Jelemiia 12 - O Mikanda Ikola

Jelemiia uibhula Jihova

¹ Eie, U Jihova, u lungʼé, né-mbe ngedile ngi bokona nʼeie mu kufunda; hanji-phe u ngi zuelesa ku mabatuilu Phalahi isuéia a kala ni kubhanduluka mu njila iâ, anga a laia ni kutululuka, ió oso a bhanga kiaiibha ni usuangi?

² Eie ua a phaphe, ene ia a te jindanji; ia a suluka muene ku pholo, kuma a bhana ibundu; eie uala muene mu kanu diâ, maji uala dikanga ku miẋima iâ.

³ Maji, Jihova eie ua ngʼijiia, uene ku ngi mona; o muẋima uami kioso ki ua di tumu nʼeie, eie ua ki tongolola: Landameka-u enhó kala jimbudi jiia bhu dijibhilu, a iudike phala bhu kizuua kia kijibha.

⁴ Enu mala! mbambe bhebhi oxi i kuata ku dila kiki, o iangu ioso ku mukáu hé i kuata kuelela kiná? mukonda dia usuéia ua iá a tungu-mu ni iama ni jinjila ji kuata ku buika; mbata ene exi: Muene disukilu dietu ka-nda ku di mona.

⁵ Abha-phe se ki uala ku lusolo ni iá akua kulenga ni iama bhoxi, eie ua zonduê kiá, o akua jikabalu-phe ua-nda kusoka-nâ kiebhi? Se mʼoxi ia paze mu ua dielela, kia ku bhonzo kiá ku tula muẋima, ua-nda kubhanga kiebhi kioso kizala Njolodá?

⁶ Kuma-ze katé ni jiphange jê, ni dibhata dia tatʼenu ala ku ku kuata ngó kafua-ku-pholo; ene muène ala ku ku kolela kuema dié ni mázui ma suina: Kana-phe ku a dielela, né-mbe a kuambela muene ima iambote.

Oxi a-nda ku i muanga. Jindumu kua ió oso a-nda ku i muanga

⁷ Onzo iami nga i ehelela, undundu uami nga u ẋimbuka: kazola ka muenhu uami nga mu bhakula bhu lukuaku lua jinguma jê.

⁸ Undundu uami ngi u kita hoji iala mu kitumba: o kia ngi zuminʼokio kiene ki nga mu zembela.

⁹ Undundu uami ua di fu ni njila ia vulu mabaka; jinjila ja mu kondo mbandu ni mbandu: enu mu iama-phe, ia mukáu, izenu, diphophienu, zenu mu sana-sane.

¹⁰ Abidi a nzungule a ngi senguluila o mulenga uami ua mivide, a diata-diata díbhia diami, o díbhia diami di ngʼene mu kuinda a di kitula kikangalakata kia hatu.

¹¹ A di bhange ngundu muene, o mu ku di suuata kuê di di kola kokuʼami; oxi ioso a i sengulula, mukonda ki muala muthu ua ki kexila ku pholo ni ku ki ta muene ku muẋima.

¹² Mu ididi ioso ia di leka ia kikangalakata mua tundu akua kubuikisa; mbata o xibhata ia Jihova i leleka tundé hota ia ixi katé hota ia mukuâ; ki bhuala xitu i kala ni kutululuka.

¹³ A kuu tiliku, a munu minha; a di tutumbisa ngó, maji ka katula-ku kima; idima i mua bhongolola ia mi kuatesa jisonhi, mukonda dia kutema kua njinda ia Jihova.

¹⁴ Jihova uambe kiki, ku mbandu ia nzukame jami joso ja ibha a mu bhunda o undundu uami, u nga lunduisa o mundu uami ua Izalaiele: Talesa, nganda ku a vuza moxi iâ, o dibhata dia Juda hadia ngi di vuza muʼaxaxi kâ.

¹⁵ Anga kia kà bhita, kuila ki nga kà zubha ku a vuza kiá, ngi vutukila-ku anga nga a lendukila hé nga vutula dingi, muthu ni muthu ku ubhinganu uê, muthu ni muthu kʼoxi iê.

¹⁶ Anga kia kà bhita kuila, se ene a kuata muanu ua ku di longa mauendelu ma mundu uami, ni kuloka mu dijina diami, kuamba: Ni Jihova muenhú! Kala kia longo o mundu uami o ku lokela Bale, kienhokio kiá mu kaxi ka mundu uami a tunga a soma.

¹⁷ O ki ela-phe nguâ kuivua, muiji uenhó hinu nga kà u vuza hé u bhua-bhu anga nga a jimisa o mbutu, Jihova ua ki tange.