Jelemiia 10 - O Mikanda Ikola

O Mahamba ni Jihova

¹ Enu dibhata dia Izalaiele ivenu kizuelu ki mi ambela Jihova.

² Jihova uambe kiki: Ki mu di longe o njila ia akua matumbu mba o isuma ia diulu i mi sasumuisa: Kuma iene o ima ia mu kuatesa uoma ku akua jixi.

³ Mbata o ífua ia mundu kingoho: ene a batula muẋi mu tutu, kikalakalu kia maku ma hete, ua u batula ni dikuua.

⁴ A u kembesa ni phalata ni ulu, a u kuatesa ni jipheleku ni martelu, phala ki u zambe.

⁵ Ela kala diaie, kikalakalu kia bhiti ku torno, maji o kuzuela-phe ka tena, ku bhinga muthu u a ambata, mukonda ene ka tena kuenda; ki mua a kuatele uoma mbata kialʼokio ka tena ku bhanga kia iibha, mba ue a kala ngó ni kutena kua ku bhanga mbote.

⁶ Kana-ku u di fuangana nʼeie, u Jihova: Eie u munéne, o dijina dié ue di kola mu kuvula o nguzu.

⁷ Eie u Muenexi uavu ifuẋi ioso, mukuahi muene u kamba ku ku kuatela o uoma? Kuma eie ngó ua fuama ku ku kuatela o uoma; mbata muʼaxaxi ka jinjimu joso ja akua jixi, ni mu mautuminu mâ, kana-mu ua di fuangana nʼeie.

⁸ Maji ene oso a di bhange ima ia ngoho, a kituka maioua: Manhi, muxi, ulongelu ua kingoho.

⁹ A takana phalata iósule ku Talxixi, ni ulu ua Ufaze; iteka ikalakalu ia bhange kuala o hete, ia bhiti bhu maku ma muzunzi, a i idikila izuatu ia azulu ni ia kusuka; iene ioso-phe midimu ia kalakala jinjimu.

¹⁰ Maji Jihova, muene Nzambi ia kidi-èlele; muene-muène Nzambi ia muenhu, muene Sobha ua kalelà-ku; mukonda dia njinda iê oxi i tunguta, o ifuẋi-phe ilémbua kuximbakata ki mu kuata o kutema.

¹¹ A tangedienu kiki: O jinzambi joso ja kambele ku bhanga maúlu ni oxi, ja-nda ku jikinina kulu dia mundu, ni bhoxi dia diuluʼabha jijimuka-bhu.

Muimbu ua kuximana Nzambi

¹² Jihova ua bhange oxi ni kutena kuê; muene ua xikika o ngongo mu kuijiia kuê, o diulu ua di zale ni kutongoloka kuê.

¹³ O Muene kievisa dizui diê, mu diulu mu kala kilungutu kia menha, o ku a suku oxi ifuke iia ni kubanda: muene u bhanga itelu-tèlu ia nzaji phala o mvula, hé u tubhula o kitembu mu malundilu mê.

¹⁴ Muthu uoso-lolo ua di bhange kingoho, kejiia kima; azunzi oso sonhi ja a kuata kia tala o kiteka kiâ kia kuzunza; kuma o iteka iê ia kuzunza makutu ngó, momuʼâ kana-mu muenhu moxi.

¹⁵ Ia di bhange kingoho, midimu ia mangonha; o bhu kithangana kia ku a zungila, hinu a jima o mbutu.

¹⁶ O dikanda dia Jakobo-phe, ki dia di fuangana ni iá; kuma muene-muène mubhangi a ima ioso, o Izalaiele muene mbangala ia undundu uê; Jihova dia Ilombo Ieta, diene o dijina diê.

¹⁷ Eie ua tunga mu mbonge ia kolo, bhongolola o umonhi ué uoso moxʼumu.

¹⁸ Mbata Jihova uambe kiki: Tala-ze, kiki kiá, akua bhata moxʼumu nga-nda ku a takula, kala a a takula ni funda, hé nga a bhondeleka, nda ki a xixime, ni kuila:

¹⁹ Kokolo diami! Mukonda dia kusekala kuami! O fidila iami ialu ngi bhana misusu iavulu; eme ngambele ngixi: kia kidi kiene, kukata kuku nga-nda soka na-ku.

²⁰ Balaka iami a i sengulula, o mikolo iami ioso i batujuka; anʼami a ngi xi, aii, ka moneka dingi, ki bhuala dingi u ngolekela balaka iami, nʼa ngʼimikina o jikotina jami.

²¹ Mbata abidi a kituka ima ia ngoho, nguâ kusota Jihova: kiene kia lembuela o kuzediua, o ibhaku iâ ioso i ia muangana.

²² Tala, ku kuiza dízui dia fuma, kilungutu kia vulu ki tunda kʼoxi ia suku, phala kubhangesa kuila o mabhata ma Juda ma biluka jingundu, nʼa kituke tungilu dia mabheku.

²³ Jihova, tata, eme ngejiia kuila o njila ienda o muthu ki iene bhu lukuaku lua muthu-muène, mba muthu kienda, muene u tongesa o makanda mê-muène.

²⁴ Ngi bete, eie u Jihova, maji u ngi fikixila, kana kia fuama mu njinda ié, phala ku ngi jime o mbutu.

²⁵ Njinda iêʼoio lunduluila-iu ku ifuẋi ia kambe ku kuijiia ni miji ioso ia kambe ku tonda mu dijina dié; kuma a habula Jakobo, a mu habula, ia a mu jikinisa, o dibhata diê a mu senguluila-diu.