbunda.

³ Kizuelu-phe kia Jihova kia ngi tula lua kaiadi, kixi:

⁴ Katula o phonda i ua sumbu u i zuate mu mbunda, zanguka: Ndé ku Ufalate u i sueke kuenhoko mu musula, ua ndanji.

⁵ Eme ngaʼii, eme nga i sueka bhu mbandu ia Ufalate, kala kia ngi tumu Jihova.

⁶ Kia bhiti-phe kuma, ki bhua zubha kubhita izuua ia vulu, Jihova ua ngambela uixi: Balumuka, ndé ku Ufalate u takane-ku o phonda i nga ku tumine kuila sueka-iu koko.

⁷ Eme ngele ku Ufalate, anga ngi kanda, nga fukununa o phonda bhuoso bhu nga i suekele; talesa phe, phonda ia bolo ia suku, ki ia sedivila dingi kima.

⁸ Kizuelu-phe kia Jihova kia ngi tula, kixi:

⁹ Jihova uambe kiki: Kienhiki ue ki nga-nda kubolesa o izala ia Juda ni izala ia vulu ia Jeluzaleme.

¹⁰ Mundu ua iibha iú, ua mu di tuna o kuívua maka mami, enda kioso kia a tumu muẋima uâ, anga a kuata ku kaiela jinzambi ja ngene, phala ku ji bhikila, ni ku ji diundila, a-nda ku di fuangana muene ni phonda ienhiʼii, ki i sedivila dingi kima.

¹¹ Kuma, kala ki kuatenena o phonda mu mbunda ia muthu, kiene ue ki nga kutila kokuami o dibhata dioso dia Izalaiele ni dibhata dioso dia Juda, eme Jihova, nda a ngi kale mundu uami, mu dijina, ni diximanu, ni mu fuma; maji kubhana mátui a ki tokoka.

O isudi ia vinhu

¹² Uila kiki, a tangele maka iá: Jihova, Nzambi ia Izalaiele, uambe kiki: Isudi iosololo ia-nda kuizala ni vinhu; ene-phe a-nda ku kuambela: kífua etu ki tua kijiia kiambote kuila isudi ioso-lolo ia-nda kuizala ni vinhu?

¹³ Eie-phe a tangele: Jihova uambe kiki: Talenu, athu osololo a tungu moxiʼumu, nga-nda ku a kodiuisa katé kia zezuka, ni jisobha ja tokala ku kixina kia Davidi, oso a xikama bhu kiandu kiê, ni jinganga ni jipolofeta ni oso kiá a tungu mu Jeluzaleme.

¹⁴ Hé nga a sasujula ni ku a bekujula ku akuâ, jitata bhuamoxi ni anʼâ, Jihova ua ki tange, uixi: Ki nga-nda ku loloka, ki nga-nda ku kondejeka, mba ku a kuatela henda, kuila ngi kamba kua buikisa.

Jelemiia u dimuna mundu kuila ehe o ukumbu

¹⁵ Batekelenu, mu bhane mátui: ki mu di zangeleke; kuma Jihova ua zuela.

¹⁶ Jingisenu Jihova, Nzambi ienu, kiosuʼiki kitombe ki kieza luua, kiosuʼ ʼiki ue o inama ienu kiluua i di bhukajana ku milundu ia vundu, ni usuku uila bui; mu kuila enu mua kingile mukengeji, muene hé u u bilula kizenji kia kalunga, anga u bheka-ku kitombe.

¹⁷ O kiki se mu kamba ku kʼivua, muenhu uami ua kà didila mu jihota ja di sueka, mukonda dia ku di zangeleka kuenu, mesu mami ma kà dila lujiji, anga ma koboka mu kisoxi, mbata o kilunga kia Jihova a ki ambata ku ubhika.

¹⁸ Tangela sobha ni na mvuale: Ditulululienu, mu xikame bhoxi; mbata o makembu oso a mítue ienu a sonoka kiá, o kitundu kia kizunda kienu.

¹⁹ Madiembu ma sulu a ma jika, u ma jikula ka moneka; Juda ioso a i ambata ku ubhika; kiene muene, Juda ioso a i ambata ku ubhika.

²⁰ Bhetulenu mesu menu, mu mone ala kuijiia ku suku; Kilunga kia ku bhele kiala kuebhi, ni jimbudi jene ku ku muesa o fuma?

²¹ Ua-nda kuzuela kiebhi, kia-nda ku ku tela o makamba mê enhó ku thandu dié phala ku ku tumina? Oko eʼmuene-muène ua a longo-kio kia ku ku bilukila? Abha o misusu ki ia-nda ku kuata kala muhatu uala ku mika ia kuvuala.

²² Kioso-phe ki ua kèla mu muẋima ué: Mukonda diahi, ima ienhiʼii ia ngiza? Mukonda dia nzungule ia ikuma ié kiene kia bhangesa o ku ku zakula o izuatu ié ia moxi, ni tusende tué tu tuala kutala hadi iavulu.

²³ Mukua Itiiópia mbé utena kubilula o kikonda kiê? Inga ingo i tena kuxa madinga mê? Hé kiene-phe, enu uenu mueju tena kubhanga o mbote, mu athu a mi longo o ku bhanga o phulu.

²⁴ Uila kiki nga-nda ku a muanga-muanga kala iẋinji ia ixina ia tiliku, iẋinji i phephuluka ni kitembu kia ixi ia kisekele.

²⁵ Jihova uambe: Ioso nzongo i nga-nda ku ku zongela eme, diene o dikanda dié; oko ua ngi jimbi eme, eie ua dielela ku makutu.

²⁶ Eme-phe ue nga-nda ku ku zakula o izuatu ié ia moxi katé ki i kuiza mu mesu; hé u xala ua zula muene tuẋi-a-thakala.

²⁷ Isunji ié nga i mono, ni jiphanda jé, ni kuzuluma kué kala kabalu, ni undumbu ué ua vulu kinéne u ua bhangela ku milundu mu mukáu; Jeluzaleme, lamba dié! Abha ngué ku di zelesa? Ukala kienhokio ʼté bhebhi, tata?